XXXX=Snilld / XXX=Fínt / XX=La la / X=Drasl / 0=Viðurstyggilegur viðbjóður

Fiskfélagið, Rvk XXXX
Heimsreisa hjá Fiskfélaginu. Fyrir 8900 kr. á mann var borinn í okkur hver rétturinn á eftir öðrum með útskýringum og staðsetningu. Maður átti að "ferðast um heiminn" með bragðlaukunum. Þetta var ægilega gott og hverrar krónu virði. Fiskmeti og kjötmeti og grænmeti og englamauk í eftirmat. Maður valt út tveimur tímum síðar og bjóst við að fólk að berja tunnur tæki á móti manni fyrir utan fyrir að vera svona mikið svín og hugsa ekki nógu mikið um skuldir heimilana. Fiskfélagið er töff staður og þjónustan næs. Túristar sem litu út eins og jarðvísindamenn meirihluti gesta. Ég þarf þó að minnast á að heimsreisan sem slík stóð ekki undir nafni því aðeins var boðið upp á evrópska rétti og einn amerískan (nautasteik með frönskum deluxe). Hvar voru fulltrúar afríku, asíu og eyjaálfu? Ég er ekkert að kvarta, mér datt þetta bara sísvona í hug.

Tilveran , Hafnarfirði XXXX
Góður fiskstaður í Hafnarfirði, kósí og alþýðlega nettur. Fengum góðan mat á fínu verði í hádeginu.

Súpubarinn, Rvk XXX
Í boði einhverjar 5 súpur. Valdi Tex mex (á 990 kall) sem var ljómandi góð. Vatn með og fínt kaffi á eftir. Gott útsýni yfir höfnina. Næs pleis.

Shalimar, Rvk XXX

Ég dreif mig aftur eftir að hafa lesið rosalega góða dóma í Grapevine. Það er búið að gera staðinn miklu vistlegri og meira spennandi en þegar ég fór síðast. Bland af báðum réttum dagsins á 1690 kall + frábært naan og fínn mangó lassí. Ódýrara en Austur Indía, en ekki eins gott. Mjög fínt samt og nokkuð sanngjarnt verð.

Daddi's pizza, Mývatni XXX
Fengum okkur pítsu á Daddi's pizza á Mývatni sem er án efa besta pístan á Mývatni og með flottasta útsýni sem um getur á pítsustað (aukastjarna fyrir það!)

Klausturkaffi, Skriðuklaustur, Fljótsdal, XXX
Lönshlaðborð á 2200. Allskonar gúmmilaði og sumt úr héraði. Geðveik lerkisveppasúpa og fínar hreindýrabollur. Mjög gott. Einnig í boði kaffi og kökuhlaðborð sem Lufsan segir meiriháttar.

Café Margrét, Breiðdalsvík X
Hugmyndin er frábær, þýskt fólk reisir þýskan bjálkakafa og býður upp á þýskan mat, víðsfjærri alfaraleið á Íslandi. Vanda þarf valið vel því þetta er dýr staður. Þýskur "pulsuplatti" er algjört okur, mjög illa útilátið á 3.350 kall, en gýrosið er skárra og skinkubrauð á 950 kall var það skásta fyrir aurinn. Ég væri svo til í að mæla með þessu pleisi en bara get það ekki. Okur!

Bistró, Skaftfell, Seyðisfirði, XXX
Bestu pítsur á Austurlandi og allskonar stöff. Fékk ágæta fiskisúpu, Lufsan ágæta beyglu, krakkarnir djúsí pítsu (fæ mér sjálfur svoleiðis næst) og allt rammað inn í Dieter Roth drasllistalegum fílingi. Á netinu.

Piri-piri, Rvk XX
Fremur undarlegt finnst mér að bjóða upp á kjúkling á svona góðum stað við höfnina. Maður hefði haldið að eitthvað sjávarkyns sé nánast skylda þarna. En allavega, þetta er stór og ágætur staður með mjög stóru og fínu barnaherbergi, sem krakkarnir una sér vel í. Matseðilinn er þó ekkert yfirmáta spennandi - enda kjúklingur eiginlega svo algeng fæða hjá manni heima að maður nennir ekki að borða hann úti, nema þá slísístæl á KFC. Ég fékk mér kjúklingaborgara með salati og Lauk chutney og gráðostasósu á 1480 kr (franskar með), sem var alveg ágætt, þó engan vegin neitt spes. Mun girnilegri mat fékk konan, eitthvað kjúklingadæmi í vefju. Börnin fengu pítsu, Chicago Town úr Bónus, sýndist mér. Sem sé, la la með góðu barna horni. Piri-Piri á netinu.

Íslenska Hamborgarafabrikkan, Turninum, Höfðatúni XXXX
Ég ætlaði alltaf að tékka á Fabrikkunni þótt mér hafi nú fundist hæpið um staðinn fullgróft. Simmi og Jói hljóta að vera einhverskonar snillingar - hæpsnillingar? - því hæpið skilaði svo geðveikum árangri að það er búið að vera stútfullt síðan staðurinn opnaði. Alltaf fullt og biðröð í hádeginu og á kvöldin, svo það er mesta vitið - nema maður vilji endilega hanga í röð - að mæta svona á milli kl. 17 og 17:30. En ef það er biðröð lætur maður taka niður nafnið sitt og fer út og gónir upp á háhýsið eða eitthvað. Fer smá rúnt, eða fær sér kaffi á Kaffitári.
En allavega. Matseðilinn er spennandi og skemmtilega uppsettur á blaði. Pleisið er Ikea hittir Hard Rock, bara töff og þægilegt. Afgreiðslufólkið ekkert rugl heldur almennilegt fagfólk. Ég skellti mér á Fabrikkuborgarann (1.295 kr. með frönskum) - "stolt staðarins". Borgarinn er mildur undir tönn og bragðast mitt á milli þess að vera djúsí, slísí og heilsusamlegur. Verulega góður bara og ég er strax farinn að slefa yfir öllum hinum hamborgurunum sem ég ætla að prófa næst. Lufsan fékk sér Ungfrú Reykjavík, eitthvað kjúklinga-spelt dæmi með pestó. Var mjög ánægð með hann. Það heyrðist ekki múkk í krökkunum því þeir voru með headfóns að horfa á teiknimyndir. Þau borðuðu matinn sinn upp til agna þar að auki (samlokur og franskar). Í eftirrétt kom besta skyrkaka sem ég hef smakkað á ævinni og Jóa Fel súkkilaðikaka sem var fín. Matseðilinn má skoða á netinu og eins og sést er staðurinn með fín verð miðað við sambærilega staði. Íslensk tónlist var spiluð á þægilegum styrk en ég myndi taka Söknuð Villa Vill út. Alveg óþarfi að minna mann á að maður drepst í miðjum borgara. Fullt hús stiga og ég skelli mér aftur við fyrsta tækifæri! (júní 2010)

SuZushii, Kringlunni XXXX
Fór aftur og fékk mér 5xKaliforníurúllur, flugfiskahrogn, ál og djúpsteikt tófú (sem var ekkert spes) en allt hitt var æðislegt! --> (fyrra skiptið): Keyptum ég og Lufsan samplerbakka á 3.200 kall. Fórum með hann heim, skiptum hnífjafnt og átum, mjög mjög fínt. Ég þarf að prófa aftur og velja eitthvað exótískara og borða í Kringlunni. Þessi sushi-staður fékk bestu meðmæli í Gestgjafanum um daginn og ég trúi því alveg - besti sushistaður landsins! Og mjög keppnishæft verð. SuZushii á Facebook. (júní 2010)

Kaffi Kidda Rót, Mosfellsbæ XXX
Kiddi hefur lagt mikla vinnu í að gera staðinn að alíslenskum poppminjaveitingastað, sem rosa fínt er að skoða. Musteri íslensks popps. Boðið er upp á úrvals djönkfúdd. Fékk mér djúsí Kidda special rómantískan borgara, hlaðinn með feta osti, maís baunum og fleiru. Nokkuð gott, en staðurinn hækkar almennt v/ poppminjafílingsins. (apríl 2010)

Ishin, Berlin XXX
Staðurinn lítur út eins og mötuneyti í frystihúsi en serverar ódýrt og gott sushi og japanskt stöff. Til kl. 16 er happy hour með 25% afslætti. (mars 2010)

Kasbah, Berlin XXXX
Marokkóskur með úrvalsgóðu tajini og kússkúss. Áður en máltíð hefst eru hendurnar á þér þvegnar upp úr rósavatni. (mars 2010)

Good time, Berlin XXXX
Gríðarlega flottur og hipp og kúl thai/indónesískur staður. (mars 2010)

Babel, Berlin XXXX
Líbanskur lítill og gríðarlega heimilislegur staður á Kastanienallée. Fyrir 17.50 Evrur skaltu fá þér Babel platel sem er allskonar líbanskt fæði fyrir tvo. Ótrúlega gott og vel útilátið og í alla staði æðisgengið. (mars 2010)

Maredo, Berlin X
Þegar maður kemur úr flugi vill maður asnast til að gera þau mistök að fara á næsta veitingahús sem maður sér. Þetta er fokdýr steikarkeðja með mjög óspennandi draslmat, túristagildra með útibú út um alla borg. Fékk sæmilega kjúklingabringu án sósu en með frönskum og sampler úr djúpsteikingarpottinum, m.a. djúpsteikta slepjulega sveppi úr dós! Ekki fara á þennan stað. (mars 2010)

Noodle station, Rvk XXXX
Einfalt, ódýrt (850 kr núðlusúpan) og frábært núðlustuð. Snæðið inni og fáið súpuskál. (14.02.10)

Brasilía, Rvk XX
Ég var dálítið spenntur fyrir þessum stað en varð fyrir smá vonbrigðum. Maturinn var bragðdaufur og bara alls ekkert spes. Ég sá eftir aurnum því ég hefði getað étið á Ruby og verið sáttari. Ég fékk mér nautasteik á 1790, þokkalega útilátið, ekkert gæðakjöt og bragðlítið allt saman. Alls ekki vont, bara ekkert spes. Lufsan fékk sér Brasilískt salat á 1300 sem hún segist alveg hafa getað gert sjálf heima hjá sér. Krakkarnir fengu hamborgara og franskar (550 kall). Ef þetta er það sem er étið í Brasilíu langar manni nú ekkert sérstaklega þangað. (04.02.10)

KFC, Kópavogi 0
Einhver var búinn að hrauna út allt klósettið. Allt í drasli á staðnum, enginn nennir að taka til þótt það sé ekki einu sinni röss-áer, eins og allir sem eru að vinna séu þunnir. Maturinn eins og hann er, skilur eftir sig poll á pappírsdiskunum og allt það. Og aumingja hænurnar! Takk fyrir samstarfið Kfc, þetta er komið gott í bili, minningin um þessa glötuðu heimsókn fælir mig frá ykkur lengi lengi. Eða það vona ég allaveganna. (16.01.10)

Græni risinn, Rvk XXX
Græni risinn er á tveimur stöðum í bænum, á Vatnsenda og á Grensásvegi 10 í sama húsnæði og Pizzeria Rizzo. Við þangað. Þeir kalla þetta heilsusetur og staðurinn er "í anda" Serrano, enda eigandinn áður að vinna þar. Fékk mér lamba vefju á 690 kall (var á tilboði, kostar annars 890 kr). Fékk mér súpu með á 200 kall og drakk vatn með. Ódýrt. Vefjan var stór í tveimur hlutum og nokkuð pökkuð og góð. Kom með tveimur skálum af hvítu og rauðu sterku jukki. Súpan var kjúklinga og heldur bragðdauf. Staðurinn var þéttpakkaður í hádegi á föstudegi og virðist spyrjast vel út. Ágætis léttmeti á fínum stað. (15.01.10)

Balkanika, Rvk XXX
Fyrsti búlgarski veitingastaðurinn á Íslandi er í gamla Núðluhúsinu gegnt Geisladiskabúð Valda á Vitastíg. Í boði er allskyns stöff, þ.á.m. átta tegundir af salati. Keypti mér eitthvað sem heitir Kjepsi eða eitthvað álíka og var tvær svínabollur, ein svínapylsa, franskar, slatti af grænmeti og sósa saman á disk. Ég var mjög svangur og ruddi þessu í mig af áfergju. Kostaði 1290 kr. Matur frá Balkanskaga er kannski ekki það mest hipp og kúl í heimi en þetta var samt mjög gott og seðjandi. Allt mjög ekta þarna inni og fín þjónusta. Ég fer örugglega aftur til að prófa eitthvað annað.

Kryddlegin hjörtu, Rvk XXXX
Ég mæli með Kryddlegnum hjörtum, dúndurfínum veitingarstað á Skúlagötu. Þar er heilsufæði gert frábært á bragðið með nýjum trikkum. Heilsumatur vill allur smakkast eins, eins og pappi, en hér er nýtt bragð og gott. Fyrir 1390 kall (ódýrt!) var hægt að fá sér 4 súpur og af mjög fínum salatbar. Ég fékk mér sjávarréttasúpu og kókoskjúklingsúpu. Báðar voru frábærar. Ég bölvaði liltum maga mínum fyrir að fyllast svona fljótt. Mig hefði langað til að éta miklu meira. Fer bara aftur. Fjórar stjörnur!

Saffran, Glæsibæ, Rvk XXXX
Flottur, ferskur, heilsusamlegur og helvíti ódýr veitingastaður í Glæsibæ. Fékk mér naanwich sem kostaði ekki nema 750 kall og var alveg svaka fínn. Mæli með þessum.

Fiskmarkaðurinn, Rvk XXX
Á sama stað og maður át stundum á Sticks and Sushi og Maru. Hér er japanskt í fyrirrúmi og búið að búa til töff innréttingar. Það var full út úr dyrum á fimmtudegi svo þessi staður spyrst vel út. Við átum "smakk matseðil" og rúlluðum út. Fyrst kom ágætur kóngakrabbi, þá lélegt svínarif og þokkalegt salad. Næst smásmugulegt sushismakk. Þá aðalréttirnir: ágætur hlíri, frábær önd og þokkalegur lax í núðlum. Allt var þetta flott útlítandi og með óvæntum brögðum og skemmtilegt að éta. Allt í kring var lið að éta spennandi mat svo maður fer þarna pottþétt aftur og prófar fleira. Toppurinn voru eftirréttirnir, 4 á bakka. Einn þeirra, anisfrauð, var svo spes og æðislegur að ég linni ekki látum fyrr en ég ét hann aftur. Smakkið kostaði 7900 kall sem er auðvitað rándýrt, en kannski ekki ósanngjarnt. Ég hefði bara að fleira hefði smakkast jafn geðveikt æðislegt og anisinn og öndin.

Tjöruhúsið, Ísafirði XXXX
Maggi smjörsteikir ferskan fisk oní gesti og Ranka ber fram á pönnunum. Fengum geðsjúkan kola. Hugsa um hann ennþá. Ódýrt miðað við. Ef þú etur ekki þarna á ferð þinni um Vestfirði ertu eitthvað verri.

Amma Habbý, Súðavík XXXX
Sem unnandi amerískra dínera gerði ég mér litlar vonir um oþentikina á bakvið "Diner" sem stóð framan á gömlu bensínstöðinni í Súðavík sem nú er Amma Habbý. En ég hafði rangt fyrir mér. Þetta er alveg frábær díner og vantaði bara rótarbjór af krana til að gera staðinn fullkominn. Semsé frábærir borgarar og besti sjeik norðar Álfheima. Ef þessi staður væri á hringvegi 1 mættu allir aðrir pakka saman.

Santa María, Rvk XXX
Gerði þau mistök að fá mér ekki mexíkóskt heldur samloku sem var svo sem alveg ágæt. Helsti kostur staðarins er verðið - ekkert kostar yfir 1000 kall. Reyndar allt á 990. Lufsan segir það hafa kostað 890 síðast þegar hún fór. En verðin eru sem sé gríðarlega jákvæð og til eftirbreytni. Vildi að fleiri veitingarhús tækju þennan pól í hæðina. Þjónustan var fín en réttirnir komu kannski full seint. Kannski mikið að gera í eldhúsinu. Innréttingar flottar og stemning góð. Fer aftur og fæ mér mexíkóréttinn með súkkulaðinu, það er ljóst.

Šešir moj, Belgrad XX
Í götunni Sardanska er allt vaðandi í sætum matarbúllum, götur hellulagðar og stemming góð. Samkvæmt Lonely Planet er þetta aðalpleisið og ég keypti réttinn sem stungið var upp á í bókinni. Það reyndist vera ostfyllt gráleit kjötlengja vafin með beikoni. Langt í frá góð. Ég gat ekki klárað einu sinni. En brauð og serbneskt salat var magnað (eins og á öllum hinum stöðunum í Belgrad). Sígaunaband glamraði eins og rófulausir kettir við hliðina sem var frekar pirrandi enda var þynnka í manni.

?, Belgrad XXX
Lítill staður með skökkum stólum og voða heimilislegur. Át kálfakássu með kartöflum. Ódýrt og gott.

Dva bela goluba, Belgrad XXXX
Besta máltíðin í Belgrad. Staður sem er líka í Sardanska. Át kalkúnasteik með gorganzólasósu sem var hreinn unaður. Gott band spilaði allan tímann við hliðina músik eins og beint úr myndinni Underground.

Vuk, Belgrad XXX
Man ekki hvað ég át en það var ágætt. Fannst allir líta út eins og mafíósar en það var bara paranojan að tala.

Jómfrúin, Rvk XXXX
Óaðfinnanlega framreitt danskt smörrebröd og fleira. Rauðsprettan til dæmis æði og sjálfur kaupi ég oftast hálfan buff tartar sem er alveg nóg. Besta er svo að verðið er nánast óbreytt síðan 1700 og súrkál og starfsfólk gott og gestir alþýðlegir.

Prikið, Rvk XXXX
Ég er aðdáandi amerísks morgunverðar, hins guðdómlega og æðastíflandi. Hnausþykkir pönnukökur löðrandi í hlynssýrópi, spæld egg, beikon, franskir kartöflukubbar. Ég hef ekki fundið þetta hér. Grái kötturinn hefur verið með "Trukkinn", illa útilátna og rándýra útgáfu af þessu. En nú, halelúja, hef ég fundið "vörubílinn" á Prikinu, glæsilega vel útilátið, ágætlega verðlagt (1190 kr) og hræðilega gott. Ég fann hjartað dröslast í gegnum óhollustuna, en svei mér þá, þetta fer ég og fær mér aftur... og aftur... og aftur...

Sushibarinn, Rvk XXXX
Ef þú kemst á sushi-bragðið er ekki aftur snúið. Oft hefur verið erfitt að fá sushi en nú er þetta komið víða, t.d. á Dómó (ekki smakkað þar) og Sushi the train. Nýjasta pleisið er Sushibarinn Laugavegi 2 þar sem Gott í gogginn var til forna og fleiri staðir. Þetta er pínkulítill staðar og brjálað að gera í hádeginu. Dótið er búið til fyrir framan kúnnann og er ferkst og ljúffengt. Verð eru í sama dúr og fólk er vant, Best fyrir 1 á 1500 kall (magafylli og vel það). Semsé, frábær staður sem maður á eftir að styrkja í framtíðinni.

Great Wall, Rvk XX
Í gamla Naustinu er nú kominn allt í lagi Kínastaður. Ég fékk mér hádegishlaðborð á 1450 kall og át mig pakksaddann af allskonar gúmmilaði. Staðurinn hefði fegnið XXX ef ekki hefði komið til ófyrirleitis okurs á kóki, lítil kók í gleri á 350 kall er forkastanlegt okur.

Rauða húsið, Eyrabakka XXX
Eru fluttir í stærra hús. Keypti sjávarréttarsúpu (1990 kall) sem var ágæt og fékk ábót. Nákvæmlega tveir humrar. Steini keypti nautasamloku sem leit mjög girnilega út. Krakkar fengu hamborgara sem virtust í lagi. Fínt en ekki æði.

Askur, Rvk XXX
Líklega elsta starfandi veitingarhús Íslands (síðan 1966 stendur á servéttunni). Mjög gott steikarhlaðborð á sunnudögum kl. 18. Fór og fékk mér hamborgara sem var fínn og svo sem ekki staðnum að kenna að ég hafi haldið að jalapenjo væri gvakamóle. Gríðarlega prófessíonal þjónar. Ég var kallaður "Herra minn". Askur er klassa búlla!

Sjávarkjallarinn, Rvk XXXX
Eitthvert rándýrasta átpleisið í bænum (skilst mér) og gæðin eftir því. Það er gáfulegra að spælsa þessu á sig í hádeginu því þá er ódýrara. Við skelltum okkur á 3ja rétta hádegistilboð á 2700 kall. Tampúrakrabbi í forrétt (stórkostlegt), ég fékk mér eggjanúðlur með sjittsveppum og tígrisrækjum (3 stk - mætti vera fleiri), en Lufsan fékk sér lúðu (of þurr). Mitt var helv gott og það var vel útilátið. Eftirrétturinn fór alveg með geðveikina, geðveikt súkkulaðimúss með ís. Hverrar krónu virði og merkilega vel útilátin máltíð. Ég var alveg á blístri enda var borið í mann snittubrauð og sósa og ídýfukorn. Svaka fínt.

Systrakaffi, Kirkjubæjarklaustri XXX
Fínt kaffihúsalegt veitingarhús með bæði borgarum og öðru stöffi. Ég fékk mér enskan morgunverð sem var dúndur hress og slær öðrum íslenskum enskum morgunverðum við, enda slíkt vandfundið hér.

Fosshótel Vatnajökull XX
Þjónarnir voru franskir sem bjó til international stemmingu. Ægiflott út um gluggann. Hamborgari þurr og lélegur, en fínni matur fínni.

Skaftafell bistró, Seyðisfirði XXX
Hér bar Gurra fram plokkfisk og góða fiskisúpu sem franskur (kannski?) kokkur matreiddi. Strákar sem litu út fyrir að fíla Múm átu við hliðina og ferðalangur frá Amsterdam kom grátandi inn því það var verið að spila eitthvað hollenskt rapp sem var það síðasta sem hollendingsgreyið átti von á að heyra þarna í rassgati. Artí fartí eins og í últöndum og því ekki það? Gaman.

Hótel Aldan, Seyðisfirði XXX
Allt gamalt og fínt, leirtau frá því sirka 1940 og maturinn voða fínn. Reyndar rándýr,en hei!

Fjarðarhótel, ReyðarfirðiXXX
Fékk ágætan hamborgara hér sem lofar góðu um hitt. Á næsta borði var Íslenskur gullgrafari í símanum. Samtalið gekk út á að hann var að reyna að finna upp formúlu sem gerði það að verkum að hann myndi græða á verktilboðinu alveg sama hvort dollarinn færi upp eða niður.

Fjalladýrð, Möðrudal XX
Lengst upp í sveit á hæsta sveitabæ landsins - 400 og eitthvað metrar. Fjallasjoppa með góðri en gífurlega beisikk kjötsúpu.

Götugrillið, Akureyri XX
Brjálað að gera enda bara einn kokkur á vakt (kona hins var að fæða barn, sagði okkur sveitt en almennileg þjónustustúlka). Hér er m.a. boðið upp á indverskt, sem var bragðdauft og nokkrum kílómetrum frá því sem best gerist (halló Austur indía félagið). Alveg ágætt engu að síður og verðið gott (miðað við landið).

Greifinn, Akureyri XXX
Þetta er nú alveg klassískt og ekki eins dýrt og mig minnti.

Brekka, Hrísey XX
Þjónusta í slómó og þegar humarsúpan kom loksins var hún köld og humarinn hrár. Send til baka til upphitunar og var ok þegar hún kom loksins. Næs pleis en mætti sýna meiri metnað þó lítið sé að gera.

Red Chili, Reykjavík XX
Fórum í Pósthússtrætið. Alveg þokkalegt svo sem, ég át kjúklingabörrító sem var bragðlítið og óspennandi og einhvern bland-forrétt sem var lala. Lufsan fékk sér salat sem var ok. Held ég leggi það ekki fyrir mig að fara þarna aftur.

Sægreifinn, Reykjavík XX
Karlinn er náttúrlega hress, en þessi súpa hans er nú kannski ekki himnasængin útbreidd, þótt ok sé. Hann er að leggja drög að dorm-aðstöðu á efri hæð en ég hef lengi barist fyrir svona, enda er upplagt að geta lagt sig eftir mikla máltíð. Það er þó algjör óþarfi að leggja sig eftir humarsúpu úr frauðmáli. Vantar frekar legubekki á Hereford eða Argentínu.

Hlið, Álftanesi XXXX
Bogi, kenndur við Bogarúllur, og Nok eiginkona hans hafa komið upp frábæru "heimaveitingarhúsi" á Hlið á Álftanesi, friðuðu eiði þar sem maður hefur Atlantshafið að fótum sér út um gluggann. Nok reiðir fram magnþrunginn Thailenskan mat, margrétta gúmmilað, án efa besta thaistöff landsins. Sjón er sögu ríkari og ekki verður þetta verra þegar Bogi verður búinn að koma upp spa-inu. Þessi staður ætti eiginlega að fá fimm stjörnur, en það myndi sprengja skalann.

Ólsen ólsen, Keflavík XXX
Þokkalegur hamborgadjónt við Hafnargötuna, en megahagstætt verðlagið (miðað við) hífir pleisið upp um stjörnu.

The Sushi train, Iða, Reykjavík XXXX
Loksins! Sushi-færiband í Reykjavík. Komum í hádegi á sunnudegi og var nokkuð þétt á færibandinu. Dótið rann hjá með góðum varíöntum. Verðin eru 200, 250, 300, 350 og 500 á disk. Nokkuð vel sloppið bara. Ferskt og gott og svo hægt að sérpanta. Fékk mér Californiu kramarhús og er enn að sleikja út um. Pottþétt pleis fyrir sushi frík!

Sombrero, 303 W 48th St., NYC XXX
Allt í lagi mexíkóskur staður.

Victor's Café 52, 236 West 52nd St., NYC XXX
Þéttur kúbanskur staður. Kúbanskt er aðeins öðruvísi en mexíkóskt.

Cheyenne Diner, 9th Avenue & West 33rd St. NYC XXX
Eðalbras í díner frá 1940 og eitthvað. Sögulegt en ekkert ótrúlega gott á bragðið!

Skyline Diner, 9th Avenue & West 34th St., NYC XXX
Eðalgott BSÍ-ameríka-stæl. Veltur út aðframkominn af áti.

Nos Ancetres Les Gaulois, 39 rue Saint-Louis-en-l'Île, París XXXX
Magnað risavaxið pleis í aldagömlum katakombum á þessari eldgömlu eyju í miðri Signu. Nafnið þýðir "Forfeður okkar Gaulverjarnir" og er allt í svona Ástríx-stemmingu þó honum hafi per se ekki verið stillt upp á staðnum. Þjónarnir voru eiturhressir og maður mátti henda sígarettunum á steingólfið. Þeir sögðu að svínin væru tekin fram og látin hreinsa til eftir lokun. Til að byrja með var sett á borðið gríðarleg karfa troðfull á grænmeti sem maður átti að búa til salatið sitt sjálfur úr. Svo var hlaðborð með ýmsu kjöti og dóti. Svo gat maður valið um aðalrétt og eftirrétt. Allt þetta á 35 Evrur á kjaft. Að auki voru rauðvínstunnur á svæðinu sem maður mátti gangi í að vild enda rúlluðu að lokum allir út fullir og magasíðari en áður. (Heimasíða)

Chez Paul, 13 Rue de Charonne, París XXXX
Ekta franskt og unaðurinn einn. Gráðostafylltur héri og eitthvað meira sem ég man ekki enda með nokkra fokdýra kokteila í maganum sem við héldum að við værum að kaupa á happy hour (á skítabúllunni Boca Chica sem ber að varast. Vilji fólk ódýra kokteila (5 evrur stk) má mæla með happy hour á glansbarnum á 35 rue Vieille-du-Temple (til kl. 20). Franskt og þægilegt pleis.

Chez Omar, 47 Rue de Bretagne, París XXXX
Kússkúss aldarinnar! Hrikalega vel útilátið og kjötið meirt eins og rjómi. Í Lonely Planet-bókinni er tekið fram að þjónarnir á þessu pleisi séu furðulegir og reyndist það rétt. Einn arabatittur var með eintóma stæla og grín sem maður tók bara enda maturinn of góður til að væla. Hann hélt því m.a. fram heillengi að það væri ekkert kússkúss til í húsinu og þegar hann bar fram expressóið þóttist hann hella yfir Steina. Í smástund frusu allir en þá var karlskrattinn með tóman bolla. Mæli með Royal Couscous-inu sem inniheldur einhverjar 4 kjöttegundir. Óheyrilega gott. (Heimasíða)

Ambassade d'auvergne, 22, rue du Grenier Saint-Lazare, París XXXX
Ægilega fínt pleis sem reiðir fram mat frá Auvergne hérðinu og er staður sem veitir vel og mikið. Ýmiskonar gúmmilaði í forrétt, m.a. pylsur og hráskinkur frá héraðinu. Nautakjöt í aðalrétt voru mistök, en ég smakkaði líka perluhænsn (Guinea-fowl) og í eftirrétt var hrikalega gott chocolate-múss í 2 lítra skál svo allir átu yfir sig. Þjóninn var dáldið þurr til að byrja með en linaðist upp í góðu gríni eins og t.d. með því að láta sem 2 lítra múss-skálin væri fyrir Lufsuna eina. Topp stöff og það má algjörlega mæla með öllum þessu fjórum hér að ofan. Muna að þykjast vera Doktör til að fá góða þjónustu. (Heimasíða)

Hótel Búðir, Snæfellsnesi XXXX
Nýju Búðir finnst mér alveg halda sama sjarma og Búðir sem brann. Kom í hádeginu og fékk mér franska lauksúpu, skötusel og súkkulaðiköku. Magnað og magnað pleis.

Kaffi Krókur, Sauðárkróki XXX
Metnaðarfyllsta veitingarhúsið á Króknum. Alveg fínt, en aðeins og dýrt kannski.

Maður lifandi, Borgartúni XXX
Grænmetis og lífrænt-bla bla pleis í nýja viðskiptahverfinu, Voll strít Íslands í Borgartúni. Ljómandi gott "hollt" gúmmilaði og verðið þokkalega sanngjarnt.

Purple Onion XXX
Magnað Schwarma hjá Alex í Hafnarstrætinu. Svaka gott og sanngjarnt verð.

Cafe Kidda Rót, Hveragerði XX
Í fyrstu ferð á Kidda Rót í hinni glæsilegu Sunnumörk var étið eitt stk af hinum, að sögn, rómaða rómantíska hamborgara. Lítið rómantískt var við borgarann, þetta var svona týpískur landsbyggðarborgari í anda American Style. Ágætur sem slíkur en ekkert spes. Lufsan át Pízzu og þótti ok. Í næstu ferð verður þó étin belgísk vaffla sem ku lostæti.

Asian Express, Hafnarfirði XX
Hér er meiningin að bjóða upp á asíska rétti úr heitu borði og eru fánar ríkjanna notaðir til stuðnings. Gæti verið flott en er bragðlítið og varla meira en þokkalegt.

Gran Slow Boat, Playa del Ingles, Gran Canary XX
 Þokkalegt kínakrapp. Bragðlítil appelsínuönd en ágæt crispy duck. Hefði kannski átt að kaupa eitthvað annað en þessa feitu önd.

Bali, Playa del Ingles, Gran Canary XX
 Dúndurhress þjónn sem talaði hrafl í íslensku en bragðlítill indónesískur matur. Fannst þetta eins og dótið í borðinu á Nings. Vonbrigði. Þar að auki er búllan í kjallara á dauðalegu hóteli og maður bjóst við að mæta zombí á vappinu.

Sakura III, Playa del Ingles, Gran Canary XXXX
Loksins eitthvað almennilegt: Stórfínn japanskur staður með glæsilegu úrvali og lifandi humrum í búri. Langbesti veitingastaðurinn á Gran Canary (sem ég fann a.m.k.) en það segir sína sögu að það var nánast tómt hér inni enda vill meirihlutinn sitt snítzel.

Mannabar, Playa del Ingles, Gran Canary 0
Þessi staður fer nú alla leið í ruglinu. Sama dót og annars staðar nema ennþá ólystugra og fullir íslendingar þegar líða tekur á enda kann þjónninn (Manuel) nokkur íslensk orð. Maður er furðulostinn að hafa ekki verið ekið í skyndingu á spítala eftir að hafa étið hérna.

El Duke, Playa del Ingles, Gran Canary X
Matseðill flestra staða á Kanarí er eins með sömu réttunum. Vínarsnítsel, hálfur kjúklingur, smokkfiskur í orlí, brasaðar franskar kartöflur, lummó og óspennandi hallæri. Það væri þannig séð hægt að hafa sama matseðilinn á þeim öllum, myndir af sömu gulnuðu réttunum. Bjakk...

Moreno II, Playa del Ingles, Gran Canary X
Matseðill flestra staða á Kanarí er eins með sömu réttunum. Vínarsnítsel, hálfur kjúklingur, smokkfiskur í orlí, brasaðar franskar kartöflur, lummó og óspennandi hallæri. Það væri þannig séð hægt að hafa sama matseðilinn á þeim öllum, myndir af sömu gulnuðu réttunum. Bjakk...

Pizza Hut Rvk X
Þessi staður er orðinn sjabbí og draslaralegur. Þjónustufólkið eins og zombís. Pítsurnar þokkalegar en alltof dýrar. Eldsmiðjan er jafn dýr en 1000sinnum betri.

Nings Rvk XXX
Peking öndin er mjög góð og á þokkalegu verði.

Nings Kóp X
Heita dótið í borðinu er bragðlaust og lélegt.

Hótel Selfoss XXX
Smellur á 14000 kall. Hótelherbergi og menu og morgunmatur innfalið á Selfossi, exótískum stað á Suðurlandi. Maturinn var fínn og hótelið ægilega flott.

Galileó XX
Ég vil byrja á að taka það fram að mér finnst ítalskur matur ekki góður, eiginlega reyni ég að forðast hann á veitingarhúsum. Mákona mín mátti ráða hvert við færum, enda búin í prófum, og hún vildi hingað. Át helming af tveim pítsum, einni með carpaggíó-hrákjöti og hin var með humri. Í dýrari kantinum og ég fann eiginlega ekkert bragð að þessu. Líklega er það eitthvað líffræðilegt vandamál hjá mér, að bragðlaukarnir á mér skilja ekki ítalskan mat. Mákonan og systir hennar voru hins vegar alveg skínandi glaðar með þessar pítsur og myndu gefa staðnum 3 eða jafnvel 4 stjörnur. Ég ræð hins vegar og gef bara 2, en þetta er líklega geggjað pleis sé fólk fyrir ítalskt.

Perlan XXX
Villiréttahlaðborð. Voða fínt. En ekkert rosalega æðislega gott miðað við hvað það kostaði. 4990 á virkum dögum, 5990 um helgar. Jæja, Ragnheiður Rist var allavega á næsta borði að skemmta einhverjum útlendingum. Þjónarnir óðir og uppvægir í að hjálpa manni. En þessi snúningur... Ég veit það ekki. Er ekki hægt að hægja á þessu? Lufsunni var byrjað að svima. Maður varð að stara oní matinn til að fá ekki æluna í hálsinn.

Mekong X
Mörgum finnst þetta fínn staður en ég mér var umsvifalaust refsað fyrir að halda fram hjá Krúa Thai, sem ég hef sannfærst endanlega um að er langbesti thai staður landins. Hér er allt miklu dýrarar og miklu verra. 3 örsmáar vorrúllur á 810 kall, þokkalegur kókóskjúklingur (samt bragðlaus og slappur) og svo viðbjóðsleg rækjufóstur í brúnuvatni. (auglýst sem "kjúklingur í sætri sósu"). Sleppi þessum stað framvegis.

Sowieso XXX
Í menningarsjoppunni Iðu er þessi ágæti sushistaður. Ekkert spes en alveg í góðu lagi enda sushi rokk og ról.

Thank God it's Friday XXXX
Eftir viðamikla úttekt á hamborgastöðum í Rvk hef ég komist að kjarna málsins: besta bandaríkja stöffið er á TGIF. Hver réttur er vætlandi í bragðlaukalokkandi eðalinnihaldi sem gerir dýrin sem dóu fyrir máltíðina að Guðum. Ég er sökker fyrir þessum stað, frábærum matnum, góðri þjónustunni og ágætu verðinu, sérstaklega í hádegi virkra daga. Ég og þessi staður fórum kannski öfugu megin fram úr í byrjun (sjá dóm að neðan), en hann hefur svo sannarlega unnið sig upp í áliti síðan. Til staðfestingar kaus ég að eyða afmælinu mínu hér og voru afmælisgestir algjörlega sammála að hér væri einfaldlega mest jömmí stuðfæði á landinu. Ég fæ vatn í munnin bara við að nefna það: TGIF! TGIF! TGIF! Slef...

Krúa thai, Tryggvagötu 14 XXXX
Þetta er einfalt: Krúa Thai er besti tælenski teikavei staður landsins. Réttirnir smakkast eins og á rándýru veitingarhúsi en verðið er eins og á lélegasta teik aveipleisi (flest allt undir 1000 kall). Frábært!

Fylgifiskar XXXX
Þeir gera það ómögulega: Allur fiskur er ógeðslega góður hjá þeim. Hér tekurðu fiskinn með heim, en getur líka étið á staðnum. Framúrskarandi fiskistöff.

Tapas XXXX(04.09.04)
Spennandi 50 rétta tapas-matseðill og allt frábært eða gott sem við sömpluðum. Eini neikvæði punkturinn er að þessi staður er vinsæll hjá saumaklúbbskerlingum og því má bóka að maður lendir í hífuðum dömum sem baula eins og yxna beljur á næsta borði. Og svo er til önnur spænsk tónlist en moðerfokking Gipsy Kings.

Na Na Thai XXX(07.08.04)
Í mjög fráhrindandi umhverfi í Skeifunni svo ég tók með heim. Gott en nokkuð dýrara en á stöðum eins og Krúa Thai og Mekong. Ekki það mikið betra að maður tými mismuninum. Hér eru víst sömu eigendur og Ban Thai á ferðinni.

Hótel Holt XXX (04.08.04)
Löngum fínasta pleis landsins (ásamt Grillinu). Leðurklædd koníaksstofan er góð í mikilvæga fundi og til að taka viðtöl. Þetta var þó frumraun mín á veitingastaðnum. Ég fór í hádeginu en þá er 3 réttað á 2600 kall (og 2 réttað á 1900 kall). Hægt var að velja um 4 for- og aðalrétti en eftirrétturinn er alltaf sá sami. Fékk mér naut í forr. Ekkert sérstakt en meðlætið gott. Grís í aðalr. Fremur nískulega útlátið og ekkert spes. Eftirr var krem brúlé sem var ókei en enn of aftur ekkert spes. Kannski gerir maður e-h ofurnáttúrlegar kröfur á svona stað, ég veit það ekki. Ágætt svo sem allt saman en ég myndi aldrei tíma að éta þarna á öðrum tíma en í hádeginu. Þar fyrir utan er maturinn settur upp eins og mínímalísk innsetningar, sem er leiðindi og eitthvað svo 90s. En þá er maður allavega búinn að fara á Holtið.

Hafið bláa við ósa Ölfusár XXXX (14.07.04)
Snilldarstaður með glæsilegu útsýni. Frábær matur og hverrar krónu virði. Fiskistaður á heimsmælikvarða.

Menam, Selfossi XX(13.07.04)
Nokkuð dýrara en á sæmbærilegum thai-stöðum í bænum og að auki boðið upp á hamborgara o.s.frv. Át í hádeginu og thai-ið var full hveitikennt og bragðlaust – ekki það að ég hafi leyft einhverju samt! Þarf að tékka á penang og massman kjúklingi, sem ku gott stöff...

Rauða húsið, Eyrabakka XXX(11.07.04)
Notalegt og smakkaðist vel. Í dýrara kantinum, en humar er víst gull.

Galbi, Rvk XXX (06.07.04)
Kóreanískt grill í leiðinlegu hverfi. Maður steikir matinn sjálfur og smyr sósum á og treður í kálblað. Bragðast ágætlega en leiðinlegt að standa í steikingum sjálfur. Það er borið í mann þar til maður er saddur, skammturinn kostar 2900 kr á mann. Veitingarhúsið er gífurlega óspennandi innréttað og ekkert Kóreanískt við það. Þjónusta góð.

La Medina du Marais, 77 Rue des Gravilliers, Paris 7.8 af 10
Tjaldbúamatur, kússkúss og pottréttir. Enginn diskur í húsinu er eins. Arabarnir ynnu ef þeir færu í stríð við júðana um sigur yfir bragðlaukunum.

Chez Julien, Rue Du Pont Louis-Philippe, Paris 5.0 af 10
Frönsk matreiðsla en bjánalega dýrt og snobbað og maturinn slappur. Forðist.

Matsuri Sushi, 36 Rue de Richelieu, Paris 8.0 af 10
Sushi á færibandi. Alveg fínt, en í dýrari kantinum og maður hefur fengiða ferskara.

Le Petit Picard, 42 Rue Sainte-Croix-de-la-Bretonnerie, Paris 9.2 af 10
Fann hvergi spóa, lóu eða froskalappir en þessi franski staður var frábær engu að síður. Ódýr og maturinn glimrandi góður.

Le Pain Quotidien, 18 Rue des Archives, Paris 8.8 af 10
Hluti af morgunverðarkeðju sem má finna á nokkrum stöðum í París. Þú færð körfu fulla af munnvatnshvetjandi brauðmeti og smyrð oná ýmsum sultum, súkkulaðum og dóti sem er á borðum í kring. Geðveikt stuð og verð fínt.

Jo Goldenberg, 7 Rue des Rosiers 5.4 af 10
Kosher Gyðingarestaurant sem varð fyrir hríðskotaárás 1982 þegar 6 voru drepnir af aröbum. Langaði að smakka þetta kosherdót og niðurstaðan er sú að kosher er rusl. Maturinn bragðlaus eða í mesta lagi súr og slepjulegur eins og matreiðslan felist í því að allt sé fortuggið. Fengum 8-rétta for-smakk þar sem hver rétturinn var verri en sá fyrri og sumt beinlínis viðbjóðslegt og svo kom þokkaleg bortsch súpa (of sæt) og úngverskt gúllas sem maður gæti hafa fengið hjá mömmu sinni. Staðurinn fær þó ekki algjöra falleinkun því vissulega var ákveðin exótík í því að éta þarna.

Safran, 13 Rue de la Harpe, Paris 6.0 af 10
Fremur hefðbundinn indverskur staður. Þokkalegt.

Hamborgara-búllan 9.0 af 10 (29.04.04)
Hamborgaralegendið Tommi með hamborgarabúllu sem er ekkert að tvínóna við þetta heldur skellir fram einni tegund af hamborgara og frönskum sem rokka feitt í maga sérhvers manns. Ekkert kjaftæði. Kaffi og sjeikar til sex skilst mér. Hefði verið í lagi að geta fengið það á kvöldin líka.

Burger King, Smáralind 6.6 af 10 (27.03.04)
Blessaður vertu, Burger King er alveg ágætis stöff. Boðið er upp á borgara sem eru einhvers staðar mitt á milli viðbjóðsins hjá McDonald og alvöru borgara hjá TGIF, RT, Grillhúsinu og HRC og er verðið í fullu samræmi við gæðin, þ.e. mér sýndist þetta kosta mitt á milli. Oftast er maður nú í meiri fíling fyrir alvöru borgara, en stundum vill maður bara subbulegan viðbjóð eins og McD er með. Ég held manni langi einna síst í eitthvað sem er þarna mitt á milli og því eflaust langt í að maður eigi erindi á BK aftur. Alltílagi snarl þó séu menn á hraðferð í Smáralind.

Perlan, 4hæð, Rvk 2.2 af 10 (11.02.04)
BSÍ eða Eden stemming með gömlu bakkelsi, kekkjóttri hveitisúpu og ellidauðri rækjusnyttu sem lyktaði eins og atvinnutæki gamallar portkonu. Ét ekki þarna aftur.

Humarhúsið, Rvk 9.2 af 10 (05.02.04)
Humar. Lítur út eins og stækkað skordýr en smakkast eins og fullnæging. Mmm. Humarhúsið reytir af sér humarinn og manni stendur af gleði. Eftirrétturinn "3xSúkkulaði" hræðilega góður. Kom út fullnægður af mat. Topppleis.

Lækjarbrekka, Rvk 7.2 af 10 (05.01.04)
Vinalegt dúkkuhús með kósí fíling. Skrautkenndur matur sem "lúkkar" vel. Humarsúpa æði, nautalund full sölt, mokka creme brule ókei. Verð full hátt. Fínt pleis til að monta sig við deitið – þeas ef maður splæsir.

Síam, Hafnarfirði 8.8 af 10 (10.09.03)
Tælandi tælenskt á spottprís í úldnu verksmiðjuhverfi í Hafnarfirði. Virkilega öndvegis og svaka fínt! Einar Bárðarson keyrir að sögn sérstaklega úr Grafarvogi til að fá sér "Himneskt nautakjöt", en allt hitt sem við sömpluðum var dúndur fínt. Massa.

Café Bleu, Kringlan 7.5 af 10 (10.07.03)
Hlaðborð í hádeginu: Þokkalegt alveg og ódýrt miðað við það sem gengur og gerist. Brokkolísúpan var best.

Hereford, Rvk 7.5 af 10 (04.07.03)
Steikhús á Laugarvegi. Dálítið skemmtilegt sistem í pöntun, maður skrifar bara á miða hvað maður vill éta. Gerði þau mistök að fá T-bón steikina medium rare sem var alltof rare svo maður var að jarma á blóðugum kjöttægjum og gat ekki tuggið slatta af steikinni eins og maður væri einhver tannlaus amma. Engu að síður klassastaður en ég er kannski bara ekki svo mikill kjöttægjukarl þegar allt er á botninn hvolft.

Culiacan, Rvk 7.0 af 10 (28.06.03)
Enn einn mexikanski skyndibitastaðurinn í bænum. Þessi á það sameiginlegt með Serrano og Mamas tacos að vera ódýr, góður og maður fær magafylli og vel það. Þessi er nútímalegastur í innréttingum, sem skiptir nú kannski engu máli.

Steikhús Selfoss 6.5 af 10 (22.06.03)
Gott viðmót (annað erfitt, vorum einir þarna). Þokkaleg búlla í bláum kofa í hliðargötu við aðalgötuna. Útlit í late 80s anda og á matseðli bæði borgarar og dýrari fæða. Verð í miðkantinum. Borgarar með frönskum og sósu og salati um 1000 kallinn. Keypti ostaborgara með "kántrí frönskum". Þokkalegt alveg. Brauðið þó þurrt og ostar ekkert sérstaklega að tala saman. Langt í frá eins gott og það besta í Reykjavík city, en ágætt á landsbyggðarstandardi - t.d. mun betra en jukkið í þjóðvegasjoppunum.

Fjöruborðið, Stokkseyri 8.5 af 10
Hér snýst allt um humar. Humarsúpa, humar með dóti og svo kaka og kaffi. Við Lufsan vorum sprengd í loft upp í svaka veislu og nenntum varla að keyra heim. Gerðu nú vel við elskuna og bjóddenni í humar. Humar er humar.

Serrano, Kringlunni 7.8 af 10
Þessi staður er þar sem Poppæs var og bíður upp á mexíkanskan (mér dettur ekki í hug að segja mexi"kóskan") skyndibita, nokkuð góðan. Maður velur úr borði hvað maður vill inn í börrítóið eða það sem maður pantar og minnir þessi aðferð mig á það þegar ég smakkaði mexikanskan mat í fyrsta skipti. Þá fórum við liðsmenn Bless á tex-mex búllu í San Fransisco og átum börrító. Vissum ekki neitt hvað var í gangi og stóðum á gati yfir því hvað var í gangi, virkilega sveitó. Sem betur far var einhver með okkur sem gat sagt okkur til. Sósan hjá Serrano mætti nú vera sterkari og alls ekki fá ykkur mjúkar taco-skeljar; sá skammtur er ekki upp í aðra nösina á ketti. Börrítóið er fínt, bæði með kjúkling og nautahakki, og líklega grænmeti líka.

Duus-hús, Kef 7.6 af 10
Fínt slísfúdd á ókei verði. Fínt útsýni yfir dráttarbrautina víðsfrægu. Myndalegar og almennilegar pæjur á vakt. Dús-hús rúls!

Potturinn & Pannan, Rvk  8.2 af 10
Það er rosafínt hlaðborð í hádeginu á þessum ævaforna stað. Jömmígott salatborð, súpa og svo hinir ýmsu heitir réttir. Fyllir magann af góðmeti. Þeir þarna virðast þó í einhverjum sætra kartaflna-gír og sætum kartöflum er bætt í flesta rétti. Þar sem ég gleymdi sætri kartöflu í potti og mauksauð hana um daginn hef ég komið mér upp óþoli í garð s.k. og fúlsa við slíkri fæðu í dag. En skítt með það, sé hlaðborð í hádeginu málið er Po&Pa tálið og brjálið.

Heitt og kalt, Rvk  8.1 af 10
Skil reyndar ekki hvað allir þessir staðir eru að gera á hinum forljóta Grensásvegi, en þessi er þar sem Pízzahúsið var áður. Svona tapaz dæmi í gangi og allt í hlaðborðsstemmingu. Mar fær altso að éta á sig gat fyrir 1390, eða getur einskorðað sig við súpa/salatborð etc ef mar er að spara. Slappt samt að kaffi og eftirréttir fylgi ekki með 1390kallinum. Nú nú: Súpa og salatborð var alveg gasalega gott, framandi og spennandi og mar getur auðveldlega étið á sig 3 göt í því. Heitur matur var ekkert spes, en ókei. Ætla bara að fá mér súpu og salatborð næst. Heitt og kalt er fínt pleis og ég fer örugglega þangað aftur!

Banthai v.2 8.0 af 10
Var dreginn aftur á Banthai þrátt fyrir hótanir mínar hér að neðan. Fékk loksins mat og hann var fínn. Veiiii.

Austur Indía félagið, Rvk 10 af 10
Jamms - toppnum náð. A-I-F er einfaldlega toppurinn á matarmenningu landsins og hjálpast þar allt að: lipur og prófessjónal servis, notalegt andrúmsloft, ágætt verð og síðast en ekki síst stórkostlegur maturinn. Allt af matseðli er dúndur en fyrir magnaðasta matinn mæli ég með rétti #20 í aðalrétt, sem er kjúklingur sem hefur verið nuddaður í mánuð af súmóglímumanni svo meyr er hann. Gumsið með er til enn frekari fullnægju. Einnig: #27: lamb sem hefur legið undir valtara svo meyrt er það og rann niður eins og rjómaís. Í forrétt var eitthvað í grænni sósu sem gerði allt til að æsa mann upp. Það eina neikvæða sem ég get týnt til er að á salerni voru engar pappírsþurrkur, en þrátt fyrir svoleiðis pínöts má alveg slengja 10 á pleisið. Þetta er einfaldlega besti matsölustaður landsins og stendur sig alltaf 100%. Húrra!

Matstofan (aka Dússabar), Borgarnesi 8.6 af 10
Hér ræður Dússi ríkjum, gamall kall með hækju, og hefur auga með öllu. Honum til aðstoðar er líklega filippönsk kona hans ásamt fjölskyldu. Staðurinn er inni í bænum, nálægt hótelinu og höfninni. Gengið er inn í fremur hrörlegan skúr og blasir þá konungshöll Dússa við, flott sveitalúkk á öllu, og maður þarf ekki gífurlega mikið hugmyndaflug til að byrja að ímynda sér að maður sé kominn til útlanda. Á veggjum málverkasýning naiv-listamanns og frískandi fituilmur í lofti. Á matseðli bæði filippínskir réttir og vestænir - stundum blandað saman (Jolly burger / Pinoy burger o.s.frv.). Smakkaðist allt vel en vart varð þó við töluverða bragðleysu. Þú ert ga ga ef þú ferð á Borgarnes án þess að heimsækja þennan akfína stað.

Vivaldi, Borgarnesi 7.0 af 10
Þegar Hyrnan er full af æpandi unglingum ("prumpukarlinn prumpukarlinn"), grenjandi smákrökkum og ófrýnilegum ferðalöngum er mun betri kostur að tylla sér á Vivaldi sem er í nýju lengjunni þarna beint á móti Hyrnuhelvítinu. Þetta er nett börgerbúlla með lekker-yfirbragði, eilítið karakterslaus og þjónustan var reidd fram af áhugalausri unglingsstelpu sem ætti nú bara að vera heima hjá sér. Matur kom á viðunandi tíma (12 mín) og smakkaðist vel. Klínt var í sig BBQ-borgara sem gaf slíkum borger í borginni lítið sem ekkert eftir. Vivaldi fyrir vandláta en Hyrnan fyrir hyskið.

Þakka þér Guð að það er föstudagur, Smáralind, Kóp 5.8 af 10
Loksins þegar maður fékk sæti á þessum plebbastað reyndist það svo sem sæmileg upplifun, en enn og aftur verð ég í sömu andrá að benda á yfirburði Grillhússins þegar djönkfúdd er annars vegar. Át eitthvað sull sem ég er búinn að gleyma hvað var (það var ekki eftirminnilegra en það), en ég man að þjónustan var vangefin. Það var td ekki búið að taka diskana undan forréttunum þegar aðalrétturinn mætti og því var maður þarna slafrandi í sig ruglinu með allt vaðandi í skítugum diskum fyrir framan sig. Sérlega óprófessjónal. Sé ekki ástæðu til að fara þarna aftur.

Kaffisetrið, Hlemmi 7.9 af 10
Vel útilátinn og góður tælenskur matur á hagstæðu verði. Gullmoli í skarni Hlemms.

Si Senor, Rvk 4.6 af 10
Það er nú ekki mikið mál að búa til mexikóskan mat en þessi búlla klikkaði á því. Forréttur illa útilátinn og bragðslappur - salat ekkert spes og "mild mangósósa" reyndist vera sætt chili. Ekki alveg að gera sig þessi staður og þar að auki alltof dýr miðað við gæði matarins. Læt hann eiga sig í framtíðinni.

Goonk Gink - Dried Tom Yum Flavour 7.4 af 10

Þegar hart er í ári er gott að vita af Sælkerabúðinni á Suðurlandsbraut sem Hr. Nings rekur af myndarskap. Þar er besta úrval landsins af núðlusúpum. Tælenska Goonk Gink merkið bíður upp á ýmsar tegundir og sérhæfir sig í þunnum núðlum, eða "vermicelli" eins og við fagmennirnir köllum þær. Ef maður passar sig á að setja ekki of mikið af chili pipar út í er hægt að gera sér glaðan dag og eta heila máltíð á aðeins 70 kr sem svona núðlusúpa kostar. Tom Yum er með sítrónugras-bragði og sérlega hressandi.

Eldsmiðjan, Rvk 9.5 af 10
Þrátt fyrir að margir hafi reynt og beytt ýmsum brögðum þá fást hér einfaldlega lang bestu pizzurnar í bænum. Verð er þolanlegt miðað við gæði. Allt er jömmí jömmí fínt en ég mæli með þessum tegundum: C-pizza ostagerðarmannsins, Y-El pollo loco (með kjúklingi og hnetum) og Æ-Pizza alle lumache (með sniglum).

Pizza Hut, Rvk 6.9 af 10
Mikill og yndæll "hvítt hyski" blær hvílir á þessari sjoppu. Spikfeitar konur í hlýrabolum reykja yfir ljótum krökkum á meðan öll fjölskyldan raðar í sig feitum réttum. Salatbarinn slappur. Pizzur alveg þokkalegar, en toppurinn er ísbarinn, en um þessar stundir bíðst hann frír með og þá leggst hyskið því sem næst með kjaftana undir ísdæluna og lætur gossa. Alveg þokkalegur matur í alla kanta, en pizzur verða ekki sælgæti (nema hjá Eldsmiðjunni).

American Style, Rvk 5.4 af 10
Með auglýsingaherferðum sínum hefur þessi hamborgarabúlla skapað sér ímynd sem eitt helsta hang-out FM-hnakka. Fólk sem ég tek mark á varðandi mat hefur þó mælt með staðnum og þar hef ég etið a.m.k. 3 sinnum. Aldrei hef ég fengið borgara sem komast í hálfkvist við það sem Grillhús Guðmundar bíður upp á og því skil ég ekki hvað ég er alltaf að fara þarna! Síðast var hamborgarabrauðið gamalt og kalt og ég og jökkið inn í vorum bara ekki að tala saman. Þessi staður minnir mig helst á hinn goðsagnakennda Staðarskála, sem hefur það framyfir að vera út í sveit. FM-hnakkarnir mega því eiga staðinn mín vegna og jappla á sínum fúnu hamborgurum.

Greifinn, Akureyri 8.4 af 10
Allra handa restaurant með áherslu á ítalskan mat, pítsur og slíkt. Eftir lapþunna og bragðdaufa sveppasúpu kom einn besti salatbar sem ég hef smakkað á Íslandi. Stór plús. Svo kom hið ágætasta kjúklingasalat, en konan fékk sér 5-osta pítsu sem var góð. Staðurinn er frekar dýr (aðkeyrslugjald?) og er það hans helsti ókostur.

Shalimar, Rvk 6.4 af 10
Á að vera ódýr indverskur hversdagsmatur, en er í raun frekar dýr. Smakkast alveg þokkalega vel, vel kryddað og útilátið. Ágætur kostur sem kvöldverður, en staðurinn mætti vera ódýrari.

Skrúður, Hótel Saga, Rvk 4.0 af 10
Æi æi, staður sem leggur upp úr lúkkinu á matnum. Lýsisbragð af smokkfisknum í forréttnum og lítið af honum. Þó enn minna af túnfisknum, fjórar næfurþunnar sneiðar með laufblaði og einhverju pjatti. Leiðinlegt. Aðalréttur nautasteik sem leit út eins og lambakjöt og smakkaðist eins og svín. Borið fram á grænmetis-"beði". Leiðinlegt og ekki gott. Eins gott og tengdó blæddi, annars hefði einkuninn verið enn lægri.

Ruby Thuesday, Rvk 8.2 af 10
Nú á að taka sig á og því varð fyrir valinu eini rétturinn sem er merktur með fitusnauðum miða. Það var þurrkuntulegur kjúklingur en nokkuð góður engu að síður. Ruby hallar sér að stæl Hard rokk - er með amerískt beisboll drasl á veggjum og þar gaula rokkslagarar daginn út og inn. En maturinn er nokkuð góður og nokkuð jákvætt verðlag ríkir þar inni. Því er óhætt að gæða sér á jömmí bita þar.

Argentína Steikhás, Rvk9.9 af 10
Jólahlaðborðið er gjörsamlega unaðslegt og svo safaríkt að allir vessar líkamans hoppa af kæti. Ekki skemmdi fyrir stemminguna að þegar ég var þarna var margt góðra gesta. Fyrst bera að nefna Sálin hans Jóns míns sem var þarna ásamt róturum og mökum á sínu árlega jólahlaðborði. Þar sem Sálin etur er þér óhætt. Einnig viðstaddir voru Jón Ólafsson í Skífunni og Árni Vigfússon af Skjá einum, en þeir sátu á sitt hvoru borðinu og ég/við á borði á milli. Jón og Árni voru að éta úti með erlendum fjárfestum og lögfræðingunum sínum. Ég myndi segja að hápunktur kvöldsins hafi verið þegar Jón og Árni fóru að bera saman farsímana sína. Þeir létu þá hringja og voru kumpánlegir við hvorn annan... er sameining í vændum? En maturinn var svo unaðslegur að ég missti mig og er enn saddur, nú 2 dögum eftir átið. Úff.

Sticks & Sushi, Kringlunni 8.2 af 10
Sushi er Guð. Jafnvel þó maður þurfi að hanga á priki. Ég er til í að éta hráan fisk og hrísgrjónakökur í öll mál. En mikið er sushiið syndsamlega dýrt. Afhverju í helvítinu?

Te og kaffi, Smáralind, Kóp. 5.0 af 10
Ágætis lokur og kaffi og góð þjónusta en alltof fokking dýrt!

Sælkerahúsið Tex Mex, Langholtsvegi, Rvk. 7.1 af 10
Ódýrt tex mex á ísl. mælikvarða. Ágætt stöff en einum of upphitaður fílingur þó. Klósettaðstaða farin að sjúskast og Witney Houston var ekki mexikósk síðast þegar ég vissi.

Kaffitár, Kringlunni, Rvk. 5.5 af 10
Þrátt fyrir misjafnt viðmót stelpnanna verður að viðurkennast að besta kaffi landsins fæst hjá Kaffitári. Beyglurnar eru þó vafasamar -- maður þarf að setja þær saman sjálfur. Daman gleymdi nú reyndar að setja frönsku spægipulsuna með á diskinn og baðst ekki afsökunar á því forkastanlega áhugaleysi þegar til hennar var leitað eftir pulsu. Fátt er eins leiðinlegt og áhugalausir krakkahálfvitar í framreiðslustörfum og því fær Kaffitár ekki nema 5.5 fyrir að hafa svona pakk í vinnu.

Hlölla-bátar, Rvk.  7 af 10
Hlölli er góður vilji maður láta sósu leka á hökuna. Jömm!

This, Rvk. 8 af 10
Þetta ku vera Hlölli útfluttir til London og innfluttur aftur sem hinn árennilegi bátastaður This, sem hefur á sér erlendan blæ og stíl. Ég kom þarna rykugur um hánótt og fékk mér bát. Tvímælalaust hápuntur kvöldsins!

Popeyes, Smára, Kóp. 8.4 af 10
Þrátt fyrir skítkastið hér að neðan fór ég aftur á Popeyes og nú var allt annar standard á staðnum. Fitan lak ekki lengur af gómsætum bitunum og ég var sæll og saddur. Popeyes - þrímælalaust besta djönkfúdd á klakanum!

Banthai, Hlemmi.  0 af 10
Lengi hefur maður heyrt góðar sögur um þennan tælenska stað á Hlemmi. Og einu sinni fékk ég ágætis mat þarna. En ekki í gær. Nei, fjandinn hafiða, ég fékk engan mat! Ætlaði að panta borð, hringdi og hringdi, en númerið var alltaf "utan þjónustusvæðis". Við mættum því bara. Allt fullt á neðri hæðinni. Lítill sveittur og stressaður karl sagði okkur bara að fara upp. Þar var nóg pláss, borð og stólar, allt þó frekar hrörlegt og slísí. Ókei, við hefðum getað sagt okkur það strax og komið okkur út, en fyrst verið var að bjóða manni sæti hélt maður að þetta yrði í lagi. Stelpa sem hafði setið á næsta borði með kærastunum sínum var allt í einu komin í þjónustuhlutverk. Mætti með matseðilinn eftir 20 mínútur. Næst kom hún með vatnið eftir aðrar 20 mínútur. "Takk fyrir að bíða," sagði hún, en ekki "afsakið biðina". "Það er dálítið mikið að gera á neðri hæðinni", bætti hún við eins og það væri einhver afsökun. Gengur neðri hæðin fyrir og hvað er þá efri hæðin eiginlega? Eitthvað bónusfarrými? Ekki sýndist mér það á verðunum. Þegar við vorum búin að bíða eftir forréttinum í 40 mínútur nenntum við þessu ekki lengur og fórum glorhungruð og fúl. Af hverju var okkur ekki bara sagt að það væri ekki pláss fyrst það var ekki mannskapur til að sjá um lágmarks þjónustu? Ég held að eigendur Banthai ættu að hugsa aðeins minna um að græða peninga og reyna að bjóða upp á sómasamlega þjónustu. Banthai er drullupleis. Ég fer aldrei þangað aftur.

Nings, Rvk.  6 af 10
Frekar svona upphitaður fílingur þarna. Ókei í hófi. Næs afgreiðslufólk og mjög fljótur servis.

Mekong, Rvk.  7 af 10
Ég hef trú á að þessi staður sé ókei. Þetta er tælenskur staður og ekkert nema karlar í rassaskorubuxum sem eru þarna í góðu tælands-stuði og svæla yfir mann eins og þeir fái borgað fyrir það. Ódýrt og bara nokkuð bragðgott, svona fínt í hádeginu-staður, en maður færi ekki á deit þarna.

Quiznos, Rvk. 6.4 af 10
Þokkalegar samlokur, ristaðar og því ekki eins slepjulegar og á Subway. Djönkfúdd í meðallagi.

Hard Rock Café, Rvk. 6 af 10
Þetta er nú bara svona og svona. Aðallega hálf naktar eldspýtur að bera matinn á borð, en samt erum við svo heppin að fá þybbnar gengilbeinur sem kunna þetta. Eldspýturnar eru með gufu í stað heila. Ha, vilduði fá skeiðar með súpunni, ó sorrí, ég kem aftur eftir 10 mínútur með skeiðar. Djönkfúddið er ókei, samt verra og verr útilátið en á Grillhúsinu (still #1). Svo rennur mér líka til rifja að sjá öll þessi flottu hljóðfæri hanga ónotuð upp á vegg og þetta beljandi rokkgaul sem er spilað lon og don þarna inni er leiðinlegt til lengdar, ég tala nú ekki um þegar eldspýturnar þurfa að syngja ammælislagið fyrir einhvern óheppinn gest.

Eldhúsið, Rvk. 7.9 af 10
Við ætluðum að fá okkur sushi af færibandinu á Eldhúsinu í Kringlunni, héldum etv að það væri eitthvað í áttina að svona stöðum í London. En nei nei, það voru ekkert nema samlokur á þessu færibandi og stöku slappir sushi bitar hixtuðu hjá eins og berklasjúklingar. Svo, við átum bara mjög góða hamborgara í staðinn. Þetta er svaka hverjir voru hvar pleis - Fjölnir hennar Mel og Tinna hans Ólafs voru þarna og ekki amalegt að slafra í sig hamborga með útsýni beint upp úr Séð og heyrt.

Sticks & Sushi, Rvk. 9.1 af 10
Við erum algjör sushi-frík og gætum étið sushi 5 sinnum í viku. Fyndið að Ísland á að heita fiskveiðiþjóð en samt er sushiíð hérna svona helvíti dýrt. Þú ættir að sleppa þessum sticks sem þessi staður er með og einbeyta þér að sushi-inu, það er oftast gott. Skil samt ekki hvað þau eru að hafa flugfiskahrogn á matseðlinum því ég hef komið þarna 4 sinnum og flugfiskahrognin hafa aldrei verið til. Í staðinn bjóða þau manni upp á loðnuhrogn. En það má þakka fyrir hreinskylnina því þau gætu auðveldlega sagt manni að loðnuhrogn væru flugfiskahrogn, því svona er maður vitlaus í hrognum (eða vitlaus í hrognunum / eða vitlaus í hrogn). Besta sushi á Íslandi!

Tveir fiskar, Rvk. 8.6 af 10
Ekki alveg eins gott og á S&S. En samt gott! Næst besti sushi-staður á Íslandi! Bara verst að þeir eru hættir með súshíið.

Austur-indía félagið, Rvk. 9.9 af 10
Ef maður er á annað borð að fara út að éta indverskt ætti maður að fá sér það hér. Ég tékkaði á þessum stað þar sem Kabarett var og það var ömurlegt. Á Austur-indía á maður í mestu vandræðum að ákveða hvað maður á að borða því allt er svo gott. Eina vonda við staðinn er nafnið - "Austur Indía félagið" - hvaða rugl er það? Ég mæli með "Karrýhúsið".

DOMINOS, Vesturbæ, Rvk. 0 af 10
Ég veit auðvitað að þetta er ekki veitingahús heldur teik avei, en ég verð samt að tjá mig pítsurnar frá þeim, svo viðbjóðslegar voru þær. Við vorum glorsoltin og höfðum nánast étið hvað sem er. Við pöntuðum tvær pítsur af matseðlinum og hentum þeim báðum eftir 2 bita. Svoleiðis gerist eiginlega aldrei! Þetta var viðbjóðslegt og ég vara við þessum stað. Þú getur alveg eins brætt kertavax oná ristabrauð og kallað það ostapítsu. Gjörðu svo vel.

NÚÐLUHÚSIÐ, Rvk. 7 af 10
Gott miðað við verð. Fínt pleis. Ódýrt og oftast bragðgott.

POPEYES, Smára, Kóp. 2.7 af 10
Ég vil taka það skýrt fram að Popeyes eru venjulega í hámarki skyndibitaiðnaðarins. Kjúklingabitar staðarins eru góðir á bragðið og bera mér sér ferskan keim frá Louisana. Í Smáranum hafa kokkarnir/krakkarnir ekki alveg fylgt leiðbeiningum á frosnum afurðum heldur dissað allt saman og gert þetta bara einhvern veginn. Útkoman voru bragðlausir bitar löðrandi í fitu og meira að segja ég gat ekki klárað einn lítinn skammt. Áður en þú étur á Poppæs næst skaltu gá hvort einhver fullorðinn sé að vinna, og þá hvort hann lítur út fyrir að vera sæmilega heilbrigður. Annars ertu í skít, nema þú fílir löðrandi fitu þess meir. Þar fyrir utan eru kjúklingabitar búnir til úr vansköpuðum dýrum og þú ert verulega viðbjóðslegur að leggja þetta þér til munns. Svona er þetta bara.

RIKKI CHAN, Smára, Kóp. 4.7 af 10
Konan var almennileg. Ég bað um 50/50 djúpsteiktar rækjur (og reyndi að gleyma myndinni sem ég sá einu sinni af rækjum að éta ýsu lifandi í neti) og núðlur. Með voru hrísgrjón og súrsæt sósa. Bragðlaust og "íslenskt". Vantaði allan kínafíling í þetta. Ekki það að ég hafi étið svona í Kína. Allavega miðað við myndina Tampopo ætti að vera meira stuð í kínamatnum í Kína (og líka í Japan). Varð saddur og kláraði af disknum. Síðast þegar ég kláraði ekki af disknum var á Sjanghæ, Laugarvegi. Enda er það eiturpleis, en Rikki er ókei.

GRILLHÚSIÐ, Rvk. 9.8 af 10
Langbesta borgarabúllan í bænum, allt er jömmí og slefandi gott og þetta pleis valtar yfir draslið sem American Stæl er með. Uppáhaldið mitt er Californía Klöbb samloka, en allt sem ég hef smakkað þarna hefur verið fínt. Frönskurnar eru góðar líka og sjeikarnir algerlega þrumuskuð. Þau eru líka sniðug þessi vegabréf sem staðurinn er með, fimmti hver hamborgari er frír. Grillhúsið mætti samt bjóða upp á banana-og-jarðhnetusmjörs-sjeika, eins og Ed's í London er með. Þá mundi Grillhúsið fá algerlega fullt hús.

Ed's, Soho, London. 6.2 af 10
Það eina virkilega góða við Ed's í London eru áðurnefndir banana-og-jarðhnetasmjörs-sjeikar. Hamborgararnir sjálfir eru ekkert til að hrópa húrra fyrir, enda kunna Tjallar ekki að búa til hamborgara og það er ekki nema von að það sé allt vaðandi í gini, klaufum og kúariðu þarna hjá þeim. En eins og ég segi: Sjeikinn er góður!