Kannski er það bara febrúar-skammdegið sem er að gera út af við mig. Ég hef allavega fundið fyrir leiða þegar ég gerist svo djarfur að horfa á fréttirnar. Alltaf þessi sömu smetti á þessu gamla þreytta stjórnmálagengi. Gamalkunnugir kjammar að röfla um gamalkunnug efni -- alltaf sama helvítis röflið og leiðindin. Allt á sömu bækurnar lagt, aldrei brugðið út af þeirri trú á pólitískan sannleika sem þetta fólk er búið að koma sér upp. Aldrei spurt spurninga sem skipta máli, heldur endalaust tönglast á smámálum sem enginn nennir að pæla í eftir viku. Endalaust verið að tuða um ekki neitt en samt reynt að æsa þjóðina upp í einhvern ham. Fyrst áttu allir að hafa skoðun á réttindamálum öryrkja og hæstarétti. Nú á maður að mynda sér skoðun um flugvöll eða hvort Júróvisjón megi vera á ensku. Æi, fokk itt.
Menntaskólinn Ísland
Mér finnst stundum eins og ég sé ennþá
í menntaskóla. Þar fór allt leiðinlegasta
liðið í félagsstörf og bauð sig fram til
formanns eða í allskonar nefndir og ráð. Almennilegt
fólk með heilbrigð áhugamál hafði nóg
annað að gera en að standa í þessu félagsmálabulli.
Eintómum ösnum með lélega sjálfsmynd datt
í hug að reyna að gerast formenn skólafélagsins.
Svo var klínt upp á mann kosningum ár eftir ár.
Leiðindapúkarnir í framboði komu í stofurnar
og röfluðu eintóm leiðindi og bulluðu eitthvað
sem fór inn um eitt og beint út um annað. Ég man
lítið eftir þessu kosningastússi nema helst árið
sem fatlaði strákurinn bauð sig fram á móti
sæta stráknum. Sá fatlaði var allur geiflaður
í framan og staulaðist um með lappirnar í kross.
Sá sæti var svona alveg eins og sætu strákarnir
í amerískum unglingamyndum. Ég man eftir stelpunum
sem ég var með í bekk að velta þessu heimspekivandamáli
fyrir sér: "Sá fatlaði á náttúrlega
að vinna siðferðilega séð -- hann yrði svo glaður
og svona -- en við getum samt ekki verið þekkt fyrir að
láta svona stórfatlaðann mann vera andlit skólans
út á við."
Svona pældu stelpurnar í frímínútum
en sá sæti rúllaði kosningunum auðvitað
upp og var fastur liður í myndasyrpu skólablaðsins:
Gummi formaður heldur ræðu, Gummi borðar snúð
í frímínútum, Gummi formaður í sleik
við Siggu sport á skólaballi.
Maður var ekki var við þessa formenn nema þessa
fáu daga sem þeir voru að snapa sér atkvæði
og svo í skólablaðinu. Maður fór í
gegnum skólann án þess að leiðindapúkunum
kæmi það mikið við eða höfðu eitthvað
um það að segja.
Svo útskrifast maður og gengur í skóla lífsins,
eins og það heitir. Þar er leiðindaliðið úr
menntó orðið aðeins merkilegri formenn, er búið
að vinna sig upp hjá einhverjum lummulegum stjórnmálaflokki
út í bæ og er loksins komið í alvöru
stjórnmál og farið að reyna að hlutast til um
líf okkar. Það hefur ekki ennþá fundið
sér heilbrigð áhugamál og hefur ákveðið
að gerast stjórnmálamenn af því það
er svo afskiptasamt og með lélega sjálfsmynd. Á
sama hátt og þetta lið úr menntó kom manni
ekki við, koma stjórnmálamenn manni ekki við. Maður
útskrifast í gröfina og sólin rís á
morgun án þess að þessir leiðindapúkar
hafi eitthvað um það að segja.
Fólk vill ekki stífa fýlupoka
"Ég er að þessu af heilum hug fyrir þjóð
mína," fullyrða stjórnmálamenn, en allir vita
að þeir eru að þessu fyrir sjálfa sig og helstu
vini. Enginn trúir því þessari fyllyrðingu
nema kannski þegar Guðni Ágústsson segir hana.
Hann er nefnilega svo álkulegur að honum hlýtur að
vera alvara. Guðni er jafn álkulegur og venjulegt fólk.
Fólk finnur því samhug með honum og hann mun ná
langt. Guðna sem varaformann, já strax!
Guðni er gott dæmi um hressann stjórnmálamann
sem þjóðin kann vel við. Stjórnmálamenn
eru alltof oft of stífir, a.m.k. í sjónvarpinu. Þeir
halda að þjóðin vilji að þeir séu
stífir, að stífnin þýði trúverðugleiki
og festa, en dæmin sína auðvitað annað. Þegar
Ingibjörg féll í öngvit stífnaði Össur
upp og varð stífari en allt sem stíft er -- og hann sem
var alltaf svo hress. Daginn eftir vildi enginn þennan stífa
karl lengur. Halldór Ásgrímsson er alltaf svaka stífur.
Hann er á svipinn eins og hann sé með opið klóak
fyrir framan sig og talar eins og hann sé að herma eftir loðfíl.
Ég veit samt að Halldór getur verið hress. Á
sunnudagskvöldið síðasta var hann að kaupa fjölskyldupakka
á Kentucky Fried Chicken og geislaði af stuði í selskinnsjakkanum
sínum, enda guðslifandi feginn að vera nýkominn úr
hundleiðinlegum umræðuþætti í sjónvarpinu.
Svona eiga bændur að vera, hugsaði ég, og var næstum
búinn að skrá mig í Framsókn.
Öll dæmi sýna að fólk vill hressa stjórnmálamenn,
ekki stífa fýlupoka. Bill Clinton var alltaf í stuði
og svaka vinsæll, allir vildu Steingrím Hermannsson af því
að hann var svo mannlegur og hress og vinsældir Steingríms
Joð eru komnar til af því hann er frekar hress og að
auki einstaklega gáfulegur, eins og allir menn með rauða
hárkraga. Ef liðsmenn VG væru almennt hressari færi
fylgið enn hærra hjá þeim. Það hrapar
þegar Kolbrún og kerlingin sem vill hækka tóbakið
skjótast fram og eru svo reiðar að maður verður
lafhræddur; í hvert skipti sem dyrabjallan hringir dagana
eftir að þær hafa fengið að tjá sig í
sjónvarpinu býst maður annað hvort við Kollu
að skamma mann fyrir að vera saurlífisseggur eða kerlingunni
sem vill hækka tóbakið að banna manni að reykja.
Sjáið bara hvernig þetta er hjá Davíð:
Hann er búinn að segja okkur fimm aura brandara í tuttugu
ár og ennþá tístir í okkur. Það
tístir a.m.k. í okkur á meðan hann fær ekki
fýluköst og dregur flóttalegu vinina sína fram
á leiksviðið til að styðja við bakið á
sér í fýlunni. Þá hættir að
tísta í flestum, margir verða hræddir og sumir
fara að grenja, enda ekki að furða, þessi æsingur
í þeim getur verið furðu geggjaður.
Stjórnmálabox í beinni
Stjórnmálafólk er stundum að kvarta yfir því
að ungt fólk nenni ekki að pæla í stjórnmálum.
Hvers vegna ætti ungt fólk að nenna því þegar
nokkurn veginn allt annað í lífinu er skemmtilegra og
áhugaverðara? Eru fyrirmyndirnar svona eftirsóknarverðar?
Er það eftirsóknarvert hlutskipti að enda sem rauðþrútinn
karl með risvandamál, hjartabilun á næsta leiti
og forljótt bindi, eða sem fýld miðaldra kona með
klunnalega skartgripi í Silfri Egils nöldrandi yfir einhverjum
leiðindum? Ég er eiginlega alveg hættur að nenna að
glápa á þetta hjá honum Agli, er löngu
búin að sjá hvernig skemmtiatriðið endar og það
endar alltaf eins. Til að slá fjölmargar flugur í
einu höggi sting ég því upp á að olympískt
box verði leyft og í stað þess að fólk
röfli og rífist og enginn vinni og ekkert gerist, þá
útkljái stjórnmálamenn og aðrir sín
deilumál í boxhring í Silfri Egils. Þá
gætu t.d. Davíð og Jón Ólafsson slegist
eins og menn í stað þess að gera sig breiða sitt
í hvoru horninu, Mörður gæti boxað við popparalandsliðið
og Árni Johnsen og Helgi Hjörvar gætu tuskast út
af þessum flugvelli. Brátt yrðu stjórnmál
það heitasta hjá unga fólkinu og landinu væri
borgið.
PS. Muna að vera hress.