Dauðinn er það eina réttláta við lífið. Hann valtar yfir okkur öll á endanum. Það sleppur enginn. Kára og kó tekst kannski að lengja aðeins í lífinu og kannski getum við orðið jafn gömul og skjaldbökur einn daginn. Vellauðugur en gamall olíukarl í Texas var mikið að spá í þessu í sjónvarpinu nýlega og var vongóður um að tóra lengi enn með hjálp nýjustu tækni. Hann ætlaði aðallega að nota bónuslífið til að græða meiri peninga og gefa sér tíma til að lesa blöðin. Karl greyið.
Ekkert svar
Eftir að besta myndin af okkur hefur birst í Mogganum við
hliðina á sorgmæddri steypu frá ættingjum
og vinum veit enginn hvað gerist. Þrátt fyrir að mannskepnan
sé alltaf að verða "vitrari" á öllum sviðum
hefur ekkert af viti komið út úr rannsóknum á
dauðanum. Í upphafi aldarinnar var spíritisminn mikið
í umræðunni og þeir sem mest voru á kafi
í þeim fræðum þóttust vissir um að
svarið við dauðaspurningunni myndi birtast fyrr eða síðar,
og alveg örugglega áður en öldin væri öll.
Útfrymi lufsuðust út úr miðlum, þeir
fengu hin og þessi skilaboð frá fólki að handan
og borð og stólar flugu um í íbúðum.
Þetta átti að sanna með óyggjandi hætti
að dauðinn væri ekki endalokin. Galdrakarlinn Houdini var
mikið á móti þessu öllu og sannaði að
allir miðlar væru svikarar með því að framkvæma
nákvæmlega það sama og þeir höfðu
gert.
Í dag ber ekki mikið á spíritsmanum þó
fólk hafi vafalítið enn mikinn áhuga á
málinu. Stundum heyrir maður sögur um vondar afleiðingar
andaglas (allt innanstokks fer á flug) og nokkrir miðlar eru
Séð og heyrt-tækar stjörnur og færa skilaboð
að handan. Ég get ekki sagt til um það hvort þeir
séu snargeðveikir eða með einhverja hæfileika
sem ekki öllum eru gefnir. Ég hef engar sögur að segja
af sjálfum mér hvað dulrænum fyrirbærum viðkemur
og hef aldrei upplifað neitt yfirnáttúrulegt. Ég
get þó sagt eina sögu af systur minni.
Jónas í glasinu
Hún var táningur og vann úti í Danmörku
með vinkonum sínum snemma á 8. áratuginum. Andaglas
þótti góð dægradvöl á þessum
tíma og vinkonurnar sátu léttklæddar á
gærum í hálfrökkri á Sjálandi og
spurðu glasið. Nú kom vinnufélagi pabba og fjölskylduvinur
í glasið. Hann hét Jónas og bjó einn í
litlu húsi sem nú er búið að rífa.
Hann sagði stelpunum með glasinu að hætta þessu
undir eins, því þær ættu ekki að vera
að fikta við þessa hluti. Systur minni brá auðvitað
rosalega því síðast þegar hún vissi
var Jónas sprelllifandi. Stelpurnur hættu kuklinu snarlega
og þegar systir mín fékk næst bréf frá
Íslandi kom í ljós að Jónas hafði nýlega
stytt sér aldur.
Þetta finnst mér nokkuð merkileg saga og hún
er eina "sönnun" mín fyrir framhaldslífi. Maður
hefur oft heyrt að sjálfsmorðingjar lendi "á milli
vídda" og ég skil Jónas vel að álpast í
andaheimum alla leið til Sjálands til að koma í glasið
hjá léttklæddum táningsstelpum.
Sennilegast ormafæði
Svo kemur að því; ég læt lífið,
dey, gef upp öndina, hverf yfir móðuna miklu, drepst. Ég
hef auðvitað ekki hugmynd um hvað gerist, en vona það
besta. Ég neita því ekki að gaman yrði að
halda áfram í einhverju formi, en ég býst ekki
við því. Sennilegast finnst mér að ég
verði ormafæða. Seinna yrði ég svo mold og þá
myndu kannski fíflar vaxa upp af mér. Ég sætti
mig alveg við þetta en samt finnst mér hræðileg
sú tilhugsun að vakna í gröfinni og kafna þar
í skelfingu. Svo eru leiði líka eyðsla á plássi
og greftrun mengandi. Vissir þú að um 7 tonn af járni
eru jörðuð á hverju ári á Íslandi?
Hér er ég að tala um hankana á kistunum og krossana.
Af hverju er fólk ekki frekar jarðað lóðrétt
og án kistu? Ég get ekki séð að í því
felist einhver óvirðing.
Hálf skúringafata
Ríkið býður upp á aðra möguleika.
Ég get ánafnað Háskóla Íslands líkama
minn. Þó það sé skemmtileg tilhugsun að
enda kannski sem beinagrind í kennslustofu -- gaman að vera
innan um unga fólkið og svona -- er það verri tilhugsun
að láta upprennandi kryfjara æfa sig á sér.
Ekki að ég sé spéhræddur við að
nemarnir sjái á mér typpið; nei, ég er
bara hræddur um að vakna í miðjum klíðum
með innylfin hangandi úti og að mitt alsíðasta
andvarp verði fyrir framan æpandi kryfjarakrakka.
Ég vil því láta brenna mig til að fyrirbyggja
öll leiðindi. Ef svo illa vill til að ég vakna í
ofninum get ég huggað mig við að ég mun ekki
kveljast lengi því hitinn verður eitthvað um 800 gráður.
Eftir þessa meðferð verð ég og trékistan
runnin saman í 2.5 - 3 kg af ösku -- svona eins og hálf
skúringafata. Í öskuhrúgunni miðri verður
málmbúturinn sem læknirinn setti í löppina
á mér þegar ég ökklabrotnaði. Ég
gef hér með leyfi fyrir að honum verði hent, eða
að brennarakarlarnir bæti honum við í makkintos-dolluna
sem þeir eru með ofan á ofninum. Ég hef það
fyrir satt að þar sé alls konar málmdót
úr fólki og útfararstjóri sem ég þekki
segir að það sé ótrúlegt hvað komi
út úr fólki þegar búið er að
brenna það.
Sturtað úr sultukrukku
Sumt fólk sem ég þekki segist drullusama um jarðaförina
sína. Það sé steindautt hvort eða er og ekki
á svæðinu. Eftirlifendur megi því gera það
sem þeir vilji við líkið. Ég er nú ekki
alveg jafn kærulaus með þetta og sé fyrir mér
að gestir í jarðarförinni minni gangi upp á
Esjuna. Sá sterkasti ber stóra sultukrukku með öskunni
í bakpoka. Þegar upp er komið myndi fólk segja
nokkra brandara, syngja nokkur hressandi lög ("Ertu þá
farinn" eftir Einar Bárðason væri viðeigandi) og síðan
væri sturtað úr krukkunni. Askan myndi fjúka út
í veður og vind -- sameinast lofti og láði svo notað
sé hátíðlegt orðalag -- og vonandi þyrlast
á þakið á flotta húsinu sem ríka
fólkið á í Kjalarnesi. Mig langar alltaf til að
sjá þarna inn þegar ég keyri framhjá en
tími ekki að borga mig inn. Svo væri mér að
meinalausu að haldið yrði áfram að sjóða
sultur í krukkuna.
En nei, þetta má ekki. Jarðaförin mín
er bönnuð með lögum! Það er bannað að
dreifa ösku dauðs manns -- trúiði því?!
Er frelsið sem allir eru að blaðra um virkilega svona? Frelsið
þýðir ekki að maður geti ráðstafað
líkinu af sjálfum sér, heldur að maður geti
skuldað pening á mismunandi hátt og fengið mismunandi
myndir framan á símann sinn. Aumt frelsi það.
Davíð Oddsson og Karl Sigurbjörnsson takið eftir!
Víðast hvar erlendis má fólk taka ösku
látins ættingja með sér heim og gera hvað sem
er við hana. Í Bandaríkjunum er það stór
iðnaður að dreifa ösku úr flugvélum og úr
bátum. Í Hollandi eru nær allir brenndir. Meira að
segja í Noregi mætti syrgjandi eiginkona taka karlinn í
nefið ef hún vildi.
En nei ó nei, ekki á eldgömlu Ísafold. Hér
verður að hola öskunni í sérstöku leirkeri
niður í sértilgerð leiði innan kirkjugarðs.
Þó maður láti afskipti Ríkissins ganga yfir
sig án þess að kveina hátt finnst mér einum
of að valdsvið þess nái út fyrir gröf
og dauða.
Ríkið bannaði þetta með kirkjugarðslögum
árið 1963. Það ber við að einkaleiði í
görðum um allan bæ hafi ekki alveg verið að gera
sig. Kirkjan vill líka halda dauðabransanum út af fyrir
sig því hann gefur vel í kassann. Einhverjar mæður
eiga líka að hafa klikkast svo gjörsamlega með dána
barnið heima að þær báru kerið út
á róló og heimtuðu að lifandi krakkarnir léku
sér við það. Er þetta ekki enn eitt sláandi
dæmið um kolklikkað fólk sem hefur vit fyrir okkur
hinum?
Kæru herrar, Davíð Oddson og Karl Sigurbjörnsson.
Viljiði gjöra svo vel að beita ykkur fyrir því
að þessum lögum verði breytt. Mér finnst Gufuneskirkjugarður
ekki fallegur staður.