Játningar vinguls
Eitt af mörgum vandamálum sem ég á við
að etja er það hvað ég er mikill vingull og sífellt
tvístígandi og á báðum áttum. Það
er alltof margt sem ég hef bara alls enga skoðun á, eða
það ég hef eina skoðun á því í
dag og aðra á morgun. Þegar ég horfi á þætti
eins og Silfur Egils er ég yfirleitt sammála síðasta
ræðumanni nema hann sé algjör hálfviti eða
Sjálfsstæðismaður. Fyrir kosningar koma menn og lofa
öllu fögru og ég ákveð yfirleitt að kjósa
þann sem lofaði einhverju síðast. Finnst allir nokkuð
frábærir og get ekki gert upp á milli. Þetta
endar stundum á því að ég sleppi því
bara að kjósa. Svona vinglast ég í gegnum lífið
fram og til baka eins og tómur poki að fjúka yfir bílastæði.
Ég er ekki eini maðurinn sem á við þetta vandamál
að etja. Skoðanakannanir sýna fram á að meirihluti
fólks skiptir um skoðun eins og nærbuxur og lætur
teyma sig á asnaeyrunum út og suður.
Engin efi hjá Hitler
En á meðan meirihlutinn vinglast eru aðrir sem eru fastir
fyrir í sinni óbilgjörnu vissu um að þeir
hafi rétt fyrir sér. Björn Bjarnason og Gunnar í
Krossinum koma upp í hugann sem staðfastir menn sem finnst þeir
alltaf hafa hinn eina sannleika með sér í liði. Án
þess að ég ætli að líkja þeim við
hann þá get ég trúað því að
Hitler hafi líka verið staðfastur karl. Hann hefur örugglega
verið hissa og sár í neðanjarðarbyrginu þegar
Rússarnir sóttu að honum og ekkert skilið í
því að ætlunarverk sitt hafi mistekist. Enginn helvítis
efi þar.
Vingulshátturinn birtist í mörgum myndum. Mér
blöskrar t.d. myndir af bandarískum hermönnum að drepa
Íraka eða Íraka að drepa Kana og skammast mín
fyrir að vera “staðfastur Íslendingur” – það hlýtur
að vera móðir allra öfugmæla! – þegar ég
sé myndir af limlestum smábörnum í þessu
ömurlega stríði. Ég er næstum því
búinn að útbúa mætmælaspjald og hlaupinn
niður á Austurvöll þegar einhver kemur í sjónvarpið
og talar svo sannfærandi um kosti stríðsins að ég
doka við, verð á báðum áttum og legg árar
í bát enda vandamálið einhvern veginn svo yfirþyrmandi
að ég kýs að leiða það hjá mér
með þeim rökum vingulsins að það skipti hvort
eð er ekki máli hvað ég geri, ég þetta
lítilfjöllega sandkorn í alheiminum.
Vinstri vinglar og hægri sigurvegarar
Oft er það þannig að þeir til vinstri eru
vinglar en hægrimenn fastir fyrir. Kannski er þetta nauðsyn
hjá vinstraliðinu af því Sovétríkin
sem þeim fannst einu sinni svo sniðug reyndust algjört krapp.
Þetta geta hægrimenn bent á og híað á
vinstraliðið. Út af hruni Sovétríkjanna þykir
það geðveiki líkast að nefna orð eins og “jöfnuð”
í dag og ekkert nema sjálfssagt að einn hafi níutíuþúsund
í laun á mánuði en annar níu milljónir.
Einn daginn snýst þetta kannski við ef kapítalisminn
kolfellur og skilur eftir sig djúpt sár. Þá
munu “sigurvegarar” dagsins í dag læðast með veggjum
og eiga erfitt uppdráttar.
Þegar á þá er híað fara vinstrimenn
jafnan í vörn og benda á að það sé
gáfumerki að geta skipt um skoðun, eða jafnvel að
það sé ekkert vinstra og hægra lengur og að
andstæðingar þeirra séu “fastir í skotgrafahernaði
kalda stríðsins”.
Og kannski er það bara “gáfumerki” að geta skipt
um skoðun. Kannski er einmitt bara málið að vera vingull.
Ég ætla allavega að gefa mér það. Og
í því ljósi og í fyrsta skipti í
langri sögu karps í íslenskum dagblöðum skrifa
ég eftirfarandi:
Páll Scheving, hinn mikli snillingur frá Vestmannaeyjum,
skrifaði mér bréf í DV á miðvikudaginn
og sýndi svart á hvítu fram á það
að ég hafði rangt fyrir mér í einhverjum "skoðana-pung”
í Fréttablaðinu fyrir nokkrum vikum. Þar bylti
ég mér fretandi og frísandi eins og naut í
flagi og sagði þá meistaralegu hugmynd að grafa göng
til Vestmannaeyja “geðveiki” og eitthvað þaðan af andstyggilegra.
Göng eru geðveik snilld
Það sér hver heilvita maður að það
að grafa göng til Vestmannaeyja er algjör snilld og gífurlega
hagkvæmt. Ég skil bara ekki hvað ég var að
hugsa þegar ég lét hafa mig út í að
opinbera vanþekkingu mína svona rosalega og móðga
þar með hið harðduglega og gullfallega fólk sem
býr í eyjunni glæsilegu sem kennd er við heima.
Þetta sýndi Páll mér fram á í
bréfinu og opnaði augu mín fyrir sannleikanum. Ég
segi því bara: Gröfum göng til Eyja sem allra fyrst
því þar liggur framtíð landsins! Ekki nóg
með að heimamenn geti á auðveldari hátt en áður
komist í land og heim til sín, heldur mun fólk af
höfuðborgarsvæðinu fjölmenna um helgar til að
skoða lundana og kvínna hans Keikó og meirihluti útlendinga
sem drattast á annað borð til landsins mun vilja heimsækja
eyjuna sígrænu og upplifa þá töfra sem þar
er að finna. Göngin eru geðveik snilldarhugmynd og fullur
af skömm og sjálfsfyrirlitningu dreg ég allt til baka
úr hinum vanhugsaða skoðanapung. Ég hef þegar
látið konuna mína lemja mig með appelsínufylltum
sokkabuxum í hegningarskyni fyrir hálfvitaganginn. Ef það
er ekki nóg get ég komið til Vestmannaeyja, gengið
hús úr húsi og beðist afsökunar. Allsber.
|