Ég finn lykt af góðæri. Það liggur í loftinu; lokkandi fyrirheit um æðislega framtíð. Það eru nokkur ár síðan að síðasta góðæri stóð yfir með 10 þúsund króna vindlum á Rex, finnskum appelsínukreistum frá Epal á 24 þúsund og búðinni Bílar og list, sem ég veit ekki ennþá út á hvað gekk. Ég skildi aldrei neitt í gamla góðærinu og það alveg sama þótt krakkar yngri en ég mættu í jakkafötum og drögtum annan hvern dag í Kastljósið og útskýrðu hvernig ætti að græða sem mest. Eitthvað endalaust flakk á Nastaq og Dew Jones var önnur mikilvægasta frétt hvers fréttatíma, en ég stóð á gati og fattaði ekki neitt eins og hver annar auli með verðtryggðu skuldarnar mínar, okurvextina og sligandi kjarleysið. En ég er auðvitað feginn núna að hafa ekkert aðhafst í braskinu því heilaþvegnir öfgamúslímar flugu á turna tvo og frænka mín tapaði 500 þúsund kalli í Kára og Decode. Flakkið á Nastaq og Dew Jones hvarf úr fréttum og það var í mesta lagi sagt frá því síðast í 10-fréttum.
Endurfjármögnun, vinur minn
En nú stefnir allt upp á við og nýja góðærið
er ólíkt hinu fyrra að því leiti að
ég skil það. Svona nokkurn veginn. Endurfjármögnun,
vinur minn, er lausnarorðið. Nú skal gömlu lélegu
okurlánunum skipt út fyrir ný lokkandi og æðsileg
lán, sem reyndar eru ennþá miklu verri en lánin
í þeim löndum sem við “helst berum okkur samanvið”,
að mér skilst. Gaurarnir sem allir hötuðu fyrir nokkrum
mánuðum af því þeir ætluðu að
skammta sér svo helvíti góð laun, eru nú
góðu karlarnir á ný, að því að
virðist. Af eintómri góðmennsku við mig og fólkið
í landinu lækkuðu þeir vextina í 4.4%, síðan
4.2% og Guð eða aðrar sambærilegar vitleysisverur vita
einar hvar þetta endar. Kannski prútta bankarnir sig neðar
og neðar þar til vextirnir verða loksins eins og í
þeim löndum sem við “helst berum okkur samanvið”. Kannski
dettur þessi heimskulega verðtrygging af og kannski líka
þetta enn heimskulegra stimpilgjald. Já, kannski maður
bíði bara þangað til með að endurfjármagna?
Nei, andskotinn. Það er lítið fútt í
því að vera síðastur. Missa kannski af veislunni
og fá ekkert nema skorpu. Nú dauðlangar mig að fara
beint til þjónustufulltrúans míns með skuldahalann
og segja honum að ég sé alveg til í að veðsetja
íbúðina upp í topp og losna við svona eins
og þrjú okurlán og láta eitt góðmennskulán
frá bankanum mínum duga. Þá borga ég
kannski 20þúsund kall minna á mánuði og
líklega verður einhver afgangur sem ég get keypt mér
finnska appelsínukreistu fyrir.
Góðu millarnir með samfélagslegu ábyrgðina
Þetta er semsé ástandið. Og í ofanálagt
hamast menn sem virðast hafa vit á þessu við að
tuða um að nú ríki offramboð á peningum.
Offramboð á peningum! Er nokkur leið önnur en að
vera bjartsýnn og ánægður? Sérstaklega þar
sem maður hefur ekkert á móti millunum í dag.
Góðu millunum með samfélagslegu ábyrgðina.
Hef séð Björgúlf á förnum vegi og maðurinn
hreinlega geislar. Ég er alveg til í að borga þessum
manni 4.2% vexti þar til ég dett niður dauður. Maður
gleymdir alveg að hann á hálft Ísland þegar
maður sér hann og manni er eiginlega alveg sama. Já já,
Björgólfur minn, hugsar maður, þú mátt
alveg eiga þetta allt saman, viltu ekki bara verða forseti líka?
Jóhannes í Bónus er annað góðmenni,
sem vann sjálfur á kassanum lengi vel. Þótt
sonur hans sé ekki eins alþýðlegur og heilsar væntanlega
ekki starfsfólkinu kumpánlega þegar hann kemur í
vitjanir í búðirnar, þá er hann margfalt
kræsilegri milljóner en þeir gömlu sem hér
píndu landslýð á meðan Kolkrabbinn átti
allt og réði öllu. Menn í anda Harðar í
Eimskip og Þórarins Vaff, sem maður sá aldrei öðruvísi
en steinrunna og fýlda fyrir framan málverk af eldri steinrunnum
og fýldum körlum. Gott að vera laus við það
pakk. Lifi nýju millarnir! Lifi nýja Ísland!