Við álítum okkur greindustu dýr sem uppi hafa verið. Við erum kóróna sköpunarverksins, eigum að baki glæsilega sögu, fundum upp flugvélina og frunsumeðalið, máluðum Mónu Lísu og sömdum síðasta fjármálafrumvarp og bókina Pikkupplínur með Kalla Lú. En þótt við séum fullkomnasta og besta dýrategund í heimi trúir fjöldi manns á það að eitthvað sé “æðra” en við. Einhver dularfullur “æðri máttur”, sem er sívinnandi í því að ákveða örlög okkar á bakvið tjöldin – “á himnum” – haldandi fullkomna dagbók yfir það sem við gerum og hugsum og þegar við deyjum fáum við sko aldeilis að finna fyrir því hafi við verið vond.
Kemst ekki í klúbbinn
Ég öfunda fólk sem trúir á þennan
æðri mátt, þetta dularfulla orkubúnt Guð
og fólk sér stundum fyrir sér sem hvítskeggjaðan
karl í hvítum kufli, ekki ósvipað og Helgi Hós
í spítalaslopp. Trúaða fólkið er eins
og í einhverjum guðdómlegum leyniklúbbi, en leynir
því sko aldeilis ekki hvað það hefur það
gott og er fullkomlega sátt eftir að það fann sannleikann.
Og ekki nóg með að það sé ánægt,
það er líka endalaust að nudda manni upp úr
því að vera ekki í klúbbnum: “Þeir
sem trúa ekki reika um í myrkrinu og eru siðlaus hálfmenni
sem munu fara til helvítis og pínast í eldi,” segja
hinir trúuðu og mér finnst eins og að þeir
séu alltaf að tala beint til mín. “Við aftur á
móti erum alveg seif, ekki nóg með að okkur líður
miklu betur en þér núna, heldur verðum við
líka í frábærum málum í næsta
lífi.”
Mér finnst þetta skítt. Ég vildi að
ég væri nógu gáfaður til að trúa
blint eins og hinir trúuðu. Trúa bara að það
sem einhverjir karlar skrifuðu fyrir fleiri hundruð og jafnvel
þúsund árum í Miðausturlöndum eigi
allt saman við rök að styðjast og sé jafn heilagur
sannleikur nú og þá. Að hinir órannsakanlegu
vegir Guðs séu einmitt málið og lausn á öllum
spurningum lífsins. Að allt annað en lifandi trú
á Guð og son hans Jesús sé myrkur og eymd.
Jafn vitlaus og silfurskotta
Vegna heimsku minnir hef ég aldrei komist í kallfæri
við æðri máttarvöld. Ég hef aldrei náð
það langt í lífinu að komast á botninn
og þar að leiðandi hefur Jesús ekki nennt að birtast
mér í infrarauðum bjarma. Ég er það
vitlaus að mér finnst það fáránleg tilhugsun
að biðja bænir og mér finnast útskýringar
Biblíunnar á heiminum lítið annað en bjánalegt
bull þeirra fornaldakarla sem skrifuðu bókina.
Ég er þó auðvitað ekkert að þykjast
hafa svörin á reiðum höndum, enda skildi ég
ekki baun í bala þegar ég reyndi að lesa Sögu
tímans eftir Stephen Hawking. Ég hef því siglt
í gegnum skerjagarð stóru spurningana með því
að vera sannfærður um að ég, sem eintak af þessari
dýrategund, sé hreinlega ekki með nógu stórann
heila til að skilja öll leyndarmál heimsins. Til nánari
útskýringar á þessari kenningu minni hef ég
stillt mér upp við hliðina á silfurskottunum sem
stundum birtast í baðkerinu hjá mér. Silfurskotturnar
skilja ekki tölvuna mína og gætu ekki skrifað kjallaragrein
í DV sama hvað þær reyndu. Kjallarahöfundur
sem væri silfurskotta myndi þó örugglega ná
miklum vinsældum. Ég er álíka takmarkaður
og pöddurnar, skil ekki alheiminn og mun aldrei geta útskýrt
hann sama hvað ég reyni. Ég hef semsagt þennan
vara á yfirburðum dýrategundarinnar sem ég tilheyri
og yppi nautheimskur öxlum yfir nýjustu ljósmyndunum
frá Hubble. Með því að tileinka mér
þessa “ég er of heimskt dýr til að skilja alheiminn”-kenningu
og sætta mig við hana, er ég sífellt nokkuð
ánægður og hef aldrei fundið fyrir þessum ægilega
tómleika sem trúað fólk er alltaf að klína
upp á hina trúlausu. Hvað þá að það
haldi fyrir mér vöku hvort hommar og lesbíur megi gifta
sig í kirkju eða ekki.
Trúarofstækir siðleysingjar
En þótt ég sé vitlaus get ég séð
að þeir sem telja sig þá trúuðustu af
öllum, og vinna jafnvel kosningar út á það,
eru lítið annað en skelfilegir vargar sem fara ekki eftir
neinu af því sem þeir þykjast hafa að leiðarljósi
í lífinu. Ég hef séð nógu margar
kristilegar bíómyndir í sjónvarpinu á
stórhátíðum til að fatta nokkurn veginn hvað
sonur Guðs var að spá. Eða kallast það nokkuð
að bjóða hinn vangann að slátra smábörnum
í fjarlægum löndum?