Var eitthvað að ske í október?

Hvað var að ske í október 2002?

31.10.02
Helvítis fíflin á Baggalúti eru með mig í "þrífarar" í dag. Þessu gleymi ég aldrei!!! Ég æði hér um gólf alveg kreisí af vonsku og hefnigirnd og finn eflaust upp á einhverju. Já bíðiði bara. HAHAHAHAHAHA!
---
Óli í Köben er með tvær brennandi spurningar í gestabók. A) Þótt Rótarbjór, svo maður tali ekki um Cream Soda og Sarsaparilla, sé góður er hann varla seldur nema í einstaka sjoppu í USA. Hér ræður einokun Cokka Cóla eða eitthvað. Ráð er að búa til sitt eigið gos eða kaupa drykki á netinu og fá senda heim. Hér er slóð á rótarbjórs-hjálp í viðlögum. B) Já ég "held með" QPR og ýmsir aðrir snillingar hérlendis líka (eins og afi Óla og Gunnar Jónsson leikari). Ég byrjaði að halda með þeim eingöngu útaf því að liðið er í þverröndóttum búningum sem var öðruvísi en öll hin liðin – svona var ég orðinn "alternative" snemma. Þegar ég var í London einu sinni fór ég á Loftus Road og keypti peysu og húfu. Ég fylgist nú ekki meira með þessum leiðinda fótbolta (Enska knattspyrnan dó í mínum huga þegar Stöð 2 hirti útsendingarréttinn) að ég veit ekki einu sinni í hvaða deild QPR er. Áfram QPR!
---
Ef einhverjum langar að glápa á upptöku á Popppunkti þá byrjar stuðið kl. 17 í dag en mæting er svona 16:30 upp á Skjá einum. Flatbökur og öl í boði að vanda. Svo er ég með Alætuna í kvöld á Rás 2. Guðni í Ensími kemur með óskalögin og ég spila fullt af ógeðslega góðri tónlist. Enn með harðsperrur svo ekki meira blogg í dag. 10:25

30.10.02
Djöfull er ég orðinn merkilegur eitthvað. Fór í leikfimi í morgun í Planet Reykjavík. Fór fyrst um daginn, var mældur í bak og fyrir og þá kom í ljós að ég er 80% aumingi. Var látinn teygja mig inn á einhverja reglustriku og þá greindist ég sem stirðasti maður á landinu því ég náði bara 0.5 af 100 mögulegum. Áðan fór ég í fyrsta alvöru tímann og maður er bara kominn með einkaþjálfara og allt. Fínn strákur frá Akureyri og nafni minn (auðvelt að muna það). Maður hefði getað valið einhvern annan, t.d. Spanjólann Raúl með smjörhár í tagli eða grafalvarlegan gaur frá Serbíu sem ég dauðhræddur við. Gunni Akureyringur langsamlega bestur held ég. Auðvitað er þetta púl alveg drepleiðinlegt en tilgangurinn helgar meðalið (Hvað kemur meðal þessu við – ég hef aldrei skilið þetta orðatiltæki, ekki frekar en "vogur vinnur vogur tapar" – hvað þýðir það? Hvaða vog er verið að tala um?).
---
Ég er kominn svo hátt í lífnu að í kringum mig var nánast eingöngu frægt fólk. Kaffibrúsakarlarnir svitnuðu á pyntingatækin við hliðin á mér og í heita pottinum var Stefán Jón Hafstein að fá hálsnudd frá hinum lipra Lee frá Asíu. Í móttökunni hitti ég svo Steinunni Ólínu og að sjálfssögðu Eyþór sjálfan, sem var að fá sér heilsusjeik og sagðist hafa getað étið 1 kg af nautakjöti þegar hann var feitastur. Ég er strax farið að hlakka til næsta tíma – hvaða stórmenni lista- og atvinnulífsins ætli maður rekist á þá?!
---
Annars er ég með svo miklar harðsperrur að ég hreinlega get ekki bloggað meira í dag. Ekki nema það að ég þarf að koma því að að þessi grein um blogg í Stúdentablaðinu var alveg ömurleg og allir sem voru að tjá sig eru leiðindapúkar. Allir nema Katrín auðvitað sem hafði rænu á að nefna mig (hvað annað?). Með síðasta andvarpinu langar mig svo til að benda þér á að Kistan er hætt að vera grautfúlt "menningar"blað og er orðið opið málþing um Mikael Torfason. Nei andskotinn, þeir eru búnir að taka það allt út. Forsíðan fjallaði ekki um annað en Mikka í gær, allt út af því að hann kallaði Úllu ofurgagg "vitleysing". 13:20

28.10.02
Hvað er þetta: Sex á dag sem fá klamedíu!? Djöfuls vitleysingar. Var reyndar boðaður í test einu sinni. Því ver og miður var þetta á þeim tíma sem maður var testaður með nál – og engri smá helvítis nál! Svona 30cm langri og svo var eyrnapinnabómull á endanum. Var þarna skjálfandi með buxurnar á hælunum og hjúkka sem leit út eins og nasískt gylta tók vininn í lófann. Litli vinurinn titrandi af hræðslu og nánast kominn inn í nárann af ótta – ég var ekki ósvipaður og skjaldbaka. Hjúkkan tróð nálinni innum þvagrásina og svo annarri nál. Ég beit í vörina og fór heim líðandi eins og fórnarlambi úr Þjóðhátíð, nei eflaust ekki eins kraminn, en þokkalega veiklaður samt. Skömmu síðar kom annað bréf og mér sagt að mæta aftur í sama test til að allir yrðu nú 100% sáttir (Þetta nálartest var svo óáreiðanlegt). Sama sagan nema nú var ungur karllæknir sem tróð nálunum innum skjaldbökumunninn. Veit ekki hvort var skárra karllæknirinn eða nasistinn. Slapp með skrekkinn, engin klamedía. Rakst áðan á nokkur ummæli sem fólk hefur heyrt á kynsjúkdómabiðstofum. Mjög fyndið – eða þannig. 07:38

26.10.02
Meðan ég man: Frábær PPPP í kvöld. Fræbbblarnir á móti SSSól. Grimm barátta fram á síðustu sekúndu. 12:40

25.10.02
Gífurlegt offramboð ríkir nú á mér. Svaraði staðalstuðspurningum fyrir Moggann sem kemur á morgun og svo verð ég hjá Jóni Ólafs í "Sjalla" (SJónvarpi ALlra LAndsmanna) í kvöld. Þetta var tekið upp í ágúst svo ég man ekkert eftir þessu. Eflaust eitthvað rövl um minn stórfenglega tónlistarferil. Held ég taki þáttinn upp svo ég geti hraðspólað yfir mesta rövlið. Strákarnir höfðu þó verið snarpir og sýna fullt af gömlu drasli með mér, t.d. hið fræga "Látum Gunna éta hundaskít"-atriði úr myndbandinu við "Öxnadalsheiði". Svo er þarna "Hár-Gunna" stöntið sem ég gerði fyrir Kolkrabbann (því miður ekki sýnt allt) og fleira; fullt af Ununarmyndböndum og ég í Stundinni okkar með Heiðu. Undursamlegt! Í næstu viku ku ég svo vera í S&H. Fór í myndatökuna og reyndi eftir mesta megni að vera "ég sjálfur", en var svo orðinn eins og versti hálfviti undir lokin, með einhverjar "flipp" pósur og rugl. Ég á því miður ekki afturkvæmt í veröld hinna kúl eftir það dæmi.
---
Flosi Þorgeirsson skammaði mig um daginn fyrir stafsetningavillur og taldi þær ekki forsvaranlegar gömlum MK-ingi. Þessu er til að svara að ég játa á mig glæpinn enda held ég að ég hafi verið heima með hettusótt þegar Ypsilon-reglan var kennd í barnaskóla. Ég skil líka ekki afhverju þarf að hafa þetta ömurlega Y. Til hvers? Enginn munur á framburðinum. Mér væri slétt sama þó það væri ísa í matinn og svo ís á eftir. Ég skal þó reyna að vanda mig eftir mesta megni, enda er maður uppvís að ákveðnum hálfvitaskap þegar allt sullast út í stafsetningavillum.
---
En ég er ekki hálfviti. Í alvörunni! Tók m.a.s. eitthvað greindarpróf um daginn og skoraði sæmilega – fékk 126. Ég var dauðhræddur fyrir prófið; hélt ég myndi vart mælast, eða fá undir meðallagi. Pæliði í því að taka svona próf og komast svo aððí að maður sé vitleysingur! Ég skil reyndar ekki hvað einhverjir þríhyrningar og strik hafa með greind að gera. Mér finnst að próf sem er ekkert nema kubbar, hringir og strik mæli frekar hvort maður sé einhverfur eða ekki. En það er nú bara af því ég er svo sár að fá bara 126. 07:06

24.10.02
ALÆTAN á Rás 2 í kvöld kl. 22:10. Músikvatur úr Apparat mætir með óskalögin, Nýja sjáland verður í sviðsljósinu og ég ætla að fumspila stórfínt lag Sesars A (hann er búinn að uppfæra síðuna sína), "Bananalýðveldið". Plús allskonar fínt stöff auðvitað. 09:50
---
Stórsniðugt skemmtiefni í Kastljósinu í gær. Hired Goon #2 mætti fölum Merði sem lítið heyrðist í (gleymdi bláa höndin að hækka í míkrafóninum hans?) Goonið í svaka stuði að vanda, öruggur og talaði hátt og skýrt. Komdu með sannanir, var beisiklí það sem hann sagði. Vottaði ekki fyrir lýgi þegar hann sagði: "Þetta er allt saman algjört kjaftæði og örvæntingafullur uppspuni pólitískra andstæðinga". Mér fannst samt votta fyrir smá hræðslu – jafnvel efa – þegar hann eldsnöggur sagði "Nei" við spurningunni "Er ekki alltaf eldur undir þar sem er reykur?" Mörðurinn slappur, tautaði bara eitthvað um "almennt andrúmsloft" eins og eitthvað jafn loftkennt og það myndi sannfæra goonið og briddsspilarann JSG, eða þannig séð einhvern, sem hefur ekki orðið það frægur að komast inn á hið margfræga teppi. Og svo eitthvað rugl um að fólk þori varla að senda email....!? Það verður nú aðeins að fókusa hér í baráttunni, ekki láta paranojuna hlaupa með sig í gönur – er það ekki Kjartan?
---
Öllum heima í stofu eflaust alveg nettsama um þetta, bara að bíða eftir ER, og þar að auki eru viðmælendurnir fremur illa þokkaðir af almenningi: Goonið fyrir að vinna ötullega að vægum dómum á barnaníðingum og Mörðurinn fyrir að banna Einari Bárðarsyni að syngja á ensku. Þetta var því hálfgert "nó sjó" þó sniðugt væri, enda vantaði aðalleikendurna: HH sem vitnar ekki í tveggja manna tal (a.m.k. ekki opinberlega) og DO sem mætir nú varla pólitískum andstæðingum, hvað þá einhverjum smásagnahöfundum.
---
En þetta gæti orðið stuð... og þó. Hápólitískur vetur framundan með spear campaigni og látum. Fólk verður þó að passa sig að ráðast ekki einum of þungt á DO því þá snýst þetta allt við; fólk fer að vorkenna honum og Bláa höndin fær yfir 50%. Persónulega kýs ég eingöngu þann flokk sem lofar og stendur við það að vinna ekki með D eftir kosningar. Ég stórefast um að einhver þessara framapotara hafi göts í slík loforð. Skila því auðu ef ég á annað borð nenni að taka þátt í þessum hálfvitaskap. Lýðræði? Pfffft...
---
Ég ætti bara að fá að ráða þessu öllu. Djöfull kæmu margir á teppið hjá mér. Hmm... hver kæmi fyrstur? Þarf að gera lista. Ég myndi setja upp gapastokka á lóðinni fyrir framan stjórnarráðið og eftir að ég tæki fólk fyrir á teppinu myndi ég láta það í stokkinn yfir nótt. Þangað færu líka fylliraftar sem hafa orðið til vandræða, samt ekki Lalli Johns því hann gerði ég að Hired Goon #1. Hired Goon #2 yrði þarna löggan sem er í Hvítasunnu, en fyrst þyrfti ég auðvitað að lækna hann af trúarlegum ranghugmyndum. Meðal helstu baráttumála minna væri að leggja niður Íslenska dansflokkinn og Sinfóníuna og veita sömu upphæðum í rokk og poppstarfssemi. Fólk ætti ekki að byrja að borga skatt fyrr en við 120þús kallinn og Ríkið ætti að sjá sóma sinn í að veikir, börn og aldraðir geta verið í gúddí fíling. Mjög einfalt allt saman.
---
Hinn verðlaunaði og stórfengilegi 'Lútur hefur komist yfir minnislista Davíðs yfir hættulegustu listamenn þjóðarinnar. Ekki veit ég nú hvað ég er að gera þarna því ég er ekki "listamaður". Í besta falli listi.
---
Já og ég fer í viðtal á Steríó í hádeginu. En er sú stöð ennþá til?! Mér var boðin píta fyrir að mæta og ekki slær maður hendinni á móti slíkum eðal löns. 06:10

23.10.02
Popppunkts-síðan er loxinz komin upp. Tékk it át mar. 12:06
---
Jæja, þá er hið stóralvarlega mál HH vs DO byrjað að kólna. Ekkert í Mbl., ekkert á Bláskjá. Sörpræs sörpræs! Á morgun eða hinn kemur svo rútínubundið bréf JSG eða HHG í Mbl. Ég gæti skrifað það sjálfur og sent inn, en nenni því ekki. Tel þó fullvíst að eitthvað af eftirtöldum frösum verði notaðir: Ofstæki, ómaklegar árásir sem jaðra við geðveiki, óraunhæfar samsæriskenningar kaffihúsaspekinga, þetta dæmir sig sjálft, þetta er ekki svaravert, bull, klikkun, o.s.frv. Eftir bréfið bíðum við bara spennt eftir næsta mafíukasti og komum okkur þægilega fyrir með hausinn í sandinum á meðan. 09:45
---
Meira um Jónas Sen: Ástæðan fyrir því að ég kallaði hann "alvöru" gaggrýnenda er sú að mér hefur virst hann segja ætíð það sem honum finnst og það óháð því hvort sú skoðun færi fyrir brjóstið á viðfangsefninu. Það sama gerði Jón með augnakippina og málaði sig því fljótt út í horn meðal hinni ofurviðkvæmu og sjálfhverfu leikarastéttar. Jón var að lokum látinn taka pokann sinn þegar leiklistargengið hafði náð að sannfæra þá sem höfðu Jón í vinnu að þetta gengi ekki lengur. Jónas er örugglega úthrópaður í þessari hallærislegu "æðri" tónlistarklíku en DV hefur ekki rekið hann enn sem er gott og fær DV prik í kladdann fyrir það. Þegar Jónas skrifar veit maður að hann er að segja "satt", hann er að segja akkúrat það sem honum finnst (sem er auðvitað hans skoðun/álit etc). Þess vegna trúir maður gaggrýninni hans. Þegar aðrir skrifa fær maður oftast hálfvelgju og þokuslæðing sem maður þarf að kafa oní og lesa milli línanna til að ná. Ekki gott. Eiginlega mjög vont og móðgun við lesandann. Þetta er nú kannski eitthvað að lagast samt. Íslenskar myndir fá ekki lengur 2 og hálfa stjörnu í forgjöf sýnist mér. Man ekki betur en Fálkar hafi verið tekin í svokallað bakarí hjá Hilmari höfðingja á DV og popptónlistar-gagg Mbl er löngu orðið trúverðugt þökk sé Árna Matt. Þó hann fái lesendabréfsnöldur frá "særðum" poppurum lætur hann ekki buga sig og lærisveinar hans hafa tekið upp sama sið: Þ.e.a.s. að segja sannleikann um eigin smekk. Gott.
---
"Persónuleg" kynni af íslenskum stjórnmálamönnum I
Þegar ég var að dimmitera 1985 (í Michelin-karls búningi sem var svo illa gerður að allir héldu að ég væri draugur) rakst ég á Jón Baldvin hjá Alþingishúsinu. Ég hófst undir eins handa við að hreyta óprenthæfum ónotum í kallfauskinn sem rauk í burtu án þess að svara þessum vankaða draugi. Í dimmiteringunni fór ég líka í Kirkjuhúsið og spurði með klúryrðum hvort þau ætt'ekki bækur um kynlíf Krists. Kerlingin var snúðug og sagði að ekki ætti hún slíkt en bætti við að kynlíf Krists hafi örugglega verið gott.
---
"Persónuleg" kynni af íslenskum stjórnmálamönnum II
Einu sinni sá ég Davíð Oddson strunsa eftir Austurstræti. Hann var lítill. Stuttu síðar sá ég Þorstein Pálsson strunsa eftir Austurstræti. Hann var líka lítill. Ég var í hvorugt skiptið að dimmitera svo ég sagði ekki neitt.
---
"Persónuleg" kynni af íslenskum stjórnmálamönnum III
Nýlega hélt Dagur B Eggertsson hurð fyrir mig opinni þegar ég var aðkoma út úr Landsbankanum, Aðalbanka. Hann brosti sínu blíðasta sem mér þótti gott hjá honum því það var þá þegar búið að kjós'ann í borgarstjórn.
---
"Persónuleg" kynni af íslenskum stjórnmálamönnum IV
Var í afmæli þar sem Ísólfur Gylfi Pálmason lék á gítar og söng. Flúði vettvang. Nýlega hitti ég Ísálf í heita pottinum og hann fór eitthvað að spyrja mig út í hvaðan ég hefði alla þessa poppvisku. Sagðist sjálfur vera aðallega í tímabilinu frá Toxic til Tatara.
---
"Persónuleg" kynni af íslenskum stjórnmálamönnum V
Einu sinni var Árni Johnsen næstum búinn að drepa mig þegar hann virti ekki stöðvunarskildu og æddi fyrir mig á Island jeppanum þar sem ég beið eftir að komast yfir götu spandexhúðaður á hjólinu. Hvenær fer hann í fangelsi?
---
"Persónuleg" kynni af íslenskum stjórnmálamönnum VI
Hef tvisvar séð typpið á forsetanum í almenningssturtu. Segi ekki meira af hollustu við þjóðfánann. En það er altso meira sem "hangir á spýtunni" hjá Dorritt en að það sé fyndið að vera svona hálfdrottning í smáríki, wink wink.
---
"Persónuleg" kynni af íslenskum stjórnmálamönnum VII
Sé stundum Katrínu Fjeldsted út í búð. Virðist vera almennileg kona.
---
"Persónuleg" kynni af íslenskum stjórnmálamönnum VIII
Sé stundum Jón Kristjánsson út í búð MEÐ KONUNNI SINNI. Segir það ekki allt? Góðmenni og ljóðaáhugamaður en hálfgerð gunga. Ekki á réttri hyllu.
---
"Persónuleg" kynni af íslenskum stjórnmálamönnum IX
Geir H. Haarde var stundum að puða við hliðina á mér í leikfimi. Var orðinn nokkuð fitt. Horfði samt alltaf á mig á svipinn eins og hann héldi að ég ætlaði að lemja sig. Annað hvort þannig eða á svipinn eins og hann ætlaði að lemja mig. Eflaust bara einhverjar ranghugmyndir í mér.
---
"Persónuleg" kynni af íslenskum stjórnmálamönnum X
Afgreiddi Kolbrúnu Halldórsdóttir oft þegar ég var bankagjaldkeri. Alltaf glöð og hress og almennileg. Hún heilsar mér alltaf brosandi á förnum vegi og ég held svei mér þá að ég myndi "fylkja" mér á bakvið hana ef hún væri ekki svona obsessd á því hvaða klámi ég er hugsanlega að sjálfsfróa mér yfir.
---
"Persónuleg" kynni af íslenskum stjórnmálamönnum XI
Nauðaði í Össuri vikum saman um að fá örlitla kauphækkun þegar hann var ritsjóri og yfirmaður minn á DV. Hann lofaði alltaf öllu fögru og "á morgun" eitthvað. Minnir að það hafi tekið þrjá mánuði að hækka þessa lús. Stórkostlega framtakssamur stjórnmálamaður sem gustar af. 07:20

22.10.02
Meistari Jónas Sen skrifaði frábærlega skemmtilega krítík um einhver "nútíma"leiðindi sem hann fór á. Svo kom einhver vælukjói með væl sem Jónas svarar hér. Alltaf gaman að Jónasi, eina alvöru gaggrýnenda landsins síðan Jón... æ þarna kallinn sem Spaugstofan var svo fúl út í og þess vegna alltaf að "gera grín að"... var og hét.
---
Best að fylgjast með fréttunum í kvöld fyrst Hallgrímur er byrjaður að tala um skammastu þín-fundinn sem hann átti með Dabba klikk. Ætli Bláskjár verði með þetta í sínum fréttum? Ha, haldiði að Elín Hrist hafi ekki verið óð og uppvæg að gera frétt um þetta? Haldiði að Gísli Marteinn verði ekki með Hallgrím næst? Sjáum til hversu Bláa höndin heldur þéttingsfast um hinn andlega pung á þessu fólki. 17:52
---
Loftur á Séð og heyrt vélaði mig til að mæta í tökur. Á að pósa í hinum ýmsu hawaii-skyrtum. Lítið við því að gera, það fylgir víst sjónvarps"frægð" að sprella í S&H. Ég get líka alveg viðurkennt það að mér finnst gaman að fletta blaðinu til að sjá hvaða bjánar eru nú að sprella. Hví ekki að leggja sitt til á vogaskálar aumingjahrollsins? Ég vona að hinir harðsvíruðustu af lesendum snúi ekki við mér baki.
---
Reykingar eru eitt mesta tilgangsleysi samtímans. Að hanga einhversstaðar og reykja jaðrar við sturlun í fáránleika sínum. Samt er ég orðinn nikótínfíkill en hef gert samning við konuna um að reykja bara utanhúss. Stend því eins og álka í útidyrunum og reyki og passa að eyrun detti ekki af mér vegna kulda. Stundum legg ég á mig ferðir í sérstaka reykstaði sem ég hef fundið upp. Gaman er í góðu veðri að sitja á leiði í Suðargötukirkjugarði og fylla lungun af viðbjóði. Einnig í grjótgarði aftanvið bensínstöðina í Ánanaustum. Þegar ég var geðveikur um daginn hraktist ég um strandlengjuna í fjóra tíma í Gefjunarúlpu og keðjureykti. Eftir að bráði af mér er ég með hámark eina í einu, sem er nú alveg nóg því eftir tvo fyrstu smókana er ég hvort eð er kominn með ógeð. Klukkutíma síðar byrjar fíknin að kalla og þá læt ég undan.
---
Foreldrar mínir reykja hvorugir og hafa aldrei gert og því var það þeim mikil sorg að fjögur eldri systkini mín byrjuðu öll að reykja á tilskildum aldri. Mapa bundu lengi vonir við mig og enn finnst mér ég vera að bregðast þeim þegar ég reyki fyrir framan þau.
---
Ég er af fyrstu kynslóð þeirra sem urðu fyrir andreykingaráróðri. Tóbaksvarnarnefnd tók til starfa þegar ég var um 10 ára. Krakkarnir fengu límmiða og ég skellti einum á hurðina á svefnherberginu mína: "Við reykjum ekki hér". Foreldrar mínir voru yfir sig ánægðir. Ég og Halli höfðum safnað tómum sígarettupökkum af hinum ýmsu tegundum. Þegar Tóbaksvarnarnefnd byrjaði sinn réttmæta áróður urðum við fasískir í andreykisma okkar. Efndum til brennu á sígarettupakkasafninu og höfðum uppi stækan áróður við krakkana sem söfnuðust í kringum logana. Tólf ára bekkurinn fékk viðurkenningaspjal af því hann var reyklaus. Allir voða hressir með það. Allir nema við Halli auðvitað því við vissum að Hulda hafði verið að fikta. Hulda fékk snemma bein í nefið og var sú eina sem lét ekki ferma sig einu ári síðar. Ég og Halli, þessir litlu fasistagrey sem við vorum, gengum þungum sporum til umsjónarkennarans sem hafði babú samband við Tóbaksvarnarnefnd sem afturkallaði viðurkenningaspjaldið. Litlu fasistarnir við svaka stoltir auðvitað, en hvorki Hulda né hinum krökkunum fannst þetta sniðugt, minnir mig.
---
Svo liðu árin og ekki reykti ég. Byrjaði eiginlega ekki fyrr en svona 1988 þegar hljómsveitin Bless hóf starfssemi sína. Þá var ég í minnihluta sem reykleysingi og komst á bragðið í "partíum" þar sem við Ari og Biggi drukkum og hlustuðum látlaust á "Magical Mystery Tour". Síðan hefur þetta verið allskonar. Sígarettur, vindlar – reyndar aldrei pípa – en svo reyktyggjó og plaststaukar í öll þessi skipti sem ég hef hætt. Aldrei náð pakka á dag og stundum náð að halda mér í 5 stk dagskammti. Stundum ekki reykt í eitt ár eða meira.
---
Ég sýg rettu (Marlboro af því ég las að White Stripes reykja Marlboro) og ímynda mér viðbjóðinn fylla lungun, þessi stórkostlega fíngerðu líffæri. Sé æðakerfið mygla og viðbjóðinn sverta gumsið innan í mér. Yfir mig hellist dauðaótti og skamvinnt þunglyndi, en allt kemur fyrir ekki. Það er sjálfu sér ekki líkamlega gott að reykja. Það er bara gott að fullnægja þessari líkamlegu fíkn sem kemur þegar líkaminn vill fá sinn skammt. Það tekur 10 sekúndur. Mér hefur ekki þótt erfitt að kikka þessum habit, en það er bara spurning um hvenær. Ég veit alveg hvenær og hef m.a.s. skriflegan samning upp á það. Ef þú vilt vita meira um reykingar skaltu fara hingað...
---
Svara gestum: Náði í kazaalite en finnst nú winmx eiginlega ennþá miklu betri. Takk samt. Tékka kannski á imesh við tækifæri. // Nei, konunni þykir ég alveg eins og fífl með ekkert skegg. Sem er alveg satt. Er að safna as ví spík – alveg nauðsynlegt að hafa eitthvað svo að undirhakan sé ekki alveg svona augljós. // Nei Elvis2, ég fæ auðvitað ekki krónu fyrir borðana hér að ofan, enda komast bara vinir og kunningjar að. Leiðinlegt að þú teljir Mikka totta því hann var svo ánægður með sms-rúnk söguna þína að hann sendi slóðina á hana út um allan bæ. // Það er því miður ekki pláss fyrir Vonbrigði í fyrstu seríu Popppunks. Það eiga bara tvö lið eftir að keppa (þó það sé eftir að sýna fjögur lið) og síðastu liðin í 16-liða keppni verða Rokkslæðan og Land og synir. Þegar þeim leik lýkur tökum við til við að gera 8-liða leiki og svo á milli jóla og nýárs fáum við sigurvegara: "Poppfróðustu hljómsveit landsins". Þetta er altso sama sístem og í HM, ef það hefur eitthvað farið framhjá fólki. Ef þátturinn mælist með eitthvað svaka áhorf (það ku vera að mæla slíkt núna) er aldrei að vita nema við rennum í aðra 16-liða keppni og þá koma Vonbrigði sterkir inn (+ öll hin böndin sem hafa haft samband eða upp á þeim verið stungið). 09:55

21.10.02
Í Gestabók hvetur Kitkat mig að skrifa bók fyrir jólin, en hún verður að bíða til jólanna 2003, ef ekki lengur, eftir einni slíkri. Hugmyndin að skáldsögunni er komin og allt, nafnið á bókinni meira að segja líka, en ég held kjafti enda bjánalegt að rövla um eitthvað sem er bara hugmynd enn. Ætli maður reyni ekki að væla út rithöfundalaun frá Ríkinu (les: þér), en umsóknarfrestur rennur víst út um miðjan 15. nóv. Þegar ég fæ ekkert verð ég óður og læt vini mína skrifa í blöðin, svona eins og þegar Gyrðir fékk ekki að lufsast í sinni loftkenndu vitleysu árum saman heldur fékk bara 6 mánuði. Best væri auðvitað að enda í æviáskrift eins og Þráinn Bertl og taka því svo rólega bara og tuða endalaust um hvað allir eru alltaf fullir niðrí miðbæ.
---
Sem er nú reyndar alveg satt. Hvenær hef ég orðið það fullur að ég færi að böggast í slökkviliðinu við erfiðar aðstæður? Ég held að meira að segja í mínum verstu blakkátum og snarfylliríum hefði ég haft rænu á að drulla mér í burtu ef ég hefði rekist á þennan eldsvoða þarna á Laugarveginum. Hvað er að þessu hyski? Ég minni enn á gapastokkinn sem góða refsingu fyrir svona pakk.
---
Líkþornaði heimavið í gær og horfði á imbann, endursýningar fyrst: Spaugstofan... Ja... Skítsæmilegt svona inn á milli en alltof margir brandarar sem maður er farinn að bíða eftir að endi. Þarf svo að bíða og bíða og verður pirraðri við hverja mínútu. Svo kemur kannski sama konsept aðeins seinna og þá brjálast maður. Hvað er þessi Randver að gera þarna? Ætli hann sé á sama kaupi og hinir? Ég væri allavega ekki hress með það ef ég væri Siggirjóns eða Örn. Foreldrar mínir hafa ekkert gaman af Spaugstofunni og þá er nú mikið sagt. Ég fíla nú reyndar alveg aðhaldsgrín þeirra í garð DOogCO en þeir eru alltof fljótir að missaða. DO verður td með reglustriku út önnina hjá þeim og hversu fyndið er það? Sigmund mun eflaust láta DO vera með reglustriku líka og þá er geðveikin í DO bara orðin eitthvað skondn en ekki háalvarlegt pólitískt mál. Svona endar öll pólitík hér, Ekki að menn drullist úr embætti heldur sem grín.
---
Gísla Martein tók ég með hálfu öðru auganu. Gísli er voða hress alltaf en í vitlausum flokki. Lagði ekki í sjúkrasögur Ingólfs og missti af Bubba. Konan sagði að hann hafi bara vælt um Brynju og börnin. Gísli greinilega pantað mjúkan pakka.
---
Svo varða Silfur Egils. Spekingar spjalla fyrst, þar sem í endann gaus upp að Karl Th fór stamandi og dragandi augað í pung eitthvað að tala um einræðisherrann sem við lifum undir. Á greinilega að vera mál hjá samfokk. Vonandi verður smear campaign. Það er allavega næg drulla til að nota í slíkt. Óli Björn glotti bara en maður sá að hann veit sannleikann, það glytti í heiðarleika undir bólunum. Einhver rauðhaus frá VG var slappur. Ekkert fútt í því liði – "Ja, þetta er spurning um málefni en ekki menn" var það eina sem hann gat sagt. Djöfuls kjaftæði. Pólitík er eingöngu spurning um menn. Í næsta lið bauð Egill upp á nasistaforingjann úr Allo Allo, HHG, en þá fór ég að sýsla við annað enda ekki með maga í aðra eins vitleysu. Svo kom eitthvað leiðinlegt, u, já Bónuskallinn og loftræst sjálfsstæðiskerling í rauðum bol eitthvað að tala um verð á nauðsynjum, og í lokin var Egill með einhvern útlending sem ég nennti ekki að horfa á. 06:06

20.10.02
Gamli maðurinn brá sér á dansiball í gær. Apparat voru hressir. Ættu kannski að koma fram í eins búningum? Ganga alla leið. Gott band. Svo komu ömurlegir rapparar í Blakkalizíus með hundleiðinlegt blöðruhipphopp. Fullt af liði að fíla þá samt og í hvert sinn sem þeir sögðu "Æææææslanddddd!" trylltust krakkarnir. Sem var nokkuð gott af því þeir sögðu "Ææææææslanddddd!" svona tvöhundruð sinnum. Ég fór fram og gáði hvort ég ætti að kaupa Híves bol. Þeir voru bæði ljótir og dýrir svo ekki gerði ég það. Svo komu þessir sænsku rokkarar og ja; jú jú, þokkalegt alveg. The Hives eru langt í frá besta band í heimi og ekki einu sinni besta band í Svíþjóð. Þeir eru alltof útreiknanlegir og seif – svona einskonar Iggy Popp á Volvo. Volvo rokk. Það er engin ógn eða skelfing blönduð groddalegu ruslrokkinu, ekkert hættulegt við þetta. Öryggispúði í andlitið, ekki krepptur hnefi eins og í "alvöru" rokki. Þeir mega þó eiga það að eiga nokkur fín lög, en restin er svona c-flokks Ramones eða Kinks b-hliðar. Þeir eiga líka heiður skilið fyrir að greiða götu bassadverga með hormottu og gítarfitubollu. Litla skoffínið sem söng er ekki sannfærandi frontari. Vill vera Jon Spencer + James Brown en er bara ósannfærandi sænskt skoffín. Ég hafði heyrt af einhverri geðveikri sviðsframkomu en svo var þetta bara svona nokkuð hresst, en ekki eins geðveikt og ég hélt. Alveg fínt auðvitað samt. Í uppklappinu tóku þeir einhvern frábæran ellismell - "Stop and think it over", held ég hann heiti - sem ég geri nú dauðaleit að á netinu í orginal útgáfunni. Eftir þessa gaura komu Gustuk og bassaleikarinn úr Housemartins en þá var ég farinn heim að leggja mig. Gott framtak hjá strákunum í Erveifs!
---
Nei, þetta "Stop and think it over" er ekki gamall soul-smellur eins og þetta vissulega hljómaði eins og, heldur lag frá 2000 með Sympathy for the Industry-bandi sem heitir Compulsive Gamblers. Möst að tékka á því. Nú væri gaman ef gamli Audiogalaxy væri ennþá - það kom varla fyrir að maður fynndi ekki stöffið sitt þar. Hvorki Soulseek né Winmx eru alveg að köttaða. Veit fólk um betri forrit? 09:15
---

19.10.02
Popppungurinn í kvöld er mikil snilld. Sykurmolar mættu með eintómt grín í farteskinu en Rúnar og synir tóku þessu alvarlega. Bæði lið vissu þó heilmikið og úrslitin... þið sjáið þau í kvöld.
---
Mér tókst á yfirskilvitlegan hátt að klúðra einni spurningu. Ég er alveg í rusli auðvitað en sem betur skipti þetta ekki máli upp á úrslitin. Lag á Sumar á Sýrlandi heitir auðvitað "Andafundurinn mikli", en ég, þessi fábjáni, hélt því statt og stöðugt fram að lagið héti "Andaglas". Og af hverju hélt ég það? Af því ég las það í einhverri rokkskruddu sem kom út í fyrra. Svona elta meinlokurnar mann árum saman! Ég bið keppendur og áhorfendur þúsund sinnum afsökunar á þessum hálfvitaskap og er farinn að bryðja grænt te beint upp úr dósinni í von um að eitthvað létti til í skýjuðu heilabúinu. Úff...
---
Gaman að þeim Jóni og Pétri Kristjáns í gær. Þetta pungatal var nú alveg bráðfyndið. Verst hvað var til lítið af gömlu Pelican stöffi á mynd. Það er auðvitað búið að eyða þessu öllu upp á Rúv enda var rokk ekki talið nógu merkilegt til geymslu. Nú er blessunarlega ný tíð með alvöru fólki eins og Jónathani og Óla Palli og svona köppum sem vita að poppið er það sem lifir en maður er nefndur Hr. ráðuneytisstjóri ekki. Nonni er annars alveg að rúlla þessu upp og er skemmtilega "loose" með gestunum. Og hvaða poppauli haldiði svo að verði í næsta þætti? Enginn annar en ég sjálfur takk fyrir.
---
Hápóltísk grein mín í gær hefur auðvitað engin viðbrögð vakið. Ég sem hélt að fréttatímarnir tækju á þessu, eða þá að Innanpíkan yrði full af stuðningsyfirlýsingum og samsæriskenningum. Nei nei, ekki múkk – engum finnst það skrýtið að menn séu kallaðir á teppi DO og skammaðir eins og hundar fyrir að segja skoðanir sínar. Ég er annars að spá í að eyða öllum heilafrumunum sem geyma upplýsingar um DO og Bláu höndina út úr hausnum á mér því það er engum manni hollt að spá of mikið í þessu. Best að þegja bara eins og þið og vona að einhver felli hyskið eftir veturinn og hér komist á þjóðfélag sem er ekki morkið af spillingu og hagsmunatengslum. Fat change. Kannski eftir 4 ár í viðbót.
---
Ég er orðin senditík fyrir Mikka Tott sem er kominn með nýja bók, Samúel. Samúel er gaur sem lætur ástand heimsins og þjóðfélagsins fara svo mikið í taugarnar á sér að hann fær það á heilann og snappar. Allt sem hann segir er þannig séð "satt", en það er bara svo mikil yfirhylming og þegjandi samþykki og heiladauði í gangi að þjóðfélagið úrskurðar Samma geðveikan fyrir "sannleikann" (reyndar nokkur ofstopi í Sammanum). Mikael er hér með sína bestu bók og það er öllum hollt að lesa hana og spá aðeins í þessu. Bara að passa sig að snappa ekki...
---
Ég, senditíkin, sentist semsé með eintak af bókinni til Blazroca, en hann var ekki heima heldur bara Sesar A sem bauð í te. Hann lét mig hafa eintak af stóru plötunni sinni sem heitir "Gerðuþaðsjálfur" og á að koma út 8. nóv. nk. Þetta er alveg svaðalega fín plata hjá stráknum, full af smellum og gáfulegum og góðum textum. Eitt heitir t.d. "Bananalýðveldið" (Blazroca gestar) og passar vel við þegar maður er eitthvað að spá í DO og Bláu höndinni. Ég segi nú bara; enn er von fyrir mannkynið á meðan þeir Eyvindarsynir rappa. Sesar ætlar að prevjúa titillagið 23.okt (á miðvikudaginn á heimasíðunni sinni) svo þið ættuð endilega að tékka á því.
---
Ég fór í Garðabæ í gær. Djöfull er ég feginn að búa ekki í þeim grafreit. Mér fannst fólkið í Hagkaupum næstum því minna mig á liðið í 2000 Maniacs og ég fann sterklega fyrir návist Bláu handarinnar. Nei æ: Muna að gleyma. 09:29

18.10.02
Í Kalda stríðinu var heimurinn svart/hvítur. Menn hugsuðu í svart/hvítu. Nú er heimurinn einlitur: blár.
---
Hallgrímur Helgason skrifaði bók um s/h heiminn. Kiljan kommi óð í villu og svima. Bláa höndin var glöð. Tók nýja hvolpinum fagandi – koddu hvutti, góður strákur. Snati litli sá samt muninn á réttu og röngu að lokum. Kannski fékk hann nóg af hundakexinu. Hann beit leiftursnöggt í bláu höndina. Bláa höndin ærðist. Hundskratti, skamm! Hvutti var kallaður inn á teppi – inn á teppið sem hann var búinn að míga í. Fékk yfir sig þær skammir sem óþekkir hundar eiga skilið. Og snáfaðu svo út og mígðu aldrei aftur í teppið eða við látum þig aldrei aftur fá listamannalaun.
---
Í Fréttablaðinu í dag er sagt frá Snata og Óla. Nema hvað Snati er aldrei sagður hafa þorað á teppið. Ég veit ekki hvort hann fór á teppið í alvöru eða hvort hann flúði land. Skiptir það máli? Óli kallaði á Snata og það ætti að vera nóg til að landsmenn láti svona mafíustæla ekki ganga yfir sig lengur.
---
En auðvitað ekki. 40% landsmanna eru Snatar sem vilja Óla. Elska Óla. Sama þótt Óli sparki í punginn á þeim, þá elska þeir Ólann sinn alltaf jafn mikið, því þeir eru villuráfandi hvuttar sem halda að þessi Óli sé sá eini sem á hundakex og kökur um jólin. Voff voff!
---
Er ég geðveikur að segja þessa sögu? Vakna ég í nótt upp við það að Óli eða félagar hans standa yfir mér með kodda tilbúnir að þagga niðrí þessum óða hundi, mér? Fæ ég aldrei listamannalaun sama hvað ég rembist? Verð ég rekinn af Skjá einum og Rás 2? Hvað á maður eiginlega að halda? Fylgist spennt með og passið ykkur nú að gelta ekki of hátt. 10:30

17.10.02
Þá er komið að enn öðrum "massa-fimmtudaginum": Brjálað að gera hjá mér. Við tökum upp tvo þætti af Popppunkti í dag. Og ÞÚ, já ÞÚ!, mátt gjarnan koma og glápa á meðan við gerum það. Á meðan húsrúm leyfir auðvitað, en af því er nóg. Upptakan fer fram í stúdíói Skjás eins, sem er í gráum steinsteypukumbaldi beint á móti Pítunni eða svo, gengið inn af bílastæði. Við byrjum að taka upp fyrri þáttinn – Sykurmolarnir - Rokksveit Rúnars Júl – kl. 17 svo það er gott að mæta svona um 16:30. Upptaka á seinni þættinum – Fræbbblarnir - SSSól – hefst kl. 19 og þetta er búið svona 20:30. Á milli þáttana verður pítza og svo verður öl og gos í boði. Gott grín myndi ég áætla.
---
Ég held þetta verði nokkuð jafnar keppnir. Ég hef lagt dag við nótt að skrifa góðar spurningar sem ég held að séu engum í neinn sérstakan hag. Var ekkert mikið að spá í það hvað þetta fólk myndi hugsanlega vita og sá sem vinnur er bara einfaldlega betur að sér í almennum poppfræðum. Fyrir Sykurmolana mæta Björk, Magga og Þór, nei nú lýg ég! Hinir þrír koma, en Rúnar Júl tekur með sér syni sína Júlla og Baldur sem hafa verið að spila með kallinum. Fræbbblarnir verða Valli, Stebbi og Helgi og SSSól að ég tel Helgi, Eyjó og Jakob. Topp lið allt saman og ég iða í skinninu af tilhlökkun eftir að sjá hvernig þetta spilast allt saman. Syk-Rún verður svo frumsýndur 19. okt, en Fræbbbl-Sól 26. Massastuð.
---
Eftir þetta akkorð fer ég á Rás 2 og verð með Alætuna frá kl. 22:10. Tek aðeins mið af Erveifs og Ferveifs, en spila svo allskyns dót; Kiddi Kanína kemur líklega með Færeyinga og allskonar kúl krakkarokk fær að óma í tilefni af hinni snillingslegu plötu Búdrýginda:

Ef þú ert ekki nú þegar búinn að fjárfesta í þessu rokkskrýmsli ættirðu að gera það núna. Þetta er skipun.
---
Annars ætti að gefast tóm til að blogga aðeins af viti þegar þessi syrpa er afstaðin. Mig langar að blogga aðeins um reykingar, túrisma og eitthvað svona. Tékk mí sún. 07:30

15.10.02
Það á ekki af henni Heiðu vinkonu minni að ganga. Fyrst er gítarnum hennar stolið og svo hjólinu. Skítt með hjólið en gítarinn er sorglegt mál. Blár Fender Telecaster (USA):

Einhver dópræfilinn komst inn í æfingarhúsnæði Heiðingjanna í Brautarholti og tók þennan eðalgítar ásamt öðru dóti frá öðrum böndum sem æfa þarna. Vínyll ku m.a. hafa misst helling. Þessi gítar er uþb 15 ára og áður í eigu Þórs Eldon, sem notaði hann í Sykurmolunum. Heiða er alveg miður sín og ekki furða. Þetta er ömurlegt rugl og allt heilbrigðiskerfinu að kenna, eða Sjálfsstæðisflokknum sem týmir ekki að halda svona aumingjum af götunni. Nei nei, bara mannlegt drasleðli... Ég, og aðallega Heiðu, langar alveg óstjórnlega að heyra í öllum sem kunna að vita hvar gítarinn er niðurkominn. Þetta er kannski langsótt, en sendu línu ef þú veist eitthvað. Fundarlaun etc.
---
Hvað er þetta?! Eru allar fitubollur landsins orðnar mjóar nema ég? Sá Eyþór úr Bong á förnum vegi og hann svona líka léttur á fæti. Hélt hann færi að syngja frystikistulagið með Tappanum, hann var svo sprækur eitthvað. Sá hann líka í S&H og hann svona líka grind. Dáldið geðveikur til augnanna þó. Sá líka Einar Bárðason í S&H og hann er orðinn tálgaður, sýndist mér, en þó með sama geðveikisglampann í augunum og Eyþór. Eru menn hér umvörpum komnir í amfetamínsterana? Nei. Skilst að Einar hafi farið í eitthvað "fatfarm" í Tælandi, en Eyþór bara pumpað og drukkið 6 lítra af vatni á dag. Hann hlýtur að vera með eina stærstu blöðru landsins.
---
Ég get ekki látið mitt eftir liggja í fitunni og verð örugglega með Eyþóri framan á S&H innan skamms með fyrirsögninni "Doktorinn gerði kraftaverk á sjálfum sér með hjálp Eyþórs". Fæ víst rosalega ódýra tíma í þessu Planet Puls (sem starfsmaður Skjás 1s), en það er bara verst hvað það er ógeðslega leiðinlegt að hanga í þessum tækjum. Mætti ég þó frekar biðja um badminton. Vantar ekki einhverjum fjórða mann í fasta tíma eða eitthvað?
---
Skil heldur ekki hvað yrði unnið þó ég væri 25kg léttari. Fötin sem ég hef komið mér upp myndu hanga utan á mér og ég yrði að fata mig upp frá grunni eða að nota eitthvað sem ég keypti fyrir 15 árum síðan – vissulega kúl retro gaur, kannski. Ekki þarf ég að lúkka slimm fyrir konuna og hvaða rugl er þetta þá? Ja, kannski spurning um almenna vellíðan eða eitthvað. Vottever. Sjáum til. Verður eflaust svaka átak bráðlega. Einkaþjálari og læti.
---
Fór á ágætis nýjan íslenskan veitingastað í gær og hef bætt í gagnrýnina. Nenni ekki að skrifa um það sem ég át erlendis, enda græðir enginn neitt á því. Og Poppæs bara farið á hausinn? Helvítis rugl er það.
---
Vinir mínir skrifa á netinu eins og þeir eiga lífið að leysa. Mikael er með ýmislegt á heilanum og hefur skrifað pistil um heilbrigðiskerfi á heimasíðu JPV. Kannski ekki mest spennandi umfjöllunarefni í heimi (nema þegar maður er veikur) en ágæt grein hjá Mikkanum. Grímur er með Sjálfsstæðisflokkinn á heilanum og segist hafa skrifað einhverja svaka grein á heimasíðuna sína, en ég fann nú ekkert. Hmmm...? Ég þarf kannski að leita betur, en þoli bara ekki þetta blogspot drasl sem hann notar. Birgir er að vanda með trúarbrögð og guð á heilanum og hefur löngum fengið útrás í leiðinlegri rökræðu við vitleysinga. Hinn agureyski HC (sem er með ekkert sérstakt á heilanum nema kannski sjálfan sig – og er því ekki ósvipaður mér í því sambandi) er þó enginn vitleysingur og sendir Bigga tóninn á korktöflu Birgis. Úr þessu er orðin heljarinnar romsa sem aðeins helstu nötkeis landsins endast í að lesa. Knokk jorself át. 14:00

13.10.02
Jæja. Var ekki alveg jafn steiktur og mig minnti í PPPP í gær, en Felix var nú líka farinn að steikjast í eigin þreytusafa svo þetta jafnaðist út. Gaman að því. Jú, ég var full erfiður í garð Mausara, hafði bara ekki siðferðisþrek til að sjá það fyrir, en þeir voru nú bara að klikka á spurningum sem ég hélt þeir hefðu, t.d. þessi um Factory Records. Ég held bara að "óver oll" hafi Pops verið betri, og kannski engin furða miðað við aldur og fyrri störf. Elwar vill komast í kofann þegar tekið er upp og er það guðvelkomið. Ef þessi popppunkts-síða á www.s1.is væri komin upp væri hægt að skrá sig þar en eins og er verður fólk að fylgjast með hér. Næsta upptaka er nk. fimmtudag (17. okt) og hefst að ég held um kl. 17 og stendur til svona 21. Það verða teknir upp tveir þættir: Sykurmolar - Rokksveit Rúnars Júl og Fræbbblarnir - SSSól. Á milli verður boðið upp á öl og flatbökur. Öllum er velkomið að mæta eins lengi og fólk hagar sér sæmilega vel og er ekki með frammíköll, eins og þessir hasshausar sem mættu síðast og létu Pops halda að 1000 andlit væri Tottmóbíl. Það þarf ekkert að skrá sig, þið mætið bara í góðu stuði. Ég verð með frekari tímasetningu þegar nær dregur.
---
Keypti grilljón vinílplötur í Kolaportinu í gær, en segi ekki hvað því þessa dagana er ég ein mistería enda að semja hinar dularfullu poppspurningar. Keppendur gætu komið hingað og séð hvað ég var að kaupa og þar af leiðandi lagt saman 2 og 2.
---
Óli í Köben var um daginn að spyrja hvort "venjulegir lúðar" gætu keppt í PPPP og nú er útlit fyrir að svo verði því einn þátturinn verður svona "utandeildarleikur" þar sem pælingin er að "venjulegir lúðar", sem samt vita ógeðslega mikið um poppedírokk, verði í liði á móti frægu poppheilaliði eins og Óla Palla. Það verða bara 3 "lúða" poppheilar sem komast í liðið og við byrjum örugglega að taka á móti umsóknum bráðlega. Þessi þáttur verður tekin upp rétt fyrir jólin. Ég ætla að taka forskot á sæluna: Skrifaðu okkur og segðu okkur afhverju ÞÚ ættir að vera í "Popplandsliði götunnar". Láttu okkur vita símann/símana þína og taktu fram þín helstu sérsvið á lendum poppedírokksins (= "dægurtónlistar").
---
Sá nýja stuttmynd e. Ara Eldjárn í gær. "Tindar" heitir hún í höfuðið á samnefndri ímyndaðri hljómsveit, sem átti að hafa verið heit í kringum 1970. Myndin fjallaði þó aðallega um trommarann 30 árum síðar (ágætlega leikinn af Kristjáni Séð og Heyrt) og nostalgíukast sem hann fær þegar sonur hans dregur trommusett inn í bílskúr. Nokkuð gott hjá Ara. Flott gerð mynd og "gömul" myndskeið fiffuð á sannfærandi hátt. Fannst fyndnast þegar Tindar eru í spjalli við Rúv 1970 og segjast syngja á ensku því Svavar Gests hafi sagt það betra upp á að fá dreifingu í Svíþjóð. Það hló enginn annar í salnum. Ari sagðist hafa verið innblásinn af Eru ekki allir í stuði þegar hann gerði myndina og er það gott. Mér finnst einmitt að í þeirri bók búi 1000 og 1 stuttmynd. Ari segist kannski ætla að stækka konseptið og er það vel. Þessi stuttmynd er ágætis innlegg í stærra dæmi en stendur varla kyrfilega óhaggandi svona ein og sér. Maður vildi fá meira... 06:10

11.10.02
Fór í miðbæinn og sá þessa Skotabjána. Nokkrir ungir Skotar í pylsum hömuðust baulandi fótboltabullubaul fyrir framan gamla Útvegsbankann (ö, Hæstarétt?) og höfðu glaðar fermingastelpur safnast utan á bullurnar. Gengu sjússar á milli og munu eflaust nokkur meyjarhöft bresta þegar á líður. Gaman að því. Góð íþrótt gulli betri.
---
Bjarni Móhíkani var hins vegar í hrókasamræðum við öryggisvörð Landsbankans.
---
Í apóteki kom amfetamínsjúklingur að máli við mig. Hann sagði mér hversu vel hann fílaði PPPP og brosti tannlausu brosi. Hress sendill var á sömu skoðun í pósthúsinu. Í heita pottinum sagðist Ísólfur Gylfi vera að fíla þetta og maður um sextugt sagði að þetta væri "helvíti góður þáttur hjá ykkur Felix". Það er því ljóst að allir eru að fíla PPPP, og ég hlusta ekki á neitt annað. Nema það sé uppbyggilegt. Tala í lausnum, krakkar.
---
Þátturinn annað kvöld - Maus / Pops - er hins vegar sá súrasti til þessa, enda var ég snarsteiktur af svefnleysi og rugli samfara því þegar hann var tekinn upp fyrir rúmri viku. Ég man ekki neitt hvað var í gangi í þessum þætti og hlakka því til að sjá'ann. Man þó að ég remdist við að halda haus allan tímann og að standa mína pligt. Ég var næstum því búinn að komast í gegnum þetta þegar ég klúðraði öllu á frábæran hátt í blálokin. Þið tékkið á því. Það er því ekki nóg að við séum að stæla "Gettu betur" og "Kontrapunkt", því á meðan ég er svona steiktur erum við búnir að blanda "The Osbournes" í mixið líka. Ég bind þó vonir við að ég fái ekki aftur flugþreytu svona uppúr þurru.
---
Svo eru bara 3 þættir eftir í 16-liða og mér skilst að þetta verði leikirnir:

19.10: Sykurmolarnir - Rokksveit Rúnars Júl
26.10: Fræbbblarnir - SSSól
02.11: Rokkslæðan - Oxzmá

18:40
---
Hvassegja krakkarnir, ha? Var með fína Alætu í gær og Siggi Pönk fór á kostum. Ég spilaði Black Sabbath fyrir gaur sem var að hamast í vinnu í Kárahnjúkum. Var ekki búið að hætta við það? Ég veit það varla: ég er alveg lost í þessu virkjunardrasli öllu. Fatta hvað liðið sem vill vernda er að spá og fatta hvað gaurarnir sem vilja virkja og byggja verksmiðjur og drasl eru að spá. Get því ekki ákveðið mig í þessu máli og segi bara pass - má það ekki? En allavega gott að ég fann lag fyrir Kárahnjúksgaurinn - hann hringdi í Alætuna og sagðist ekki vita lengur hvort það væri dagur eða nótt þarna fyrir austan. Örugglega sveittur á einhverri ferlýkis vinnuvél. Vonandi fær hann ágætis aur fyrir þetta. Glatað að leggja svona rugl á sig og fá ekki almennilega umbun.
---
Það er allt í lagi að biðja um óskalög í komandi 'ætur. Einn vildi "Kyrkingaról" með Tolla. Sagði það passa vel við þjóðfélagsástandið í dag. Ég ætlaði að setja það á fóninn í gær en svo var helvítis platan ekki á svæðinu. Það mál er í vinnslu. Sendu bara línu, ef þú vilt að ég spila eitthvað hressandi.
---
Við Lusulufs fórum í sætsíing þegar við vorum í Vegas. Fórum í rútu að skoða Hoover Dam. Rútukarlarnir í Amríkku eru allir stand-öpp grínistar í fjötrum. Þessi reytti af sér djókin en var fræðandi um leið. Hundleiðinlegt Kana helvíti. Svo kom löggan og skoðaði inn í rútuna áður en við komumst inn á stíflusvæðið. Þeir skíthræddir auðvitað að Bin Laden væri mættur með bombu. Var ekki svona fyrir 11. sept, sagði rútudjókerinn. Löggan var líka stand-öpp grínisti í fjötrum. Fór með vel smurð gamanmál. Fannst ég dólgslegur og spurði hvaðan ég væri. Fannst Æsland of framúrstefnulegt til að ég væri hættulegur.
---
Leiðrétting: Að gefnu tilefni skal tekið fram að með þessum snarpa ritstíl er ég ekki að stæla Eirík Jónsson.
---
Stíflan Hoover Dam? Jamm, jú jú, hin þokkalegasta stífla og allt sko. Maður var svimandi lofthræddur að horfa niðraf henni. Datt bara Harrisson Ford í Fugitífs í hug. Ógeðslega heitt þarna, enda við stödd í miðri eyðimörkinni. Það dóu víst margir við gerð stíflunnar. Minnsimerki um þá. Meira að segja flækingshundur, sem verkamennirnir höfðu tekið í fóstur, en hafði dáið í slysi, átti sitt minnismerki þarna. Var grafinn í steypunni þarna ofan á stíflunni og platti og allt. Mér fannst það eiginlega merkilegast við þessa ferð. Já, Kana greyin. Jú, þeir eru barnalega einfaldir og eitthvað sætt við þá á svona Lassílegan hátt.
---
Svo keyrði rútan til baka í Las Vegas geðveikina og rútudjóker djókaði látlaust, enda eins gott því rúsínan í hans pylsuenda var tippsið að lokinni ferð. Tipps-sístemið gerir það að verkum að allir Kanar í þjónustuiðnaði eru sírövlandi um allt og ekkert. Halda að þeir fái meira tipps ef þeir eru svona "almennilegir". Fyrst fannst okkur þetta bara sætt, en svo var þetta farið að fara óstjórnlega í taugarnar á okkur. Í lokin vorum við farin að æla við tilhugsunina. Vorum kannski að éta eða kaupa eitthvað einhversstaðar og þá byrjaði rullan: Hvaðan eruði?, hvert eruði að fara?, hvað geriði? og svo framvegis. Við auðvitað of þægileg til að biðja fólkið vinsamlegast um að halda kjafti. Ég vona að tipps-sístemið komist aldrei á hér. Það er bara notalegt þegar fólk í þjónustustörfum er passlega hranalegt.
---

Felix er búinn að skrifa annan pistil um reynslu sína af Popppunkti. Það er verið að setja upp almennilega síðu fyrir þennan geggjaðsgóða þátt, en þetta tekur allt voða tíma því strik.is er eitthvað með í þessu og endalausar flækjur og bull. Annars eru Felix og Smalinn og fleira gott fólk að fara að setja upp leikrit í Vesturporti sem ku brjálæðislega gott. Heitir Kvetch. Það er komin heimasíða með dæminu. Tékk it. 07:15

09.10.02
Svona hættiði nú að dissa Kolbein greyið. Þetta er ábyggilega fínn strákur, sem hitti bara á mig í eindæma fágætu geðvonskukasti. Annars voru stelpur um daginn að skrifa á Innanbleiku um gildi kvennatónlistar og voru alveg gaga að ég skildi hafa kallað stelpur í rokki og rafi "frík". Þær ættu þó að vita að "frík" í mínum huga er mjög jákvætt, enda tel ég sjálfan mig ekkert annað en hreinræktað frík. Stelpur í mússekk gera yfirleitt mjög ferskt dót, enda hin "kvenlegi blær" ferskur í þessum pungsvitabransa. Kvennabönd eins og The Slits, Raincoats, Shaggs og hinar japönsku Go-Bangs eru allar í miklu uppáhaldi hjá mér, en íslensk kvennabönd mættu vera fleiri, ekki satt?, og stelpur í þessum strákabransa mættu vera helmingi fleiri, ef ekki miklu meira en það. Stelpurnar ættu þó að hoppa af gleði við það sem ég segi þeim núna: Að Rokkslæðan mun að öllum líkindum vera bráðlega í Popppunkti. Áfram stelpur! Jákvæð mismunun, húrra!
---
Sjálfur verð ég hjá Grjóna á Radíó-X kl. 9 í fyrramálið að taka púlsinn á stuðinu. 17:15
---
Æ ég var nú fullleiðinlegur við Kolbein greyið. Hann meinti örugglega vel. Það er samt ljóst held ég að ég verði eitthvað minna í blogginu en áður, enda miklu meira að gera hjá mér en þegar heilu doktorsritgerðirnar runnu hér um síður einu sinni. Þið vitið að maður þarf að forgangsraða og það sem mar fær pening fyrir gengur fyrir. Þið ættuð að sjá helvítis Visa-reikninginn, mar. Ekki það að einhver hafi verið að neyða mig til að eyða öllum þessum peningum - en jæja: mar fer bara einu sinni í hónímún.
---
Alætan annað kvöld á Rás 2 - Siggi Pönk (yngri) verður með óskalagahornið og ættu eyrun að bráðna af einhverjum við þau ósköp. Gaman gaman.
---
Ég er allur að koma til í svefnleysisgeðveikinni. Tók á þessu með heitum pottum og svo lét ég Láru á Nuddstofunni Umhyggju nuddast í mér. Hvort um sig var stórkostlegt. Ég tek heitu pottana kl. 6:30 um leið og gamla liðið og þegar ég lagðist flatur í heitasta pottinn í Vesturb.lauginni var ég 5 sek frá sáðláti - hvílík sæla. Ekki var nuddið síðra. Slökunarnuddið ber nafn með rentu og ég var eins og undin tuska þegar Lára hafði lokið sér af. Var næstum kominn með bullandi standpínu þegar hún var að hamast á ofanverðum lærunum, en gat beint heilanum á aðrar brautir sem betur fer. Eftir nuddið var ég látinn liggja eins og drusla á beddanum og snarsofnaði um leið. Svaf örugglega í klukkutíma og hraut eins og biluð jarðýta. Ég held að karlinn sem var í slökunarnuddi við hliðina á mér hafi ekkert verið að fíla mig, he he. En nú ætla ég í heita pottinn og svo á ég tíma hjá nuddstofunni Umhyggju á föstudaginn. Hvílíkur lukkunar pamfíll (pamfíll - vot ðe..?) maður er. Nudd og pottar og svo er maður giftur bestu konu í heimi í ofanálagt. 06:15

08.10.02
Djöfull þoli ég svona vanþakklátt lið eins og þennan Kolbein sem vælir grenjandi og rekandi við um að ég sé ekki skemmtandi honum út í eitt. Heldur þetta pakk að ég hafi ekkert betra að gera? Drullastu bara til að gerast áskrifandi af Lifandi vísindum eða eitthvað. Mér er skapi næst að steinhalda kjafti þar til þessi móngólíti hefur beðist afsökunar. 18:16

07.10.02
Kæra fólk. Er enn einum of slappur til að skrifa mikið. En er á batavegi, takk. Hef sofið þokkalega vel sl. daga og án þess að éta svefntöflur - er m.a.s. hættur að keðjureykja. Ætli maður fari ekki bara í svett til Nonna Indjána til að ná sér almennilega niður?
---
Já þátturinn með Ham-Írafári var massakúl og ef Orri Harðar segir að Egill hafi sungið þetta já-já-lag en ekki Bjólan er eins gott að Ham unnu. Auðvitað átti ég triple-tékka það dæmi, en var bara einum of steiktur. Jú liv og lörn. Bráðaspurningin kom okkur gjörsamlega í opna skjöldu því við höfðum bara ekkert hugsað út í þann möguleika. Sem betur var ég með spurningar í töskunni í einhverju bríaríi, en allt sem var á blaðinu voru spurningar sem ég hafði verið með í morgunþætti Sigurjóns - nema tvær spurningar og önnur þeirra var þessi um Jóhann G og bassann. Jú það er góð hugsmynd hjá Esju að draga þetta úr potti næst, takk fyrir það.
---
Annars á ég afmæli í dag (37 ára - kan jú belíf it?) og ætla bara að sluxa um í náttfötum og éta (hef misst 5 kg sl. viku - ekki eins og það sjáist högg á vatni). Farið vel með ykkur. 05:00

05.10.02
Súrrealisti vikunnar:

"Það eru fortíðardraugar að gerjast í farangrinum"

Þorgrímur Þráinsson (eða einhver fótboltasnillingur sem var líka) að tjá sig um fótbolta á Rás 2 í gær.
---
Það ætti öllum að vera ljóst að blogghlé mitt hér á síðunni er vegna svefnleysis, brjálæðra anna, og snerts af geðveiki sem ég varð fyrir í kjölfarið. Það hjálpaði því ekkert þegar ég heyrði þessa setningu Þorgríms (eða hins) úr vasatækinu mínu hver ég gekk keðjureykjandi í Gefjunarúlpu um Nauthólsvík í tilraun til að ganga í mig þreytu (til að geta e.t.v. sofið eins og maður í kjölfarið.) Ég myndi segja ykkur frá þessu öllu saman ef ég væri ekki ennþá hálf ruglaður.
---
Ég mæli með að allir lími sig við skjáinn kl. 9 í kvöld þegar Ham og Írafár mætast í Popppunkti. Þetta er að öllum líkindum sá mest spennandi spurningaþáttur sem sést hefur í íslensku sjónvarpi frá upphafi. Mjög góða skemmtun!
18:00

02.10.02
Ég er allur að braggast, enda leitaði ég aðstoðar besta læknis landsins. Hann lét mig hafa tvær tegundir svefntaflna til að ráðast á svefnröskunar/andvöku-vandann. Eina pillu Imovan tók ég strax kl. 10 í gærmorgunn, en átti samt erfitt að sofna. Það var ekki fyrr en steiktur hausinn á mér sveif um ís-breiður Grænlands að mér tókst að slökkva á heilanum og sofna. Var reyndar áður búinn að klæða mig alsberan í svona eskimóa-úlpu með loðhettu, fannst það við hæfi þarna á sléttunum. Lufsan fékk kast og tók mynd þegar hún kom heim.
---
Vaknaði nokkuð hress kl. 15 og tók törn í að semja PPPP-spurningar. Um kl. 22 var komið að part-2 í masterplani læknisins. Þá poppaði ég annarri Imovan og einni Surmontil, sem læknirinn sagði mér að væri gamalt þunglyndislyf. Reynslan af þessu Surmontili voru aukaverkanirnar: gríðarleg syfja. Það þótti víst ekki passa að þunglyndissjúklingarnir væru sífellt sofandi hér og þar, nógu slappir væru þeir fyrir. Því var lyfið tekið úr umferð, en ennþá gefið við svefnleysi. Af þessari blöndu tókst mér að sofa til kl. 05 í nótt, sem var nú bara alveg frábært! Mér létti stórum að þessi pillukokkteill virkaði því ef ekki hefði næsta skref verið að nota Mogadon, sem mér leist nú ansi illa á að ég ætti fara að bryðja í tíma og ótíma, enda vinsælt efni meðal dópista (skilst mér). Nú er bara að vona að með hjálp lífefnafræðanna (eru þau ekki yndisleg?) takist mér að komast á réttan kúrs hið fyrsta.
---
Hef annars lokið við að semja spuringapakkann fyrir PPPP#4: Ham - Írafár. Í dag þarf ég að semja PPPP#5, eða Maus - Pops. Eins og áður reyni ég að gæta fyllsta hlutleysis. Svo verður upptaka á morgun, fimmtudag. Þetta verður maraþondagur og eins gott að ég verði orðinn ágætur í hausnum. Upptakan byrjar kl. 17 niðri á Skjá einum. Þú, já þú, ert velkominn að koma og vera gestur í sal. Þá þarftu að mæta kl. 16:30 (Staðsetningu Skjás eins finnurðu í símaskránni) og vera tilbúinn að eyða 4-5 tímum á svæðinu, því við tökum nefnilega upp 2 þætti á morgun. #4 ætti að vera búinn kl. 18:30 og þá er hlé þar sem bjór og pítsur verða í boði fyrir gesti. Upptaka á #5: Pops - Maus, byrjar svo um kl. 19 og varir í mesta lagi til kl. 21. Hljómar þetta ekki bara nokkuð vel sem ævintýraleg afþreying fyrir þig á rigningarlegum fimmtudegi?
---
Ég fer svo beint upp á Rás 2 eftir upptökuna á PPPP til að gera ALÆTUNA í beinni. Ég leik krassandi stuðlög að mestu en gestur minn verður Hildur söngkona í Rúnk. Hún er fyrsta kvendýrið sem velur óskalög hjá mér (þessi þáttur er #50) og ég hnegi höfuðið í skömm og vana að Jafnréttisráð kæri mig ekki. En ég meina, er það mitt vandamál að stelpur nenni ekki að rokka og rafa? (nema einhver frík).
---
Mér vöknaði um augun og varð meyr þegar mér barst þetta rafskeyti í gær:

Sæll Gunnar,
við á Baggalúti óskum ykkur Bjarnveigu innilega til hamingju með brúðkaupið
og óskum ykkur velfarnaðar um alla framtíð.

Dreyminn unni doktor Gunni
dís frá Ísafirði
það að hún vildann - og hreinlega þyldann
þykir mér mikils virði

Lifið heil,
Enter.

07:40

01.10.02 (er það ekki annars?)
Hef ákveðið að gefast upp fyrir aðstæðum. Ég bind vonir mínar við það sem mér var sagt að það taki 1 dag að vinna upp hvert tímabelti sem maður tapaði. Bind altso vonir við að ég verði orðinn ok á miðvikudaginn 9. október. Ég þori ekki að tjá mig mikið að sinni af því ég er hræddur að það yrði algjör steypa, því fyrir utan flugþreytuna er ég í maníukasti og það er geðveikt að gera og þar að auki er ég orðinn strompreykingamaður (meira um það síðar). Lufsan er slöpp líka og rugluð, en aðeins skárri. Varð aðeins fúl þegar ég truflaði einbeytinguna hjá henni og fór að hlægja upp úr eins manns hljóði á koddanum áðan. Þá hafði ég verið að sjá fyrir mér meðlimi Ham í Hopp og popp-hluta Popppunkts.
---
Ég hlýt að geta svarað nokkrum innanbleikum skeytum þótt tæpur sé. Þúsund þakkir til allra sem eru með hamingjuóskir og jákvætt pepp á popppunktinn. Ég verð nú bara meyr eins og grenjuskjóða á Óskarskvöldi þegar ég hugsa um ykkur. En jæja:

Sæli sagði: Velkominn heim Gunnar. Þú hlýtur nú að hafa farið töluvert út að borða í ferðinni. Hvernig væri nú að bæta nokkrum amrískum veitingastöðum við gagnrýnina?

Ég svara: Jú, það kemur.
---
Óli í Köben spyr: Verdur einhverntimann poppspurningathattur thar sem venjulegir ludar eins og eg fa ad taka thatt? (Er ekki ad bøggast, bara ad spyrja kurteisislega).

Ég: Svarið við þessu er of flókið til að ég meiki það núna, en beisiklí gengur það út á kross-óver-pótensjal og útfærsluatriði og slíkt. Það kemur að þér Óli, æm sjör.
---
Símon: Er möguleiki að þú getir bætt við link á heimasíðuna þína tileinkaða þættinum þínum PPPP. Þá getur þú birt spurninarnar sem voru ekki spurðar og svo framvegis. Hvernig valdir þú liðin? Getur þú birt hvað lið eiga eftir að mætast?
---
Ég: Línkur kemur. Poppp-síðan kemur. Lið/bönd voru valin með hugsanlega popplega getu í huga og stundum frægð. Það eru 16 lið sem verða í þessu og við reynum að hafa fjölbreytni í hópnum. Ég get ekki sagt þér hvaða lið þetta eru því við erum einfaldlega ekki búnir að negla það. Ég get þó sagt þér þetta:

5 okt: Ham - Írafár
12 okt: Maus - Pops
---
Shregg: Ég styð þig með Conan málið, hvernig væri að setja undirskriftasöfnun á vefnum þínum af stað?

Ég: Ég var einmitt búinn að hugsa það sama og er meira að segja búinn að hanna bannerinn í huganum. Átakið mun heita VIÐ VILJUM CONAN. Getur eitthvað tölvuséníið bent mér á tæknilega lausn á svona lista?
---
Dúllarinn: Afhverju ert þú ekki meðal kynþokkafyllstu manna á Íslandi samkvæmt vikunni? Þetta er fólk sem veit ekki að fegurðin kemur að innan!!! ++++RASSGAT++++
P.s. skyrturnar eru snilld sem þú ert í í pppp...

Ég: Ég veit. Hvað þarf maður að tönglast á þessu oft: Fólk er fífl. Takk: 15 þættir = 15 skyrtur.
---
Jæja, best að fá sér meiri Marlboro. Kannski að hita kaffi líka? Djöfull hlakka ég til 9. október. 04:15

30.09.02
Brjálað að gera mar. Maður þarf að borga Visa-reikningana, jú nó.
---
ALÆTAN fer aftur í loftið á fimmtudaginn. Ennþá á Rás 2. Ennþá kl. 22:10.
---
Afhverju er enginn að tala um nýja Sánd blaðið? Mér finnst það algjörlega frábært og það er magnað að þetta eru mest einhverjir undir-20. krakkar sem gera þetta (+ einstaka gamall hundur). Ég votta hér með að þetta nýja tölublað (Sigur Rós framan á) er það langbesta sem gerst hefur í tónlistartímaritaútgáfu á Íslandi. Ég var marga tíma að renna yfir það allt og það var hægt að lesa alveg helling. Blessað Undirtónar er eins og ofvaxinn sjónvarpsvísir við hliðina á þessum svakalega pakka. 20:15

29.09.02
Jæja mér tókst bara að sofa í 3 tíma þrátt fyrir að gleypa svefntöflu. Ég er að verða einhver Drakúla hérna. Alveg fínt svosem, enda er svefninn leiðinlegasti hluti sólarhringsins. Ég var að spá í hvort einhver lesandi ætti ekki eintak af spólunni Snarl 3 sem ég gaf út fyrir 11 árum. Ég var nebbla sá sýruhaus að glopra út úr lúkunum öllum eintökunum mínum og á ekkert sjálfur. Mér langar ekkert sérstaklega til að heyra þetta aftur, en ef einhver nennti að segja mér hvaða hljómsveitir voru þarna yrði ég voða voða glaður. Kannski bara skann af umslaginu? Meilið mitt er hér.
---
Sá Elling á vidjó í gær (aftur) og stend alveg við 9.5 sem ég gaf henni. Hló jafn mikið og fékk kökk. Leið reyndar ekki eins og Móðir Teresa þegar myndin var búin. Svo fannst mér hún miklu styttri en í bíó. Ég er búinn að fatta að ef myndir fá yfir 9 hjá mér þá þýðir það að ég er til í að sjá þær aftur. Yfirleitt finnst mér nú tímasóun að glápa oft á sama dótið. En ég er t.d. búinn að sjá Ghost World aftur og fílaði alveg jafn vel.
---
Við Lufsan fórum slatta á bíó úti, á splúnkunýjar myndir (svo sem sama dótið og hér - það er af sem áður var, takk Árni Sam!), og ég er búinn að eyða nokkrum orðum á þær á gagnrýnissíðunni. Þægilegt að sjá myndir án hlés. Annars var úrvalið heldur slappt þar sem við vorum, en mér skilst að september sé dauður mánuður í þessu þarna úti, sumarsmellirnir búnir og verið að bíða eftir jólageðveiki. Á þessum tíma koma því oft út einhverjar súperglataðar myndir eins og t.d. Stealing Harvard, ný mynd með Tom Green, sem mér finnst fáviti.
---
Sjónvarpið var líka að byrja með vetrardagskrána - fyrstu þættirnir af nýjum (og gömlum) þáttarröðum voru að detta inn. Svo voru bara stanslausar endursýningar - húkkaðist t.d. algjörlega á Everybody loves Raymond, sem er frábær þáttur. Það er frábært að hann sé á undan PPPP á laugardagskvöldum á Skjá eittnum. Sá fyrsta þátt nýrrar seasonar af Frasier, alltaf ágætt. Sá einhverja nýja þætti líka. Allt hálfgert drasl. Sá líka David Letterman, Leno og Conan. Ég skil nú ekki alveg hvaða dálæti margir hafa á Letterman. Jú jú voða meinlaust og nett svona, en ekkert spes verð ég að segja. Leno er náttúrlega fáviti og þessi endalaust flissandi freðni gítarnegri er nú þokkalega takmarkaður. En það má svo sem glápa á hökuna í harðindum.
---
Nei, kóngur spjallþáttana er að sjálfssögðu CONAN O'BRIAN! Lang fyndnastur og mest spontant. Lang besti húmorinn í gangi, flottasta stúdíóhljómsveitina og kúlustu böndin eru hjá honum. Snilld eins og móðgunarhundurinn Triumph og önnur innslög tryggja að Conan er 100% val hugsandi fólksins og snillinga. Ég nefndi við Árna Þór, eða vin minn AÞ eins og ég kýs að kalla'nn, að hann ætti nú að drífa Conan aftur á skjáinn í staðinn fyrir þessi Leno leiðindi. Árni útskýrði að enginn vildi auglýsa hjá Conan og að Leno væri vinsælasta efni S1 og svona (sama sama, fólk er fífl), en persónulega fyndist honum Conan frábær. Þá hefði ég átt að spyrja - En Árni; hvað segirðu um að setja Conan bara í loftið á eftir Leno? - en klikkaði auðvitað á að spyrja að því. Það hljóta að fara að koma einhver S1-fyllirí og þá verð ég bara að ráðist í málið og króa AÞ af inn á klósetti með Conan-ræðuna tilbúna. Er þaggi? 08:30
---
Ferðalagið er alveg búið að fokka upp svefnvenjum mínu. Þotuþreyta. Klukkan er 10 tímum á eftir á Havaíí og ég hef lítið sofið síðustu dagana. Sit því hér og hlusta á Næturvakt Rásar 2. Heiða næturvörður er í Frakklandi svo því er einhver sófi á vakt sem kann ekkert á tækin og spilar leiðinleg lög. Best ég setji bara winampinn á shuffle í staðinn.
---
Ah, þetta var betra - lenti á lagi með hinum ægigóða Bobby Conn.
---
Enn einn fullnaðarsigur í PPPP. Hélt þetta yrði meira spennandi enda búinn að semja spurningar sem ég vissi að Stebbi Hilmars ætti góðan séns í (valmöguleikarnir James Brown og Motown), en svo mætti bara aðalsálarhirðirinn ekki. Millar rúlluðu þessu upp og nú eru því 3 mjög sterk lið kominn áfram. Við vorum komin með vandaða stigatöflu (ekki handskrifaða) og svo voru glös á borðum (ekki flöskur). Ég ætla rétt að vona að hinir örðu gagnrýnendur á innanpíku hafi tekið eftir þessu. Ham - Írafár næst. Ég veit að Ham mæta með sterkt lið en veit lítið um popplega getu Írafársins. Þetta kemur bara í ljós.
---
Ég eyddi út innanpíkubleiku gestabókarinnslagi frá einhverjum "Jeffa" af því hann var með eintóm homma og rass og kúkaleiðindi í garð Felixar Bergssonar og Hemma Gunn. Þetta er mín gestabók og ég áskil mér rétt til að henda út bjánum. Það er ágætur klósettveggur í Kaffivagninum í Granda sem subbur geta tjáð sig á. Mér er drullusama þótt einhverjum þyki ég hér einum of "pc". Djöfullinn hafiði, ég er að verða 37 ára og má alveg vera smá pc.
---
Þegar ég var úti komst ég stundum á internetið en þurfti að borga slatta fyrir notkun á einhverjum netkaffihúsum eða sjálfssölum. Maður þurfti því að vera snöggur að finna eitthvað um hvernig stemmingin væri á Íslandi og hvort eitthvað væri að ske. Eftirminnileg fannst mér "frétt" á mbl.is um 3 rollur sem hefðu týnst á Hellisheiði (ef ég man þetta rétt) - þá klökknaði ég og flautaði "Íslandi er land þitt" titrandi röddu. Annars var auðvitað ekkert í fréttum og alveg sama hvað ég skrollaði upp og niður á visir.is og strik.is þá fangaði ekkert áhuga minn. Helst að Baggalútur gæfi manni stemminguna í þjóðfélaginu, og svo eru þeir þar að auki alltaf jafn helvíti fyndnir. Saknaði þess að geta ekki lesið samantekt á því hvað Sigurjón Kjartansson og kó hafði verið að tala um þá vikuna. 01:50
---

28.09.02
Æ það er helv fínt að vera kominn heim. Verð að játa að 4 vikur í að vera túristi/ger'ekki neitt var farið að taka á taugarnar. 2 vikur hefði verið massafín ferð, 3 vikur fín ferð, 4 vikur fín ferð en einum of mikið af "ekki neinu".
---
Las Vegas er auðvitað geðveik borg og möst að fara þangað allavega 1 sinni. Við sirka 4 km langa breiðgötu standa haugarnir af það sem þeir kalla hotel-casinos. Í hverju svona ferlíki er yfirleitt boðið upp á það sama. Þetta eru hótel á einhverjum billjón hæðum og taka flest svona 2-4 þús manns í herbergi. Neðst er casinóið - endalaust rými fyrir spilavíti. Í allar áttir teygir það sig og allsstaðar er fólk á öllum aldri að láta féflétta sig undir yfirskyni skemmtunar. Spilakassar í þúsundavís í hverjum sal + einhver rúllettu og pókerborð og "crabs" og ég veit ekki hvað þetta rugl heitir. Í hverju hóteli er svo stórir tónleikasalir þar sem listamenn hússins spreyta sig kvöldlega og heilu mollin + nokkrir veitingastaðir, mynjagripasjoppur, matvörusjoppur og jú neim itt.
---
Það fer allt eftir því hversu stórfenglegt hvert hótel er hvað í boði er fyrir utan spiladraslið. Sum eru með tívolí og rússibana önnur með kannski vatnagarð og hákarlabúr og eitthvað. Mörg þessara nýjustu eru með sitt eigið "þema", þar sem allt draslið er "í anda" einhvers. "Paris" er eins og nafnið segir í frönskum anda. Þar hafa þeir endurbyggt Effelturninn og Sigurbogann í raunstærðum og þessi "meistaraverk" Frakka standa hálf fíflaleg fyrir utan. Ameríkanar líta mjög upp til evrópskrar sögu og bæta upp eigið sögu- og menningarleysi með því að ausa peningum og byggja bara gamla draslið frá Evrópu í garðinum hjá sér. Við hliðina á Paris var Venetian (ekki Vietnam), en þar voru Feneyjar komnar eins og þær leggja sig mínus vatnarotturnar. Caesars Palace er í fornrómvörskum anda, Luxor í fornegýpskum, Sahara í arabískum o.s.frv o.s.frv. Þegar þessi ferlíkishús hætta að bera sig og eru orðin úrelt eru þau einfaldlega sprengd upp í heilu lagi og nýtt ennþá æðislegra byggt í staðinn þegar búið er að jarðýta draslinu burtu. Þetta gengur auðvitað allt út á að toppa síðustu geðveiki og næsta geðveiki á víst að vera eins og Versalir með plássi fyrir 10.000 manns eða eitthvað í herbergi. Við vorum mest hissa á að þarna væri ekki hótelið Eskimo þar sem herbergin væru eins og snjóhús og ekkert nema Grænlendingar á vaktinni.
---
Satt best að segja sáum við ekki Grænlending í 4 vikur. Og kannski það sem er ennþá furðulegra, þá hittum við enga Íslendinga í 4 vikur. Ég held það hafi verið hressandi upplifun.
---
Til að gestir eyði nú sem mest í þessa hálfvitalegu spilakassa er allt opið 24/7 allt árið og það er alltaf sama birtan inn á stöðunum enda skiptir ekki máli hvort það sé dagur eða nótt þegar maður er að "græða". Það eru engar klukkur á veggjum og allsstaðar má reykja úr sér lifur og lúngu. Búsið er eðlilega hræódýrt (fólk missir alla dómgreind auðvitað fullt) og maður þarf rétt að taka pásu frá því að ýta á spilatakkann og klikkja fingri þá er kerling í sokkabuxum mætt með glasið. Við vorum fyrst á Imperial Palace, fínt greni í léttum asískum stíl. Í spilasalnum var spiluð svona "Gullið-mússik" nonstopp og blandaðist saman við ólgandi dininn úr æpandi spilakössunum. Við lögðum ekki í að tapa öllu á einhverju borði en tókum smávægilegar tarnir við videó-pókerinn (alveg sömu kassar og eru hérna). Það var vonlaust að vinna eitthvað í þessum one-armed bandits, en við náðum það langt í þessu video-pókerdrasli að enda í 14$ "gróða" eitt kvöldið, og í $25 annað. Annars misstum við snemma áhugann á að húka við skjáina (fannst bara að við yrðum að vera með fyrst við vorum nú mætt í þessa geðveiki), en það var hálf sorglegt að sjá gamla liðið í hjólastólunum hangandi sljótt með klinkfötur við kassa.
---
Aðalmálið var auðvitað giftingin góða. Eiginkona mín, aka Lufsan, kom með sérhannaðan kjólinn með sér frá Íslandi, en ég fór í Western-búðirnar í LV og valdi mér undurkúl satínsvört jakkaföt með apaskinnsbryddingum og eðalgóða kántrískyrtu, rauða með nótnamunstri. Ég fór nú bara með spons-skóna úr Popppunkti með mér út því ég týmdi ekki að eyða í enn aðra spariskó, hvað þá að ég vildi fá mér kúrekastígvél, enda sá ég mig ekki í anda, hálkufælnasta mann landsins, ganga mikið í slíkum sleipustígvélum.
---
Það voru auðvitað kapellur inni á öllum þessum hótelum, en við vildum spes kapellu undir athöfnina og fyrir valinu eftir nokkurn samanburð og eftirlitsferðir varð sú frægasta, A little white chapel. Við mættum þarna borgaralega klædd og keyptum pakka. Biðum svo nokkrum dögum síðar eftir limmunni, uppáklædd, með hringana í vasanum og til í tuskið. Gaur sótti okkur á limmu og meðan við sátum aftur í á þessum hamingjudegi þurfti gaurinn auðvitað að röfla heil ósköp um sjálfan sig, að hann hafi nú verið in the navy og ég veit ekki hvað og hvað, eins og maður nennti að hlusta á ævisögu einhvers bílstjóra á sjálfan brúðkaupsdaginn. Við fórum svo á færibandið, fyrst að láta mynda okkur af hressum blökkumanni (20$ tips). 12 uppstilltar myndir fylgdu með í pakkanum og hér er ein komin á netið. Næstu hittum við loksins pastorinn sem ætlaði að pússa okkur saman. Lentum á Rev. Robert L. Stone (50$ tips), sextugum karli með flöskubotnagleraugu. Sögðum að við vildum giftingu án alls bulls um Guð, Jesú og þá félaga, og kallinn dæsti og samþykkti með semingi.
---
Svo settann videóspóluna í tækið (videó af athöfninni innifalin í díl) og kveikti á brúðarmarsinum. Þá gengum við í áttina til hans og svo var athafnast með "rípít after mí: Æ Gönner" o.s.frv. Kallgreyið reyndar alveg að fríka út á að bera fram "Bjarnveig", en þetta endaði allt vel og eftir 5 mín voru hringarnir settir upp og við gift! Þá var lagið "Æsandi fögur" með Hljómum (lagið "okkar") sett á fóninn og það var verulega heimilislegt að heyra í Rúnari Júl þarna. Séra slökkti reyndar full snemma á laginu enda hringdi gemsinn hans. Það hefði verið ennþá "hátíðlegra" ef kallinn hefði fengið símtalið í miðri athöfn.
---
Sá málglaði úr the navy (30$ tips þrátt fyrir allt rövlið) keyrði okkur næst á besta sushi-stað Vegas þar sem við átum í fyrsta skipti sem hjón. Svo taxi á nýja hótelið sem við vorum komin á, svítan á "New York New York" (jú jú, þema þess er NY) og þar var hjónbandið fullkomnað í jacuzzíinu.
---
Þannig var nú það. Daginn eftir, eftir viku í geðveikustu borg heims, hófst svo honímúnið á Hawaii. Meira um það þegar ég hef tíma. Maður þarf að byggja sig upp í blogginu eftir svona langt hlé.
---
Það á annars að taka upp popppunkt (aka PPPP) nr 3 kl. 17 í dag (laugardag). Ef þú vilt vera út í sal geturðu bara mætt svona 16:30. Örugglega fínn þáttur: Sálin á móti Milljónamæringunum. Páll Óskar Milli er búinn að æfa sig vikum saman og ætti að verða rosalegur. Hann stefnir alla vega að sigri í keppninni. Ég spái að þetta verði mest spennandi þátturinn til þessa.
---
Ég þakka annars hlý orð um PPPP í gestabókinni innanpíku. Mér sýnist flestir glaðir með þáttinn "í þjóðfélaginu" og sjálfum finnst mér hann frábær, þótt hann verði eflaust endalaust að slípast til. Felix er dúndurgóður í þessu og hefur skrifað pistil um reynslu sína. Ég doldið eins og fífl ennþá, skána kannski. Ég var alveg viss um að Stuðmenn myndu valta yfir ÍSFötum, en bæði voru ÍSFötum miklu betri en ég átti von á og SMenn slappari. Að Motorhead séu Sex Pistols, Ha, Jakob? - kommon. Maður var nú svosem 90% viss um að Ný Dönsk myndu vinna XXXR en ég hefði nú kannski getað verið með meira rapp fyrir hundana, en það hefði þá á móti verið ósanngjarnt gagnvart nýdönskum. Fáránlegt klúður hjá mér þarna með síðustu spurningu þáttarins - það var bara meinloka í mér sem lét mig alveg gleyma "Syngjanda sveittum" plötunni. Fokk it. ND löngu búnir að vinna hvort eð er. En það verða eflaust einhver svona klikk í framtíðinni þar sem ég kem upp um poppfávisku mína - maður er náttúrlega endalaust að fletta í gögnum þegar maður er að semja þetta - það er ekki eins og ég "viti" þetta allt.
---
Hilmar Már, greinilega aðal Marley-fræðingur klakans, spyr um rétt svar við hver lék undir í laginu Punky Raggae Party og kemur með mjög djúpt svar sjálfur. Mitt svar var nú bara "Aswad", enda sögðu mínar kokkabækur ekki annað. Maður ætti kannski að hætta að nota matreiðslubækur í þessu.
---
Já já auðvitað mætti þetta "lúkka" eitthvað meira hipp og kúl eða eitthvað, en mér finnst þetta kósí. Tússadæmið jú jú - auðvitað ekki mjög pró - en eruði að segja að ég skrifi illa?
---
Auðvitað eru ekki allar spurningarnar alveg geðveikt góðar. Þessi með Woodstock 94 var já já alveg út úr kú, ég er alveg maður í að játa það. Maður er samt alltaf að verða færari í þessu og ég held að spurningapakkinn í kvöld sé sá þéttasti til þessa.
---
Jón B stingur upp á að opna veðbanka og auðvitað ætti að gera það þegar 8-lið standa eftir. Það verður eflaust eitthvað dæmi sett í gang á netinu og svo ættu vinnustaðir bara að leggja í bjórkassapúkk.
---
Annars brjálað að gera og batteríin alveg að springa. Og gott að vera kominn heim aftur. 08:05

VAR EITTHVAÐ AÐ GERAST sumarið 2002?