15.09.06
Minnispunktur til vinnuveitenda minna á 365: Á Íslandi
búa 3.000.000 300.000 manns. Ég hefði
getað sagt þeim þetta þegar NFS byrjaði en það
spurði mig enginn.
---
Annars útiloka ég ekki neitt. Alls ekki neitt.
14.09.06
Kjafturinn á mér er Kani og því eru uppáhaldsdagarnir
mínir núna: Amerískir dagar í Hagkaupum. Ég
beið auðvitað fyrir utan búðina í morgun
þegar opnaði með svartan ruslapoka til að ná nú
sem mestu af rótarbjórnum. Í ár er boðið
upp á þá Shasta og Super-Chill, sem báðir
eru frekar bónus-legir rótarbjórar og ekki í
háum gæðaflokki. Engu að síður ágætis
stöff sé maður fyrir rótarbjór. Ef ég
væri ekki í svona ströngu aðhaldi, eða væri
með líkama sem brenndi meiru en eðlilegt er, hefði ég
svo keypt allskyns gúmmilaði sem boðið er upp á:
t.d. þrjár tegundir af súkkulaði etc húðuðum
eplum, vanillu Cherrios, Reeses' pínötbötter cheesecake
og ritzkex með pínötbötteri. Semsé algjör
geðveiki og ég þurfi að láta þrjá
hesta draga mig slefandi út. Engu að síður er ljóst
að líf mitt öðlast ekki gildi fyrr en ég verð
kominn með tvöfaldan ísskáp með klakavél.
Ég vinn að þeim draumi hörðum höndum.
13.09.06
Hér (eða í kommentakerfinu)
er ekki haldið vatni yfir því hvað ég er æðislegur.
Meira svona takk! Nei annars þá er viðtalið
við Týra þónokkur snilld en það er nú
helst vegna þess að Týri
er svo mikill meistari (já og svo er myndin góð og ef
hún verður ekki kosin portrettmynd ársins á næstu
sýningu fréttaljósmyndara þá er ég
illa svikinn).
11.09.06
Ég man ekkert hvað ég var að gera í síðustu
viku en ég man vel hvað ég gerði fyrir fimm árum.
Svona var bloggið þá: Þessi
dagur er hér með opinberlega gerður að VERSTI DAGUR
LÍFS MÍNS-Dagurinn. Húsið hefur verið í
fokki - allt út af einu sprungnu kaldavatnsröri. Lak niður
á næstu íbúð og rústaði vegg
og eldhúsinnréttingu. Ég og vinur minn Steini gerum
við, eða réttara sagt, hann, því ég
er klaufskari en handalaus maður. Allavega, byrjum um morguninn í
þessum iðnaðarleiðindum. Koma eldhúsinnréttingunni
upp aftur. Ikea helvíti. Klukkan 1/2 2 hringir konan hans, segir
að annar turninn standi í logum. Unnusta mín kemur heim
og er á bömmer. Segir: Ég fer sko ekki til NY, en þannig
er að við vorum búin að borga miða til NY, en áttum
reyndar ekki að fara fyrr en eftir tvo mánuði. Vonandi verður
ástandið skárra þá. Ég trúi
þessu ekki. Er ekki alveg að melta þetta. Geri mér
ekki grein fyrir stærð málsins. Jæja fokkitt. Upp
í Ikea. Steini gleymdi miðanum með málunum í
öllum látunum, svo hann ekur eftir honum, en ég og unnustan
mín étum í Ikea (5.2 af 10). Þar er tómlegt.
Svo að kaupa varahluti í eldhúsinnréttinguna á
neðri hæðinni sem við rústuðum. Lamir? Það
eru til 50 tegundir af lömum!!!! æpir stressaður strákur
á Ikea-lagernum. Segir svo að hann sé bara svona stressaður
út af WTC. Að mamma hans vinni þar. é ræt.
Fram á kvöld er eldhúsinnrétting djöfulsins
sett upp. Það er leiðinlegt. Á meðan fer allt
til fjandans og súpermarkaðurinn í kjallara WTC sem ég
var búinn að skoða á netinu er ekki til lengur. Og
þúsundir dauðra. Ekkert nýtt kannski að saklausir
borgarar deyi. Nú eru það bara Ameríkanar.
---
En hvað svo? Djöfull væri nú eitthvað annað
hljóð í strokknum ef Al Gore hefði tekið þetta
á sínum tíma. Ætlekki það. Kjósendur
eru hálfvitar.
---
Það vita allir að Simpsons eru snilld. Hér
eru tveir snillingar á bakvið snilldina í viðtali
við enn einn snillinginn...
10.09.06
Góðan daginn gott fólk og velkomin að skjánum.
Mætti kannski bjóða yður ljóðablað,
ég meina Topp 5? Eða er herrann kannski ekkert hrifinn af Topp
5?
Kukl
- Pökn (fyrir byrjendur): Óendurútgefin B-hlið
af fyrstu og einu smáskífu Kuklsins. Þarna má
heyra grunninn að glaðværð Sykurmolanna. Í dag
eru einmitt 23 ár síðan ég sá Kukl í
fyrsta skipti því í dag eru 23 síðan mikil
friðarhátíð með Crass var haldin í Höllinni.
Hátíðin breyttist þó í leiðindi
því Crass voru svo leiðinleg og voru rúður
brotnar og tennur mölvaðar. Ég man að mér þótti
Kuklið gríðarlega gott og ég sá þau
eiginlega aldrei í jafn miklu stuði og einmitt þarna.
(Bónus: Crass
- So What. Crassslagari sem bæði Fræbbblarnir og F/8
kóveruðu. Maður bjóst við svona stöffi á
tónleikunum en fékk bara frumflutning á tónverkinu
Christ the album, gvöðdómlegum leiðindum.)
The
Tritons - (I can't get no) Satisfaction: Magnað ítalskt
kóver af þessari Stónssnilld frá 1973. Ku m.a.s.
hafa verið nokkuð vinsælt á sínum tíma.
Ég sé fyrir mér Ítala með yfirskegg og
barta og fráhnepptar skyrtur. (Bónus: Boyce
& Hart - Jumping Jack Flash, annað kúl kóver
frá svipuðum tíma. Boyce & Hart samt aðallega
þekktir sem lagahöfundar, m.a. Stepping Stone með Monkees.)
Cheap
Trick - Come on come on come on: Þessir gömlu rokkarar voru
hreint magnaðir á köflum in ðe seventís en eitís
og næntís með allt niðrum sig og skít í
buxum. Á nýjustu plötunni Rockford (þeir eru frá
Rockford, Illanojs) þykja þeir komnir í gamla góða
iðnaðarrokk/popprokk stílinn og þetta lag af plötunni
sýnir það klárlega. Cheap Trick eru með lúkkið
á hreinu og hafa alltaf gert: Tveir ljótir og tveir sætir
og gítarleikarinn í köflóttu. Topp band! (Bónus:
Cheap
Trick - Come on come on af læfplötunni At the Budokan, sem
þeir slógu í gegn með 1978)
Grizzly
bear - On a neck, on a spit: Af Yellow House sem nýlega er komin
út hjá Warp. Bandarískt band og svokallað hugarfóstur
eins gaurs, Edward Droste. Fiftí fiftí Beach Boys og Animal
Collective. Það er að gera mjög góða hluti
í augnablikinu í skjóttskipastveðurílofti
tólistarheimsins og út um allt í mp3blogginu.
Þess má geta að sveitin gerði splittsingul með
íslensku sveitinni Seabear (meik í aðsigi) á dögunum.
The
Boomtown rats - Looking after no. 1: Það er erfitt að
trúa því en einu sinni var Bob Geldof að gera góða
hluti í músikinni. Hér er hann með gömlu
góðu pönkrottunum sínum á fyrsta singli frá
1977. Ljómandi hressilegt pönkpopp.
09.09.06
Ég þarf að kaupa mér góðan kassagítar
með pikköpp og Fender Precision bassa. Á einhver sem hann
vill
selja?
---
Minni annars bara á útvarpsþáttinn góðkunna
á morgun kl. 14 á XFM. Ofsa stuð.
05.09.06
Neeeiiiiii!!! 0-2. Ef Magni dettur út líka verður
vonandi lýst yfir þriggja daga þjóðarsorg.
04.09.06
Eftir alltof langt sumarleyfi hefur skemmtilegasta
síða landsins tekið upp þráðinn á
ný.
---
Neeeeiiiiiii! Ef Magnageðveikin væri zombie-faraldur væri
nú búið að bíta síðasta ósmitaða
einstaklinginn því Spegillinn - moðerfokking Spegilinn!
- var með innslag um Rokkstar súpernóva í dag.
---
Eins og kemur fram
á hinum virta tónlistarvef Rjóminn mæli ég
með því að fólk hlusti amk einu sinni á
ævininni á frummanninn í sjálfum sér.
Ég hlusta á hann oft á dag og þá helst
undir stýri. Áðan öskraði frummaðurinn m.a.
þetta þar sem hann hékk á eftir gulum Yaris á
leiðinni út í búð: Drífa sig kerlingabeygla!
Áfram með þig þarna! ÁFRAM!!! ÁÁÁÁÁFRAMMMMM!!!!!!!
Beyglan var fyrir framan mig alla leiðina út í búð
á 30 á 50 km svæði. Svo fór ég og
verslaði og fór í bankann og svona sjitt sem maður
gerir og svo á leiðinni til baka hver heldurðu að hafi
verið beint fyrir framan mig? Guli Yarisinn auðvitað. Mér
fannst það svo fyndið að ég fór að
skellihlæja og hætti lífi mínu við að
taka framúr.
---
Færir menn á sviði jarðvarma mæla með
þættinum um Veronicu Mars sem sýndur er á Rúv
í kvöld. Ég tékka.
---
Annars er maður auðvitað þrautpíndur á
Fbl og ég sem var búinn að vinna síðan 8 var
beðinn um að taka viðtal við Súpermann, eða
þann sem leikur hann í þessari bíómynd
(sem ku totta fyrir allan peninginn). Hann er víst á Íslandi
leikarinn. Þetta hefði kannski gengið ef viðtalið
hefði ekki verið kl. 17:30. Ég vældi mig því
frá verkefninu enda er bæði Súpermann og íslensk
vinnusturlun stórlega ofmetið fyrirbæri.
03.09.06
Davíð segir þetta og Davíð segir hitt,
hafa fréttirnar snúist um að undanförnu í
hálfgerðum klögutóni. Hverjum er ekki sama hvað
hann er að röfla? Annars leiðinlegt að þegar Steingrímur
Joð kemur með hugmyndir að umbreytingu á status kvóinu
fer tuðstúlkan hún Ingibjörg strax að snúa
því upp í meting og leiðindi. Vá, djöfull
var þetta leiðinleg bloggfærsla. Hér kemur fokking
topp 5imm þó maður hafi nú varla orku í
svona eftir Fréttablaðsvinnudag og kvöldverð á
Ruby Thuesday þar sem fjölskyldan fagnaði 4 ára brúðkaupsafmæli
(silki). Gríðarlega kýld vömb og eitthvað "fínna"
tekið seinna. Maður fer ekki með 2 og 11/12 ára upptjúnaðan
rauðhaus á Salt.
---
Já fokking topp 5 vesgú:
Hjálmar
- Vagga vagga: Hjálmar eru "hættir", eins langt og það
nær. Áður en þeir sprautuðu síðustu
dropunum í skaut eilífðarinnar (ha?) tóku þeir
upp tvö lög, hundleiðinlegt Stuðmannakóver og
þetta, eitt albesta lag ferilsins. Hlustið og sprettið grön.
Kombakk 2011 ef ekki fyrr.
The
Rutles - Piggy in the middle: Kvikmyndin er snilld, ekki síst
fyrir glæsilega kópíutónlist Neils Innes sem
leikur Lennon í myndinni. Hér er sætt dæmi. Hlustið
og etið kex.
Reykjavik
- All those beautiful boys (The Syntax Gaymix): Valdi fótbrotni
bassaleikarinn og \7oi bróðir hans útbjuggu þetta
frámunalega diskómix. Hlustið og víkkið görn.
Lush
- Baby talk: Skóstörupopp frá síðustu
öld. Ég var einu sinni pennavinur japönsku stelpunnar
í þessu bandi áður en bandið sló í
gegn og man sterklega eftir því þegar hún sagði
mér frá því að "einhver hippi hefði
fengið að ríða henni". Mér fannst þetta
frekar fúlt því ég var farinn að gera mér
vonir. Nei ég á bréfið ekki ennþá.
Hlustið og fáið yður anórakk.
Love
- Stephanie knows who: Bókin
sem ég keypti er algjör snilld eins og 3 fyrstu plötur
bandsins. Þetta glæsilega popplag er af Da Capo, sem væri
líklega betri en Forever Changes ef sveitin hefði ekki troðið
einu leiðinlegu lagi (djammlaginu Revelations) á alla B-hliðina.
Hlustið og minnist meistara.
---
Hér
er nokkuð athyglisvert mál sem ég hef ekki heyrt pælt
í áður. Menn þykjast greina íslensku í
miðju Bítlalaginu Yellow Submarine (eina lagið sem karókísöngvarinn
DJ Stalin kann, eins og áður hefur komið fram), nánar
tiltekið setninguna "Hljómsveitin er íslensk" og með
fylgir hljóðbútur.
Skv bókinni
góðu eru þetta þó bara þeir Lennon
og Makka að grínast í ekkóklefanum og búa
til "sæfarendaleg" hljóð. Það er þó
ekki alveg útilokað að íslenskt ættaður
rafvirki eða húsvörður hafi fyrir tilviljun verið
í Abbey Road hljóðverinu á þessum tíma
og verið dreginn með í tjúttið. Það
eru þó engar heimildir fyrir því, það
best ég veit.
02.09.06
Í Svínasúpunni var einu sinni brandari um Ödda
Blö sem var með syni sínum að gefa öndunum og
fór síðan að æpa Ég er ekki einstæður
faðir! Ég er ekki einstæður faðir! Ég samsvaraði
mér ágætlega við þennan brandara þar
sem vér feðgar tókum pakkann í dag, sund, McDonalds,
Húsdýragarðinn, ís. Lufsan í útlöndum
og sonurinn að venja sig af bleyjunni með tilheyrandi pissíbuxur
og jafnvel kúkíbuxur veseni. Ég er alveg að fíla
mig í þessu, sérstaklega þar sem ég hitti
ónefnda hljómlistarmenn í ísbúðinni
sem sögðust bara hafa verið þunnir að horfa á
fótbolta í allan dag.
30.08.06
Alltaf lærir maður eitthvað nýtt. Hélt
alltaf að maður fengi uppreisn æru, en þá er
það víst uppreist æru, a.m.k. skv. Fbl í
dag, Árni Johnsen sem sé. Helstu fréttir annars að
ég hékk vakandi í gegnum ó-Woody-legu Woody
Allen myndina Match Point, sem segir e.t.v. sitt um gæði hennar.
Þá er sjoppan hér á móti að leggjast
af til að rýma til fyrir íbúðum. Sjoppueigandinn
á leið á sjóinn. Segir ekkert upp úr þessu
að hafa. Fúlt að hafa ekki sjoppu beint á móti
sér, en það voru nú kannski einum of mikil lífsgæði
hvort eð er.
---
Um árið bloggaði ég eitthvað um æsandi
seventís rokksögu sem gerðist í LA og innihélt
kókaín, Jakob Frímann, Önnuna hans, Helgu Möller
og Óla í Partýpítsu. Það fylgdi sögunni
að Rassi Prump hefði notað söguna í æsandi
gjörningi. Hér
eru æsandi ljósmyndir frá þessu. Meira svona
hr. Rassi!
29.08.06
Ljóðabókin Barkakýli úr tré
e. Þorstein Guðmundsson er komin út. Hér er dæmi:
Éttu á þig gat
þannig að út um það renni frat.
Melting er ofsalega eitís.
Rassgat.
Hér er næmi:
Fólk er sjúgandi
hvert annað
um allan heim.
Að lokum Sæmi. Rokk?
Alvöru karlmenn
fá standpínu við uppvaskið.
Mæli heilshugar með henni! Tvímælalaust besta
íslenska ljóðabókin síðan Einar Már
sendi frá sér Er einhver í Kórónafötum
hér inni?
---
Kæra dagbók. Ég er eitthvað sloj þessa
dagana. Ég get bara ekki vakað lengur en til svona 22:30 á
kvöldin. Síðustu daga hef ég rotast yfir dagskrárliðunum
Glæpahneigð, The Pledge og Law & Order: Criminal intent.
Mér tókst heldur ekki að lafa yfir mynd sem við leigðum
á Voddinu, Everything is Illuminated, sem ég myndaði
mér þó þá skoðun um að væri
góð áður en lak slefandi í koddann. Söngvarinn
í Gogol Bordello leikur á móti Fróða í
henni.
---
Hefi lokið fyrsta uppkasti að handriti Abbababbs! Það
þarf svo eitthvað að juðast í þessu. Margir
landsfrægir snillingar eru orðaðir við leikritið.
Verið er að skoða heppilega sýningarstaði. Frumsýnt
í janúar 2007. Byrja að vinna 9-5 á Fréttablaðinu
1. september. Ágætt að svissa annað slagið á
milli frílans og fasts djobbs. Búinn að vera í
full miklum rólegheitum í allt sumar kannski svo það
verður ágætt að hamast um hríð.
---
Haustið að koma. Fíla það. Flott árstíð.
Vorið er líka fínt. Og sumarið og veturinn. Helvíti
er ég jákvæður. Ég kenni Lýðheilsustöð
um og plattanum þeirra á ísskápnum um Geðorðin
10.
28.08.06
Ég er að segja ykkur það, það eru allir
að meikaða í útlöndum! Og núna íslenskir
ógæfumenn líka. Einn Kristjaníuróni sleppur
með skrekkinn í undirgrándinu í Köben og
í brasilískum fangelsum stendur landinn sig eins og hetja
með tálgaðan tannbursta. Við erum best! Líka
í ógæfunni.
---
Þunglyndiskveikjandi: Umræður um Framsóknarflokkinn
og Kárahnjúkavirkjun. Léttlyndisvekjandi: Auglýsingaherferð
Leikfélags Akureyrar og möguleikinn á leikhúsferð
norður via Jólaland. Einnig: Kvikmyndahátíðirnar
framundan.
27.08.06
Ég skal nú segja ykkur það að hér
er Topp 5 og nú getum við sko aldeilis fengið að heyra
eitthvað íslenskt maður já já og jamm:
Pétur
Ben - Something radical: Platan hans Péturs er gífurlega
fullorðins og erlendis. Hér er gott lag (þau eru mörg
önnur) og þú ættir að kaupa plötuna. mæspeis
Retro
Stefson - Medallion: Unnsteinn er aðalmaðurinn í þessu
stórkostlega stuðbandi sem notar latínófíling
oná brauð. Maður bíður með öndina í
hálsinum eftir fleiri lögum en á meðan dugar þetta
geðveikt vel. mæpesis
Dýrðin
- Popp og co: Maggi Strump og félagar nota sykur oná
popp og Dýrðin ætlar að skulta út plötu
í útlöndum á næstunni. Þau eru líka
alltaf að spila í lesbíubænum Northampton í
Mass. meispæs
Hafdis
Huld - Tomoko: Álfastúlkan ríður um héruð
og varpar nú mínímalískri plötu (Skítugt
pappírsmál) á mannskapinn. Búast má
við innihaldsríkum umræðum um íslenska mosann.
Hér er skemmtilegt lag um japanska stúlkukind sem erfitt
er að umgangast. mispesæ
Bíbí
& Friends - CFA: Fádæma flippískt en þó
með kjöti á beinunum. Virðist vera listamaðurinn
Junglizt
(frændi minn!) ásamt vinum sínum. mæpseis
---
Bónus: FIMM TIL Á MÆSPEIS: Bertel!
/ 2 leikmenn / Lada
Sport / FM Belfast / Áhöfnin
---
Í dag kl. 14 á XFM: Tónlistarþáttur
Dr. Gunna. Meðal efnis er lag um fólk í Che Guevera bolum,
heildræði fyrir verðandi mæður og spikfeitur goth-pakki,
en annars er þetta bara sama gamla súpan sem flestir með
fullu viti ætti að geta notið í botn. Einnig ætti
að vera hægt að hlusta á þáttinn síðar
í tölvunni hér.
25.08.06
Utanlandsferðirnar eru ekki svipur hjá sjón upp á
innkaup að gera. Einu sinni klikkaðist maður hreinlega í
plötubúðunum. Í fyrsta skipti sem ég fór
til útlanda þurfti ég að lifa á einni pylsu
á dag í viku því ég var búinn
að eyða svo miklu í plötur. Það var einhver
leiðinlegasta vika sem um getur í Amsterdam. Það var
þó ekkert á við Sigvalda sem eyddi öllu og
þurfti að fara heim einni viku fyrr. Nú rétt nennir
maður að kíkja í plötubúðirnar. Ég
er auðvitað hættur að spá í diskum svo
ég gramsaði í notuðum plöturekkum. Sú
besta sem ég fann var Reckless
Records í Soho. Þar keypti ég safnplötuna
New Wave sem Vertigo gaf út 1978. Ég hefði getað
reddað öllum lögunum á nokkrum mínútum
á Soulseek, en það var umslagið sem ég var
eftir. Ég átti þessa plötu nefnilega þegar
ég var lítill og myndirnar voru eitthvað sem ég
vildi rifja upp, kannski með þá von í brjósti
að ég yrði ungur á ný við að skoða
myndirnar af pönkurunum:
Bú hú... Allavega. Gott að eiga þessa plötu
aftur. Nú er eðalfónninn minn af Pioneer gerð í
viðgerð og svo verður þessu blastað. Hugsa sér
að þetta var eina tónlistin sem ég keypti í
ferðinni. Keypti líka nokkra dvd. Tvennt Bítlakyns:
Tvær um brenglaða snillinga, Daniel Johnston og Wild Man
Fischer:
Svo tvær bækur, eina stórkostlega Bítlalagabiblíu
Og eina frábæra eftir trommarann í Love með inside
info á hið áríðandi gullaldartímabil:
Annað keypti ég ekki fyrir sjálfan mig, nema auðvitað
tvo kassa af Tazo chai tepokum frá Starbucks. Tótallí
essensjal.
Þá er það komið á hreint!
24.08.06
Kannski væri ráð að fá sér síma
með myndavél. Séns maður tæki fleiri myndir
þá. Ég var með myndavélina með mér
en tók bara tvær myndir. Eða réttara sagt, Biggi
tók af mér tvær myndir, eina inn á hamborgarabúllu
Bills Wyman, Sticky Fingers, eina fyrir framan styttu frá Páskaeyju
inn á British museum. Sjálfur tók ég eina stuttmynd
af sprenghlægilegu öreigahótelherberginu á Kings
Cross. Þrjár nætur þar og tvær á
hinu sögufrægu Adelphi hóteli í Liverpool, en
þar sá mamma Johns Lennon um að bera fram beikon og egg
á árum áður. Þegar við Biggi stóðum
inn á Cavern í Liverpool, kjallaraholunni sem Bítlarnir
skriðu út úr, eða endurbyggðri útgáfu
af þeirri holu (sömu GPS hnit en aðrir múrsteinar)
og sáum ágætan trúbador spila Bítlana
varð ekki aftur snúið og massíf drykkjusessjón
varð að veruleika. Tilfinningarnar báru mig ofurliði,
eins og sagt er. Í Liverpool virtust vera tvær götur
með börum og hressleika svo við flökkuðum á
milli og sturtuðum í okkur. Tókum karaókí
(Dj Stalin með Yellow Submarine - dansgólfið tæmdist)
og eitthvað massíft rugl framundir morgun. Þar sem þetta
var í fyrsta skipti í rúmlega ár sem ég
datt íða var ég svo viðurstyggilega þunnur
daginn eftir að ég kom engu niður fyrr en eftir nokkrar
íbúfen. Við tókum Magical mystery tour og mér
vöknaði um augun fyrir framan æskuheimili Pauls McCartney.
Tókum Bítlasafnið og rússneskt veitingarhús.
Í London tókum við m.a. Bodies
sýninguna (smekkleg sýning með sundurtættum
mannslíkum), British musuem, kvöldstund á The
Comedy Store (en því miður var "spuni" þar og
ég þoli ekki spunagrín), hamborgarabúlluna
hans Wymans (fínt) og bara gott tchjill í stórborginni
(Starbucks Frappuchino, John Smith smooth & creamy, Ed's banana peanutbutter
malted sjeikinn). Aðalmálið var svo Rolling Stones giggið
í Twickenham. Hér er símamynd af mér fyrir
framan sviðið sem lítur út eins og Kauphöll
Íslands, en er bara aðeins stærra:
Ég er ekki RS fan og varð það ekki þarna
en Birgir og Freyr Eyjólfsson, sem nú var mættur í
fjarveru Gríms Atlasonar sem ætlaði upphaflega með,
voru gríðarlega hrifnir enda meiri fön en ég. Ég
var svo langt frá að mér fannst ég alveg eins
hafa getað horft á þetta á dvd. En vissulega sannfærandi
stóriðnaður og gaman þegar fólki er skemmt.
Ég er mest fyrir sixtís RS svo Paint it black og Let's spend
the night together voru að gera það best fyrir mig. Fullt
af Íslendingum þarna, mikið af spenntum körlum að
sjá þá í 6 eða 12 skipti. Á svæðinu
var 1 af hverjum 3 í Rolling Stones bol og svo sá maður
nokkra karlfauska sem hafa tekið Keith Richards sér til fyrirmyndar
og litu alveg eins út og hann nema þeir voru hlægilega
sorglegir á meðan Keith er kúl, sögulega séð.
Í miðju giggi sigldi sviðið út í mannhafið
og félagarnir hömruðu Miss You, sem hefur í hugum
okkar félaganna skýrskotun til fyrrum blaðasalans Gunnsa
Gunn, og því var þetta hápunktur kvöldins.
Ég keypti bol.
17.08.06
Ég verð nú bara að segja að það
var frábært puplisití-stönt hjá Geir Haarde
að þiggja boðsferð Ómars. Hann var óneitanlega
prik fyrir það.
---
Mikk Jagger var með barkarbólgu og því var
giggi Rollinga á Spáni aflýst í gær.
Venjulega væri mér skítsama, en þar sem ég
á miða á tónleika sveitarinnar á þriðjudaginn
er ekki hægt annað en að fá hland fyrir brjóstið.
Karlgormurinn er víst vanur að ná sér á
3-4 dögum af svona kvilla skv. aðdáendasíðunni
og því ætti þetta að slefast. Ef ekki, þá
það.
---
Kannski er þetta síðasti túrinn hjá
þeim. Dettandi niðrúr tré, meðferðir og
barkarbólga. Og ellikelling maður. Giggið verður örugglega
síldartunna og ég sé einhverja depla í 300
km fjarlægð innan um 55000 manns og hlusta á smellina
sem þeir virðast spila á hverju giggi. Alltaf sömu
20 lögin sýnist mér. En maður getur þá
sagt að maður hafi séð þá. Brian Wilson,
Paul McCartney, Ray Davies og nú Stones vonandi komnir í
hús. Hvað er þá eftir í "sjáum þá"
áætluninni? Tja, það væri magnað að
ná The Who, sem einmitt eru á leið á túr.
Bee Gees kannski, já ég sagði Bee Gees (snillingar!)
og hva, XTC ef þeir spila einhvern tímann aftur. Man ekki
eftir meira í augnablikinu.
---
Það klikkar ekki að þegar ég les söguna
Ungi litli fyrir soninn langar mig ótrúlega mikið í
heilsteiktan kjúkling. Ég lét það eftir
mér um daginn og það var gott. Sagan er í hinni
frábæru Ævintýrabók barnanna sem nú
er uppseld hjá forlaginu. Ég gáði því
ég er með bókina úr bókasafninu. Þetta
eru grimmilegar sögur sem enda flestar með dauða. Annað
hvort drepur úlfurinn eitthvað eða úlfurinn er drepinn.
Ekkert sænsk pc-væl, bara lífið sjálft.
---
Næsta sólóplata er nú smám saman
að fá á sig mynd í hausnum á mér.
Þetta verður svakalega mikil stuðplata og voða lítið
indí eða artí. Ég lýsi
eftir bakraddasöngkonu sem kann líka á hljómborð
og kannski gítar. Nóg vinna framundan og ekkert kaup. Meðal
verðandi megasmella á plötunni eru Verum góð
við hnakkana, Við hittumst í dauðatjaldinu, Birgitta
Haukdal, Bubbi Morthens og Hey fréttamaður! Ætli ég
nenni nokkuð að koma þessu út fyrr en á næsta
ári. Ólíklegt vinnuheiti plötunnar er Ég
þysja inn á rassgatið þitt.
16.08.06
Það er gífurlegt
úrval af ljósmyndum af Valgerði Sverrisdóttir
á netinu. Sé vel leitað má m.a.s. sjá myndir
af henni þar sem hún lítur úr eins og kind.
Þessi er bara ein af mörgum:
Nú er stóra spurningin bara: Hvernig fer sagan með
konugreyið. Erum við að tala um hagsæld og hamingju og
álstyttu í miðbæ Reyðarfjarðar eftir 30
ár eða hörmungur, ónýtt land og tæra
birtingarmynd heimskunar? Spurðu mig 2036.
---
Þá er komið að því: Í dag
kaupi ég hnébuxur.
---
Goðsögnin er sönn: Hrafn Gunnlaugsson drekkur Mix.
15.08.06
Aziz er standöppari
frá New York. Hann er líka indígaur. Þetta
er alveg þokkalega fyndið.
---
Það er ekkert leiðinlegt að horfa á myndbönd
á YouTube:
I'm from Barcelona
- We're from Barcelona
Dúndurhressir Svíar í ýkt glöðu
formi. Söngvarinn hugsanlega litli bróðir Jóa Eiríks.
Jonathan Richman -
New England
Hmm, líkur Alan Partridge, þú segir nokkuð.
Megaskúbb: meistarinn hugsanlega á klakann aftur bráðlega.
Weezer - Keep fishin'
Gömlu Weezer.
The Pink Spiders -
Little razorblade
Nýju Weezer.
Devo - Satisfaction
Ég er ekki fullnægður. Besta kóver ever.
Flying Lizards - Money
Ég vil pening. Besta kóver ever 2.
The Stranglers - Walk
On By
Hún gengur framhjá. Besta kóver ever 3.
XTC - Are You Receiving
Me?
Það fyrsta sem ég heyrði með XTC. Man ennþá
eftir því þegar ég keypti þessa smáskífu
á útsölumarkaði í Hallveigarstöðum.
Elvis Costello - Pump
it up
Klassískur Kostello.
Annars er þetta You Tube bara
geðveikt. Leitið og þér munið finna.
---
Church of the SubGenius.
Er það ekki eitthvað fyrir þig, ó leitandi bróðir.
---
Til sölu er einn miði
á Rolling Stones í London 22. ágúst nk. Verð
12.000 kr.
14.08.06
Ég heyrði að hinir snartrúuðu skýra
hverinn á auglýsingunni sinni með því að
þar sé verið að tákna þá "gífurlegu
orku sem leysist úr læðingi þegar menn leggja samkynhneigðina
á hilluna". Hmm? Er nú ekki gjósandi hver frekar freudískt
tákn fyrir þann yfirfulla hver sem gýs á mönnum
hvort sem þeim líkar betur eða verr? Samkvæmt þeim
veiku er betra að "gjósa í svona holu en ekki svona holu,
því það er bannað, segir Skruddan.
---
Já já, en hverjum er annars ekki sama hvað þessum
bjánum finnst. Verum bara feginn að búa ekki við
alræði svona liðs eins og sumt af mannkyni þarf að
búa við.
---
Í gær var uppáferð á Hengil með
gönguhópnum Blómey. Mér skilst að það
hafi verið súpergott veður í borginni en á
Hengli var þoka alla leiðina upp. Engu að síður
flott og dularfullt umhverfi og skemmtileg ganga. Hér er auðvitað
einn laufléttur Topp 5:
Peter
Bjorn and John - Young folks: Flaut í poppi er síður
en svo ofmetið fyrirbæri. Hér er sænskt dæmi,
hljómsveitin Peter Björn og John sem er með þrjár
plötur á bakinu en kannski núna að meikaða með
þessu lagi sem söngkonan fyrrverandi úr The Concretes
syngur með þeim. Flautpoppkúlismi.
Pink
Military - Degenerated man: Af plötunni góðu úr
Safnarabúð Valda. Söngkonan Jayne Casey var svaka hress
og skömmu áður í hljómsveitinni Big in Japan
með Holly Johnson, sem síðar stofnaði Frankie goes to
Hollywood, og fleira Liverpool-liði. Eftir Big in Japan kom Pink Military
og síðar Pink Industry. Plata Pink Ministry frá 1980
er í glæsilegum örlí 80s nýbylgjufílingi,
reykur og uppháar pokabuxur, meiningar og kúl sem nú
er verið að stæla í haugum. Jayne varð síðar
mikilsmetin í listalífinu í Liverpool en býr
nú ein með hundi og þremur kaktusum (að öllum
líkindum).
Pop
Levi - Blue honey: Málað poppskoffín frá Liverpool.
Hefur spilað með Ladytron en gerir sig nú klárann
í heimsyfirráð. Af nýrri smáskífu.
Sneaky
Pinks - I can't wait: Laglegt fávitastuðpönk frá
Arizona af nýlegri smáskífu. Metnaðarfullt ekki!
You
Say Party! We Say Die! - The gap (between the rich and the poor): Enn
eitt indíbandið frá Kanada með indínafn og
vælandi indísöngkonu klikkar ekki! Hit the floor! heitir
platan þeirra sem kom út í fyrra.
---
Jesús Kristur á gasgrilli! Það eru bara allir
að meikaða! Fyrst Magni og nú Hugleikur. Þess má
geta að ég á áritaða plötu með Á
móti sól og nokkrar áritaðar bækur e. Hugleik.
Hver þarf viðbótarlífeyrissparnað með svona
gersemar til að selja í ellinni?
12.08.06
Mogginn, það frjálslynda blað, birtir heilsíðuauglýsingu
trúarsjúklinga á bls. 33 í dag. Nú er
um að gera að byrja að safna og eiga 371.200 kr (sem heilsíðan
kostar skv verðskrá)
um næstu páska til að eiga fyrir auglýsingu sem
verður einhvern veginn svona:
Svo er bara spurning hvort Mogginn er nógu frjálslyndur til
að birta svona?
---
Annars verð ég á sviðinu kl. 16.
11.08.06
Sá í nýjasta Grapevine að Jón Gnarr
er að skrifa ævisögu. Það er ýkt spennandi
og vonandi talar hann lítið sem ekkert um Guð vin sinn.
---
Lesandi benti mér á Viidoo
sem er eitthvað dæmi sem maður getur notað til að
horfa á helling af sjónvarpsstöðvum.
---
Ég hringsnýst með það hvernig næsta
Dr. Gunna plata eigi að vera. Einn daginn líkamsræktarteknó,
hinn daginn þungarokk og nú langar mig helst að gera kassagítarstuðplötu
a la Violent Femmes eða Party! með Beach Boys. Það þýðir
þó ekkert að blanda þessu saman næsta plata
verður að vera "heilsteypt" af því að það
er svo fínt.
---
Supertramp eru nú ekki sem verstir en ég nenni samt ekki
að sjá skræka karlinn spila þetta á kassagítar.
Sá Morrissey í vor sem er nóg en Lufsan ætlar
að sjálfssögðu aftur og hefur tryggt sér sæti
á fremsta bekk.
---
Át á Ósushi í hádeginu og fékk
15% afslátt vegna "góðrar umfjöllunar". Sko, maður
græðir þá eitthvað á þessu!
10.08.06
Vondir rokkpabbar. Pabbi
Wilson bræðranna barði þá bókstaflega
áfram. Pabbi Jackson bræðranna píndi þá
áfram en pabbi Johns Lennon stakk af. Þessir heiðursmenn
leika aðalhlutverkin í glæsilegri teiknimynd e. Peter
Bagge (Hate) og Dana Gould. Teiknimyndin er í 4 þáttum
(1,
2,
3
og 4)
og tekur nokkuð óvænta stefnu í loka þættinum!
---
Ég vildi að Ómar
Ragnarsson biði mér í svona ferð eins og hann
var að bjóða forkólfum þjóðarinnar
í með opnu bréfi í blöðunum. Maðurinn
er náttúrlega einn af fáum lifandi goðsögnum
þjóðarinnar í dag.
---
Gat nú skeð. Ég að fara til London og þá
þarf auðvitað allt að fara í skrall
enn einu sinni út af þessu helvítis rugli öllu
saman. Ömurlegt endalaust rugl og hvílíkt helvítis
andskotans bögg. Hámark böggsins er að springa í
loft upp út af þessari helvítis dellu. Slappiði
nú bara af og hlustið á Bítlanna.
---
Við erum viðurstyggilegasta dýrategundin. Þú
þarft ekki frekari vitnanna við en fréttir á hverju
kvöldi. Best fyrir náttúruna væri algjör
útrýming en ég ætla samt ekki að sýna
gott fordæmi. Svo má líka alltaf vona...
---
Enn og aftur tönglast ég á því sama
- hvar eru gapastokkarnir? Væri ekki fyrirbyggjandi fyrir ofbeldishálfvita
og ofsaakstursaula að vita að refsingin væri niðurlægjandi
gapastokkur þar sem þeir fengju að dúsa (berir að
neðan, ef brot væri slíkt (höfuðkúpubrot
eða 150 km+)) yfir helgi samborgurum sínum til ánægju?
Mér finnst þetta frábær hugmynd og ég
vona að Bjössi sé að
lesa.
---
Það er meira hvað þessi Styrmir á Mogganum
hefur áhrif. Það kikna allir í hnjánum yfir
öllu sem hann segir og væla og skæla eins og pissudúkkur.
Alveg er mér sama hvað maðurinn er að skrifa enda nenni
ég aldrei að lesa það og rifja frekar upp gullfallegt
sendibréf til að fá hina sönnu mynd.
---
Nú lítur allt út fyrir það að ég
verði með í skemmtiatriði á Gei præd. Vonandi
að Jesús og Guð fyrirgefi mér, eða a.m.k. Snorri.
Á einhver leðurkaskeiki sem hann vill lána?
---
Í dag hef ég línkað bæði á
Björn og Snorra. Er hægt að ná lengra en það?
09.08.06
Örlí Kraftwerk stöff af síðu í Singapore.
Tékk
itt.
---
Á sínum tíma fékk ég ágætis
inneign hjá Valda í Safnarabúðinni fyrir cda sem
mér tókst ekki að losna við í sölunni
miklu. Í dag keypti ég nokkrar vinýlplötur til
að lækka inneignina, eða þessar:
Syd og Pink Floyd dótið orginal eintök sýnist
mér, platan með The Association leiðinleg, Twist platan
ætluð til dans með Dagbjarti, besta plata Queen að mér
skilst og gæði Split Enz platnanna á eftir að koma
í ljós. Fundur dagsins er án efa platan Do Animals
believe in God? með Pink Military frá 1980. Held pottþétt
ég hafi aldrei átt þessa plötu, en man eftir umslaginu
einhvers staðar frá og þekki eiginlega öll lögin.
Svona flott njúveif sem minnir ekki lítið á Siouxsie
& The Banshees. Kemur eflaust sterkt inn á næsta topp
5. Gamli góði vínillinn er málið maður!
Já og mp3 í bland.
---
Fór á Esjuna #5 í ár. Gaman en tíðindalítið
fyrir utan það ég rakst á ferskan og ilmandi manna
á hæsta punkti. Niðri smurði ég mér
baguette með raftaskinku, osti, kínakáli og sætu
sinnepi. Mér hefur langað í svona samloku síðan
ég sá myndina L'enfant á VODinu um daginn. Þar
étur vandræðaunglingurinn svona samloku í einu
atriðinu og ég er búinn að vera með garnagaul
síðan. Tvímælalaust hápunktur þessarar
lala-myndar sem fær ótrúlegustu halelúja einkunnir
víðsvegar og Gullpálmann ef mér skilst rétt.
Greinilega ekkert að marka svoleiðis. En samlokan var fín.
06.08.06
TÓNLISTARÞÁTTUR DR. GUNNA SNÝR AFTUR
Á XFM KL. 14 Í DAG! Nú heldur betur í boði
12 tóna, Skólavörðustíg.
---
Topp fimm þaggi?
Love
- Live and let die: Arthur Lee dáinn. Hann var Love og ég
er mikill Love maður og var kannski meiri á árum áður.
Átti þetta komplett á viníl minnir mig en finn
bara 3 plötur núna. Frægast er bandið fyrir plötuna
Forever Changes frá 1967, mikið meistaraverk þar sem fágun
í anda Burts Bacharach rennur saman við sixtíssýrurokkfíling.
Kannski ekki góð lýsing, en mörgnuð plata. Þar
á undan voru komnar út tvær góðar plötur,
Love 1966 og De Capo líka 1967. Eftir Forever Changes fékk
Arthur nýjan mannskap í bandið, sem var aldrei almennilega
frábært upp frá því þótt
sprettir væru margir. Seventísið og eitísið
virðist hafa verið tóm þrautarganga en svo upp úr
1990 fer að birta til og mörg kombökk í gangi, en
reyndar fangelisvist líka. En nú er hann dáinn og
farinn að spila aftur á gítar með vini sínum
Jimi Hendrix á himn... (geisp). (BÓNUS: Love
- The Everlasting first (af False Start 1970 - Jimi Hendrix gestar
á gítar), Love
- 7&7 is (sixtíspönkklassík af Da Capo) og S.H.Draumur
- 7&7 is (textalega vangefin útgáfa af Snarli tekið
upp á Hótel Borg 21. maí 1987.))
The
Panda band - Sleepy little deathtoll town: Þessir koma frá
Perth, Ástralíu, og gætu farið að gera það
gott þegar áróðursmaskínan byrjar að
mylja undir nýjustu plötuna þeirra, This Vital Chapter.
Fjölbreytt og gott stöff, margt í anda Flaming Lips (þ.e.
þegar eitthvað var spunnið í varirnar)
Vetiver
- You May Be Blue: Flott lag af plötunni To Find Me Gone, sem
mönnum þykir góð. Þjóðlagakennt
hippanýbylgja og lið í sömu táfýlu
og Devendra, Newsom og það gengi allt.
Erase
Errata - Tax dollar: Dúndurhresst nýpönk frá
SF. Lag af plötu #3, Night Time.
Skakkamanage
- None Smoker: Fyrsta stóra platan á leiðinni, Lab
of Love. Bandið leikur á Innipúka í kvöld,
sem er einmitt svona:
18:00 Koja
18:40 Norton
19:20 Skakkamanage
20:00 Mr. Silla og Mongoose
20:40 Mammút
21:15 Ghostigital
22:15 Speaker Bite Me
23:15 Mugison
00:30 Ampop
02:00 Baggalútur
05.08.06
Vöfflur og Viðey er nýjasta trixið til að reyna
að gera eitthvað við þessa forljótu og leiðinlegu
eyju. Ég mætti með alla fjölskylduna, aldraða
foreldra, gullfallega eiginkonu og glæsilegan son, og borgaði
glaður 1100 á kjaft fyrir "Vöfflur og Viðey". Fjölmargir
aðrir voru mættir enda sniðugt trix og ekki veitir af að
reyna að peppa þessa druslueyju aðeins upp. Svo var siglt
út og hangið í hálftíma í húsinu
þarna og reynt að ná augnsambandi við tvær afgreiðslukonur
sem voru á þönum og í framan eins og þær
myndu þá og þegar bresta í grát. Þegar
ekkert gekk að ná sambandi tók ég mér stöðu
og náði loks að spyrja aðra gengilbeinuna hvort vöfflur
og kakó væru nokkuð á leiðinni enda stutt í
að næsta ferja færi í land og óþarfi
að hanga á þessum vindrassi lengur en þörf
er á. Ég er alveg að koma, sagði konan. Þegar
hún kom loks var hún með sorgarfréttir: Vöfflurnar
eru búnar og ekki til neitt deig. Þar fór það,
hugsaði ég, en sætti mig við að hún bauð
vínarbrauð og kökur í staðinn. Þegar beinan
kom næst hafði hún þetta að segja: Kakóið
er líka búið. Nú fauk í mig og ég
vildi fá endurgreitt. Ekkert mál, sagði hún, þú
færð það í skúrnum í landi. Dagbjartur
fann traktor sem hafði verið dulbúinn sem lest og lestarvagnar
héngu aftan í. Jæja, hann fær þá
allavega að sitja í lest, hugsaði ég. Við hímdum
við "lestina" um stund og biðum eftir að stuðið byrjaði.
Loks kom einhver karl með kúluvömb, hugsanlega staðarhaldarinn,
og gamall skarfur með honum. Skarfurinn fór einn í aftanívagn
og kúluvömbin keyrði af stað. Eftir stóð
svekkt krakkahjörð og Dagbjartur fór að grenja. Shit
fuck, hugsaði ég, nú drullum við okkur héðan
sem fyrst og förum á almennilegt kaffihús. Ferjuruslinu
seinkaði svo um korter og ég var eiginlega furðulostinn
að við kæmumst í land því eðlilegt
framhald hefði verið að ferjan yrði bensínlaus á
leiðinni. Þegar ég ætlaði að fá endurgreitt
í skúrnum var náttúrlega enginn þar og
allt harðlæst. Við héngum þarna nokkrir fúlir
ferðalangar með tóma maga en enginn kom til að endurgreiða.
Eftir kortér var mér skapi næst að brjóta
allar rúðurnar og skíta á gólfið, en
fjötrar góðs uppeldis héldu aftur af mér.
Nú fannst mér niðurlægingin vera orðin ágæt
þann daginn og brunaði bara á Mokka og keypti kakó
og bestu vöfflur í bænum fyrir alla fjölskylduna.
Þess má geta að Mokka er orðið reyklaust svo það
er hægt að vera þar án þess að setja fötin
í þvott þegar maður kemur heim. Á Mokka voru
nokkrir aðrir vöfflulausir úr Viðey, sem höfðu
fengið sömu hugmynd og ég. Einn þeirra hafði
hangið lengur en ég við skúrinn þar til einhver
mætti loksins og endurgreiddi honum, en reyndar bara 500 karl af
1100 kallinum því 600 kall er ferjugjald. En maður hefði
ekkert farið þarna nema til að fá vöfflur...
- æi fokk! Allavega: Viðey getur étið skít
og þetta lið þarna sem sér um veitingarreksturinn
ætti endilega að finna sér eitthvað annað að
gera sem fyrst.
---
Television voru heldur þreytulegir enda Tom Verlaine með
flensu og bölvað vesen á gítarsnúrum og fíddbakki.
En þegar bandið komst loksins á flug var þetta magnað
helvíti. Sérstaklega var lokalagið Marquee Moon geðveikt.
Það gengur náttúrlega ekki að skemma heilu
giggin með ónýtum snúrum eða ónýtum
gíturum og það tókst fjörkörlunum í
Jakóbínurínu sem eyddu meirihluta síns giggs
í að vandræðast eins og aular yfir biluðu drasli.
Tóku á endanum bara fjögur lög (sem voru skemmtileg).
Þetta er í annað skiptið sem ég sé bandið
og í hitt skiptið, að hita upp fyrir White Stripes, voru
þeir í tómu basli með græjurnar líka.
Svona vandræðagangi þurfa menn nú að hætta
strax.. Sá líka brot af Jan Mayen sem voru hressir og Jomi
Massage, sem var hress en kannski ekkert ógeðslega skemmtileg.
Jeff Hú kláruðu þetta svo og voru ekkert slor.
Í kvöld er svo #2 sem er svona:
18:30 Weapons
19:20 Morðingjarnir
20:00 Hermigervill
20:40 Donna Mess
21:30 Solex
22:30 Eberg
23:20 Throwing Muses
00:30 Lára
01:10 Hjálmar
---
Látinn er Arthur
Lee, forsprakki Love, sem var frábært band bakk in ðe
sixtís. Ég sá bandið, eða Arthur með einhverjum
strákum, í New York 92 líklega og það var
ágætt, en hrátt, en betra en ekkert. Reddaðu þér
Forever Changes eða vertu úti.
---
Logi Bergmann hefur boðað mig í viðtal með Karli
Th Birgissyni á NFS nú á eftir kl. 11 til að tala
um "fréttir vikunnar". Verð án efa hálfvitalegur.
04.08.06
Já já vinur minn. Fimmti Innipúkinn hefst í
dag. Nú er spurning hvort þetta verður síðasti
Innipúki sögunnar eða ekki. Vagndragarinn Grímur
á leiðinni í metnaðarfull bæjarstjórastörf
á Bolungarvík (nema Sjallarnir geri uppreisn og takist á
yfirnáttúrulegan hátt að bola
honum burtu? - Það yrði náttúrlega náðargjöf
fyrir áhugafólk um tónleika). Spurning hvort ég
hafi nennu til að sjá um dæmið að ári.
Það er víst ekkert upp úr þessu að hafa
og eintómt helvítis vesen. Tja, eins og lífið
sjálft. Ví sjall sí. En dagskráin í
dag er gríðarlega metnarfull. Hljómsveitin Dr. Gunni
ætlar að byrja skrallið kl. 18 og leikur nú með
ruglingslegri uppröðun: Ég, Kristján trommari, Grímur
bassaleikari (etv í síðasta sinn í bili) og Valdi
úr 9/11 / Reykjavík! á speedmetalslædgítar
í fjarveru Gumma sem er í Finnlandi. Eina æfingin fyrir
giggið var í gær og var útkoman vægast sagt
suddaleg. Svo er þetta ljómandi spikeitt, eða svona:
18:00 Dr. Gunni
18:30 Benni Crespo's Gang
19:00 The Foghorns
19:40 Ég
20:20 Jan Mayen
21:00 Jomi Massage
21:55 Jakobínarína
22:50 Television
00:30 Jeff Who?
---
Tom Verlaine úr Television er kominn til landsins og þykir
hinn mesti öðlingur. Bað um að fá að komast
í fornbókabúð og hékk svo hjá Braga
í 3 tíma og grúskaði.
02.08.06
Ekkert í sjónvarpinu og ekkert í bíó.
Það er ekki búið að vera neitt í bíó
í allt sumar. Sama óspennandi unglingaruslið í
öllum sölum. En þetta skánar. Og það eru
m.a.s. nokkrar myndir sem manni hlakkar til að sjá. Til dæmis:
Black
Dahlia, leikstjóri Brian De Palma e. sögu James Ellroy.
Bók byggð á sönnu viðbjóðslegu sakamáli
sem enn hefur ekki verið upplýst. Ungstirni fannst svo illa
útileikið að annað hefur varla sést fyrr og síðar.
Mikil mistería og fórnarlambið á meira að
segja
síðu á
netinu. Ef myndin verður eitthvað í áttina að
LA Confidential er ég ánægður. Art
School Confidential. Þar leiða Terry Zwigoff og Daniel Clowes
saman "hesta" sína á ný en síðast voru
þeir í hesthúsinu með snilldarmyndinni Ghost World.
A
Scanner Darkly e. sögu Philip K Dick, The
Devil and Daniel Johnston, þó ólíkt sé
að hún rati hingað, og... Já og eitthvað fleira,
er ég viss um.
---
Ljóð dagsins var samið í bankanum:
Framtíð
Afborgun 6 af 84
Afborgun 68 af 360
Afborgun 22 af 480
Það er gott að eiga framtíðina fyrir sér.
---
Ömurlegt ljóð!
---
Svokallaður ógæfumaður var í bankanum og
tróð sér fyrir framan alla með orðunum: "Ég
þekki Björgólf. Ég skal segja þér
það að hann hefur bæði skeint mér og baðað."
---
Það eru fleiri en Sigur Rós sem geta verið leyndardómsfullir
varðandi tónleikahald. Já, Dr. Gunni treður upp á
Innipúkanum kl. 18 á föstudaginn - opnar hátíðina
sem sé. Þetta verður eitthvað geðveikt pönk.
01.08.06
Skemmtileg
síða: allskonar furðulegir gítarar pólskir,
búlgarskir, handsmíðaðir og kreisí! Og á
svipuðum nótum: Ruslgítarar!
---
Þess má til gamans geta að Gibson
SG Junior 1970 gítarinn minn er nú til sölu í
Rín. Tékkitt!
---
Ef ég ætti sí svona leið um Las Vegas myndi
ég líklega tékka á glænýju Bítlasjó
LOVE.
Kannski maður bíði þó til 2008 en þá
á CBGBs að opna þar.
"Ég tek klósettið sem Joey Ramone pissaði í
með mér," segir Hilly eigandi. Talandi um Ramones: söngleikur
byggður á lögum bandins, Gabba gabba hey, hefur verið
settur upp (bara í Ástralíu og Þýskalandi
eins og er...)
---
Annars fórum ekki á nein sjó þarna í
brúðkaupsferðinni 2002 (jú, eitt eitthvað hálfslappt
standöpp). Fórum þó að boxoffisinu fyrir Siegfrid
og Roy, en hreinlega tímdum ekki að eyða 30 þúsund
kalli í að glápa á tvo útúrstrekkta
Þjóðverja leika sér við tígrisdýr
(þarna var dollarinn einmitt 110 kall.) Rúmlega ári
síðar réðst tígrisdýrið Montecore
á Roy sem átti einmitt 59 ára afmæli sama dag
(hvað gerði maður án Wikipedia?)
Vissulega hefði verið athyglisvert að vera viðstaddur það
sjó, en það var víst einhver kerling með heysátu
á hausnum sem átti sökina á æði tígrisdýrsins.
31.07.06
Smjörkúkarnir í Heimdalli sýndu stórkostlegan
aktífisma og hetjuskap með því að liggja ofan
á skattskýrslunum á dögunum. Ég er viss
um að nú eru þeir komnir á blóðbragðið
og að á næstu dögum sjáum við þá
berjast fyrir jafnvel enn stærri málum en þeim hvort
einhver megi skoða skattskýrslur nágrannans ef svo ólíklega
vill til að einhver nenni eða hafi geð í sér
til þess. Smjörkúkarnir munu fara í mótmælasvelti
ataðir tómatsósu á jakkafötunum fyrir utan
bandaríska stjórnarráðið til að mótmæla
utanríkisstefnu BNA og stuðningi heimsveldisins við Ísrael.
Smjörkúkar munu maka sig skósvertu og liggja alsberir
á austurvelli til að minna á neyð fólksins
í Darfur. Smjörkúkar munu stalka Guðna Ágústson
þar til ostur og kjúklingur verður seldur á mannsæmandi
verði en ekki á okurprís. Svona mun barátta smjörkúkanna
gera Ísland að besta landi í heimi og heiminn að
sælureit. Já bíðiði bara.
---
Var að fletta í Slangurorðabók Marðar Árnasonar
og fleiri sem kom út 1982. Það er löngu kominn tími
á nýja. Gemsi er t.d. "bíll af tegundinni GMC" skv.
bókinni. Þó skemmtilegt að fyrsta orðið
í bókinni er Abbababb.
---
Meira poppgrín: George Martin rænt (eitt
og tvö).
Úr Big Train.
---
Rolling Stones og Bítla pílagrímaferð mín
og Bigga er yfirvofandi. Maður
er að feta í fótspor milljóna annarra sem hafa
glápt á sama Bítladótið og mænt á
hús og dót sem skóp söguna. Meðal þess
helsta sem hægt er að gera er t.d. að leggja leið sína
til Abbey Road og mæna á hljóðverið og láta
taka mynd af sér á gangbrautinni. Það er m.a.s.
vefkamera
frá þessari frægustu gangbraut í heimi. Karlgreyið
hann Bill Wyman er með hamborgarabúlluna Sticky
Fingers og maður lætur sig eflaust hafaða að fá
sér borgara þar á koluppsprengdu verði, allt í
nafni ímyndaðrar nostalklíju. Í Liverpool er svo
bráðnauðsynlegt að fara í Cavern
klúbbinn, á Bítlasafnið
og
fara Bítlatúrinn.
Bara verst að það er ekki búið að opna Hard
Days night hótelið.
---
Hápunktur ferðarinnar verður svo að nudda augunum
utan í Rollingana þegar þeir leika öll sín
helstu lög í Twickenham, drykkjusjúkir, heilaskaddaðir
og krumpaðir, en hressir sem aldrei fyrr!
30.07.06
Hvað gerir þig stoltan af Íslandi? var spurt
á dögunum í einhverju blaði. Hefði ég
verið spurður hefði ég sagt: Að hlusta á
Sigur Rós. Ótrúlega korní svar náttúrlega,
en satt. Það ólgar allt inn í mér af bældum
tilfinningum í garð Íslensku fjallkonunnar þegar
blessaðir álfadrengirnir byrja. Sérstaklega þegar
ég sé þetta myndband
(Glósóli - algjörlega óskiljanlegt afhverju það
var ekki verðlaunað á síðustu ÍTV, og
ekki einu sinni tilnefnt heldur bara Hoppípolla, sem er klárlega
mun verra). Litlir krakkar (og sá minnsti deyr - eða hvað?),
hoppandi í náttúrufegurð og maður fer að
skjálfa af þjóðernisstolti. Og só? Það
hefur kannski þótt hallærislegt síðustu áratugina,
en síðan hvenær er þjóðernisstolt bannað?
Ég er ekki að tala um rembu, gæsagang og Sieg heil, bara
huglæga ást á þessu grasi og grjóti sem
maður reis upp af og mun síga ofan í aftur. Má
það ekki? Á maður bara að dæsa á
kaffihúsi og tala um ótrúlega þjóðrembu
hjá þessu liði sem hefur eitthvað á móti
virkjunum og álverum sem mun gera okkur öll rík og iðandi
í spikinu á enn stærri pikköppum? Nei! Íslandi
allt. Nú fæ ég mér tattú! Nei, ég
segi svona.
---
Annars gæti Jónsi í SR startað nýju
trendi ef hann heldur áfram að sporta þessari forláta
gömlukarlahúfu með eyrnaskjólunum. Hún er
svipuð og húfan sem Guðbergur Bergsson er stundum með
og er það ekki leiðum að líkjast. Tveir snillingar
á ferð.
---
Gigg SR í kvöld er ekki síðasta gigg bandsins
á þessu ferðalagi eins og ég las einhvers staðar
heldur eru eftir Seyðisfjörður (3. ág) og Ásbyrgi
(4. ág). Maður ætti kannski að mæta? Óneitanlega
skemmtilegra að sjá þá þar heldur en í
sollinum. Nei hvaða helvítis bull er þetta. Maður
verður að sjálfssögðu á Innipúkanum.
---
Góði besti hættu þessu kjaftæði og
koddu nú með Topp fimm! Ókei! Og þetta er eiginlega
Topp tíu!
Television -
Venus: Innipúkinn næstu helgi og þessir meistarar
á svið á föstudaginn kl. 22:30! Bandið sem fann
upp postpönkið (Slint, eh?), glimrandi gítarflækjurokk
og hér er æðisgengið lag af æðisgengnu meistaraverk
frá 1977, Marquee Moon. Bandið sem mætir er upprunalegt,
Tom Verlaine og Richard Llyod á sínum stað, en annað
hvort kominn nýr bassa eða trommuleikari. Bandið hefur bara
gert 3 LPs og ber sú fyrsta af. Adventure kom 1978 og skömmu
síðar var bandið hætt vegna "árekstra" gítarleikarana.
Kombakk 1991 og platan Television 1992. Síðan annað kombakk
2001 og þeir spila greinilega ennþá sbr. uppákomu
þeirra á Púkanum. Reyndar frekar skrýtið
að þeir séu að spila því maður hefði
haldið að Tom Verlaine ætti að vera plögga 2 nýjum
sólóplötum sem komu út með honum á
þessu ári. Allavega, það verður magnað að
sjá þessa meistara. (EXTRA EXTRA: Little
Johnny Jewel (Fyrsti síngullinn, 1975) og Foxhole
(af annarri plötunni, Adventure.)
Pink
Floyd - Vegetable man: Syd Barrett nýdáinn og ég
hef verið að hlusta á hinar mjög svo ójöfnu
sólóplötur hans. Nenni ekki að skrifa meira en bendi
á þessa grein.
Hér er óúgefið Pink Floyd lag frá 1967
sem sýran beinlínis lekur af. (EXTRA EXTRA: Lagið
var síðar kóverað af bæði Jesus
& The Mary Chain og The
Soft Boys. Goðsögnin um hinn heillum horfna snilling var sterk.
Pönkpoppbandið Television Personalities túlkaði goðsögnina
skemmtilega á singli 1981: I
know where Syd Barrett lives.)
Jarvis
Cocker - Cunts are still running the world: Þessi snillingur
hugsar sér nú lox til hreyfings eftir mörg ár
í þögn. Hér er lag sem hann póstaði
á Myspace-síðunni
sinni en albúm ku á leiðinni. Lagið samdi hann
uppfullur af meiningum eftir Live 8 tónleikana.
Peaches
- Downtown: Glaða glennan Fíkja er komin með plötuna
Impeach my bush og þetta glannalega stuðlag er þegar farið
að heyrast á Kiss FM og jafnvel FM957. Húrra!
Solex
- Honkey donkey: Aftur að Innipúkanum.
Kiddi í Hljómalind var mikið að hampa þessari
hollensku listakonu hér á árum áður, enda
sá hann um innflutning á plötum hennar (hún gaf
út hjá Matador merkinu). Leitandi og skemmtilegt, Solex er
mikið og gott krútt. Hún spilar á laugardaginn
kl. 21:30 og mig hlakkar til, eins og reyndar til allrar hátíðarinnar
því þetta er spikfeitt.
---
Kastljós Simmi talar
um Sigga storm sem er nær viðbrenndur af stuði. Uppáhalds
veðurfræðingurinn minn er tvímælalaust Þór
Jakobsson með sitt öðlingslega veif í lok hvers veðurfréttatíma.
Hann er einhverra hluta vegna líka alltaf með gömlu vikudagaheitin
á kortunum, Óðinsdagur osfrv. Nær væri að
koma til móts við útlendingana sem eflaust hanga yfir
veðrinu og reyna að sjá hvort það fari ekkert
að stytta upp og hafa ensk vikudagaheiti í staðin fyrir
þessu gömlu íslensku. Næstur á vinsældarlistanum
kemur Haraldur "viðrar vel til loftárása" Ólafsson.
Ég vildi að það væru til Veðurfræðingaspjöld
sem maður gæti safnað eins og fótboltakarlaspjöldum.
Uppáhaldsveðurfræðingur Lufsunnar er einhver "Höddi
Beikon", sem ég veit ekki ennþá hver er.
29.07.06
Neanderdalsmaðurinn er ekki útdauður. Tegundin býr
á Íslandi og keyrir trukka.
---
Þetta kemur að góðum notum: Rímorðabók
á netinu.
---
Nú er dagskrá Innipúkans
orðin niðurnegld. Drullugott stöff!
---
Austan við Hafnarfjörð er fínt fjall, Helgafell
(340 mys), sem ég nota sem æfingarfjall enda mun skemmtilegra
að hlaupa upp á það en að hanga á bretti.
Ég hef gert mér að leik að setja allt í botn
og mæla tímann upp. Í morgun fór ég í
5ta skiptið í sumar, sem er ekki merkilegt nema fyrir það
að ég var nákvæmlega jafn fljótur upp og
í 4ða skiptið, 31:53 mín. Fór svo í
spinning líka en var samt ekki nema 700 gr léttari en í
gær. Ég var ekki alveg nógu ánægður
með þetta svo ég keypti mér í fyrsta skipti
fitubrennslutöflur, Hydroxycut.
Það hefur líklega jafn góð áhrif að
éta smartís og ég veit að ég er sökker,
en samt, gefum þessu helvíti séns! Ég er ekkert
búinn að léttast vikum saman og hef ekki fengið að
smakka rótarbjór allan þennan tíma!
---
XFM hefur endurskoðað sín
mál og ráðið mig aftur til að sjá um Tónlistarþátt
Dr. Gunna á sunnudögum kl. 14. Þetta er vitaskuld
stórkostlegt! Fyrsti þáttur (eða reyndar #98) fer
í loftið sunnudaginn 5. ágúst og það
er m.a.s. komið spons, eðalplötubúðin 12
tónar! Starfsmenn stöðvarinnar eru drullufúlir
yfir brottrekstri Capone (enda fáránlegt bull að slátra
gullgæsinni) og er ákvörðunin alfarið komin "að
ofan".
28.07.06
Rough Trade er mögnuð plötubúð
á Tolbot St í London og Rough Trade plötufyrirtækið
er náttla goðsögn í pönkpostinu. Fyrstu 80
útgáfur merkisins eða svo eru skilduhlustun (Allmusic
tók nýlega saman lista (1,
2,
3)
yfir fyrstu 40 smáskífur RT). Svo kom Smiths-tímabilið
og síðan næntís slappleiki og gjaldþrot,
en upp á síðkastið hefur merkið verið að
tvista á ný með haug af stóru indídrasli
eins og Belle, Strokes og jú neim itt. Merkið gaf út
Emilíönu síðast og nú er fyrsta
smáskífa Jakobínurínu komin út á
vegum þessa goðsagnakennda merkis. Ekki amalegt það,
er óhætt að segja, en kannski er umslagið mistök
enda DFA með hálfgerðan
einkarétt á teiknaðri eldingu.
---
Söngleikurinn Abbababb! verður frumsýndur í
janúar, að ég tel. Annað eins hefur ekki sést.
Sit hér upptjúnaður við skriftir enda er þetta
verða búið og nú þarf ég að skrifa
stórkostlegan lokakafla þar sem hetjurnar (leynifélagið
Rauða hauskúpan) sigrast á óvinum sínum
(Stóru strákunum) með hjálp karlsins í
sjoppunni (Hr. Rokk) og einni systur sinni (Systu sjóræningja).
Hellingur af nýrri tónlist verður í sviðsverkinu,
t.d. lög eins og Ástin er rokk og ról, Ástarlag
Steindórs og Spákonulagið. Og svo kemur söngleikjaplata
út öðru hvoru megin við næstu jól.
---
Síðan er náttúrlega að safnast upp efni
á næstu "fullorðins" plötu. Stóri hvellur
seldist ekki nema í kringum 300 eintök svo maður verður
að setja markið hátt með næstu plötu og stefna
á 600 eintök. Ætli það sé ekki þannig
að dótið sem maður gerir er dæmt af sölu.
Abbababb! er þá líklega það besta sem ég
hef gert með í kringum 5000 stk og Unun - æ næst
best með í kringum 3500. Með S.H.Draum - Goð erum við
að tala um einhver 500 stk en diskurinn Allt heila klabbið fór
í 1000 stk og er löngu uppseldur. Á næsta ári
verða liðin 20 ár síðan platan Goð var tekin
upp og því gráupplagt að gefa hana út aftur
með öllu hinu S.H.Draums dótinu líka. Svo liggur
Bless katalókurinn enn óendurútgefinn hjá velli
(bæði Gums og Melting seldust í kringum 500 stk) og framtíðar
pródjekt að gefa það út. Það er náttúrlega
glatað hvað þetta eru veiklulegar sölutölur, sérstaklega
í því ljósi hvaða krapp er að seljast
í 10-15.000 eintökum, og lítið sem svona viðkvæmur
listamaður getur gert í stöðinni nema grípa
til gamla slagorðsins; Fólk er fífl!
---
Belle voru ókei en eins og oft vill vera með þessi
krúttbönd (Belle er þó frekar poppband) þá
datt botninn of mikið úr þessu á milli laga enda
fólk endalaust að hringla á milli hljóðfæra
og bölvað vesen á þessu liði. Ég stóð
aftarlega og þar var þetta allt of lágt og kraftlaust
og á milli laga muldruðu liðsmenn eitthvað sem ég
missti af ofan í bringuna á sér. Bandið spilaði
of mörg leiðinleg lög en þegar eitthvað hressandi
kom var þetta magnað, enda Belle almagnað popp band á
köflum. Emilíana var fín, 2 ný lög lofa
góðu. Maður stóð í sömu sporunum
í nær 4 tíma og er kominn með (enn meiri) hryggskekkju.
27.07.06
Pee Wee Herman er enn að. Hér er nýlegt viðtal
við hann en hann vill þó ekkert tala um skandala fortíðar.
26.07.06
Jón Ormur Halldórsson er ómyrkur í máli
í Fbl í dag. Þetta er allt helvítis Ísraelum
að kenna. Svo kemur einhver annar og segir þetta allt helvítis
hinum að kenna. Og svo framvegis. Á maður að nenna að
fylgjast með þessu? Eða mynda sér skoðun?
23.07.06
Ár og dagar eru síðan ég hef sett hér
inn brakandi ferskan Topp 5 svo loksins loksins:
Lily
Allen - Everything's just wonderful: Ég skammast mín
ekkert fyrir að viðurkenna að vera unnandi góðs
popps og því þurfti ég að kanna málið
betur þegar ég heyrði í Lily Allen í útvarpinu.
Hún spratt víst upp af mæspeis síðunni sinni
eins og Arctic aparnir og er nú #1 með Smile smellinn sinn.
Hress ensk stelpa sem elskar The Specials og Ian Dury og platan er troðfull
af gleðipoppi eins og þessu lagi. Sumarsmellir á færibandi
og ekkert rugl.
Kid
Congo Powers & The Pink monkey birds - Even though your leather is
cliché....: Kid Congo Powers (í ljósasta jakkanum)
er athyglisverður vængmaður úr rokkinu og hefur verið
á kantinum með gítarinn sinn í ekki ómerkari
böndum en The Gun Club, The Cramps og The Bad Seeds (áður
en Nick Cave fór að totta af þeim alvörugefna þunga
sem einkennir hann í dag). Philosophy and Underwear er plata sem
hann gerði í fyrra með þessu Pink Monkey Birds bandi
sínu og hér er fínn rokkslagari af henni.
Klaxons
- Atlantis to Interzone: Enskt töff stöff sem verður
á Iceland airwaves (hverrar dagskrá er þegar farin
að líta nokkuð feitt út). Gítarrokk + 90s
hard kor segja þeir.
Motion
Boys - Waiting to happen: Íslenskt eitísslegið tölvupopp
sem lofar góðu. Samstarf Bigga "í Byltunni" og Árna
í Hairdoctor. Kannski plata framundan?
Siouxsie &
The Banshees - Israel: Síngull frá 1980 og ágætt
þema í það stríðsrugl sem nú skellur
á mann úr fréttum. Dauði og hörmungar og
allt blessað í bak og fyrir af blóðæstum könum
og biblíubullurum og hvað er hægt að gera nema reyna
að villast ekki inn á netsíður
sem birta sundursprengd barnslík? Siouxsie minnir annars á
þær ósnertanlegu nýbylgjugellur sem maður
starði vonlítill á á Safarí á sokkabandsárum
sínum í sukkinu og þó ég hafi ekki fílað
hana neitt sérstaklega in ðe old days þá hef ég
verið að hlusta á hana núna upp á nostalgíuna.
---
Fór á Kanamarkaðinn í Blómavalshúsinu.
Þar var ekkert nema dýrt rusl. Mig vantaði borð undir
plötuspilarann minn en hugsaði þegar ég stóð
við eina mubbluna: Afhverju ekki bara að styðja friðelskandi
Svíana í Ikea í staðinn fyrir að vera að
púkka upp á morðóða alheimslögguna hér?
---
Annars er það helst að frétta að það
er sunnudagsmorgun og hvorki Fréttablaðið né Mogginn
komin inn um lúguna. Ég er helvíti pirraður. Maður
er vanur slakri frammistöðu Fréttblaðsútburðarfólks
en þetta er alveg nýtt með Moggann. Er þetta kannski
tákn um yfirvofandi heimsendi?
21.07.06
Nei andskotinn hafiða! Bassaleikarinn bara orðinn bæjarstjóri
á Bolungarvík!!! (Bæjarins,
Vísir).
Það er ljóst að nú mun heimsóknum fjölga
vestur á firði og ætli ég sé þá
ekki farinn að spila á bassa með Doktori Gunna. Grímskí
mun rífa Bolungarvík upp og ekki veitir af því
þetta er Selfoss Vestursins. Áður en feita kerlingin syngur
er ég viss um að Grímur mun breyta plássinu í
Seyðisfjörð Vestursins. Minni á að nú er
slagorð bæjarins ekki mjög líflegt:
Fyrsta mál á dagskrá er að fá nýtt,
t.d. Bolungarvík - í góðu skyggni sést
til Grænlands af Bolafjalli.
---
Trendið í dag virðist vera að vera sólópoppari
og gera út frá London. Villi
naglbítur og Biggi
í Maus eru allavega báðir í harkinu og með
plötur í haust.
---
Margir vilja meina að South Park slái öllu við.
Á
þessum
vef, sem ég trúi ekki öðru en að sé
algjörlega ólöglegur, má horfa á alla þættina!
Hér
er t.d. einn góður, sem fjallar um píkuna og rassgatið
á Opruh Winfrey. Usss... Er þetta nú ekki einu of?
Nei!
---
Rassi prump og fleiri sniðugir eru nú með listaflipp
í Gróttu sem er tilvalið yfirskin til ferðar út
í eyjuna. Til að vita hvenær skal fara er gott að
vita af þessum flóðatöflum.
20.07.06
Er Peter Serafinowicz það ferskasta í gríninu
í dag? Youtube lumar á:
John
Lennon fann upp Ipoddinn! og "Fræðslumyndirnar" Look
around you (geðveikt - mæli t.d. með þættinum
um tónlistina). Svo er feik gamlir fræðsluþættir
- Music 2000 - um það hvernig fólk sér dægurtónlist
fyrir sér árið 2000. Ha
ha ha og hí
hí hí!
---
Wonder
showzen er geðveikt stöff og klárlega það
besta á MTV. Fullt af því er líka á You
tube, t.d. Plastic
surgeons without borders, what
would jesus brew? , God's
biggest boners og svo auðvitað: Global
Politics In 30 Seconds.
---
Góðan daginn sólskin er tvímælalaust
eitt besta lagið með Bítles, þó það
sé eiginlega álíka korní og Guli kafbáturinn.
Ætli ég hlusti ekki eingöngu á Bítla og
Rolling Stones næsta mánuðinn eða svo enda bara mánuður
í ferð til Englands á Bítlaslóðir og
Stónstónleika.
---
Lufsan vakir framyfir miðnætti til að horfa á
Rockstar Supernova í beinni. Mér dettur ekki í hug
að horfa á þetta rusl. Magni er náttúrlega
ágætis strákur og allt það en ég skil
bara ekki hvað er eftirsóknarvert við að að komast
í band með þeim heilalausu og útbrunnu þungarokkspoppurum
og b-liði sem skipa þetta svokallaða band? Gera grey hvað
sem er til að komast í sjónvarpið? Já! Viðbjóður
og lágkúra!
---
Sindri Eldon er maðurinn. Gamla plötugagnrýnin mín
(sem sendi ekki ófáa poppara grátandi til gagnárása
í blöðin - hver man ekki eftir grein Einars Ágústs
um "flugdreka sem hefja sig best á loft í mótvindi")
er eins og eitthvað úr barnablaðinu Æskan við
hliðina á moldroki Sindra. Hann ögraði herdeild Bubba
Morthens með þessari
grein í Grapevine. Um þetta stendur nokkuð einhliða
þras á spjallsíðu Bubba en Sindri
svarar "eins og honum einum er lagið". Alveg dásamleg lesning
og alveg magnað að koma þetta ekkert við og þurfa
ekki að sitja sveittur og bíða eftir því hver
dissar mann næst fyrir einhverja gagnrýni.
---
Við Birgir sáum Ólaf Jóhann (fyrrverandi best
launaði maður á Íslandi) í heita pottinum.
Birgir hafði á orði að hann væri fullkominn í
útliti og innihaldi og ég samsinnti þessu og minntist
á að hann minnti eiginlega helst á movie star frá
1930 eða svo þar sem hann stóð þarna spengilegur
í skýlu og skipaði vel uppöldum börnum fyrir
verkum. Ég var dauðhræddur um að Ólafur hefði
líka superheyrn og myndi heyra í okkur og koma og pakka okkur
saman. Við Birgir vorum líka sammála um að við
myndum aldrei nenna að lesa eitthvað eftir mann sem liti svona
út.
19.07.06
Já sannlega segi ég yður, heillangt er síðan
ég ritaði hér síðast. Ástæðan:
Fór Hringinn og var að koma til baka. Það er auðvelt
að gleyma því að Ísland er meira en þetta
hér, þessi Reykjavík og það gutl sem henni
fylgir. Þegar maður er úti á landi og þýtur
hjá í bíl óskar maður þess að
vera á hjóli svo maður gæti sniffað þetta
klikkaða land og allt landslagið sem er svo flott og æðislegt
út um bílrúðuna. Þjótandi hjá
er eins og maður sé að missa af einhverju. Að í
hverjum dal og bæ sé eitthvað sem maður ætti
að dýfa sér í og upplifa. Að maður ætti
að stoppa á hálftíma fresti, sniffa og glápa
og velta sér upp úr grasinu.
---
En jæja. Var heillengi á Akureyri í fjölskyldufíling
enda ástsæl Oddný systir að halda upp á
5tugs afmæli. Ég tók auðvitað prumpulagið
í veislunni. Meðal annars: Greifinn, Jólahúsið,
Brynjuís (líklega besti ís landsins), Súlur
og Smámunasafn. Það er helvíti gott safn. Sá
t.d. Spur flösku og gamlan íslenskan gosdrykk sem bar það
heiðarlega nafn "Litið sykurvatn með kjörnum" og var framleitt
af Svölunni SF. Þarna datt mér í hug að skrá
sögu íslenskra gosdrykkja í bók og er enn að
melta þá hugmynd.
Fór í fyrsta skipti til Hríseyjar sem er kreisí
sjitt í sól og sumaryl. Mæli með ferð þangað.
Úr ferjunni tók lítið við, sjoppan/handverkshúsið
lokuð en við tókum traustataki þetta glæsilega
farartæki og hjóluðum um eyjuna.
Ég hafði hringt í Aðalstein Bergdal sem sagði
að það væri ok en kannski skulda ég honum leigu.
---
En loksins fórum við svo af stað frá Akureyri
í súldarskít. Jarðbað á Mývatni
og þaðan í Fjalladýrð á Möðrudal.
Sá hið fræga málverk/altaristöflu innum glugga
kirkjunnar. Gistum í kjallaranum á bóndabænum
og átum kjötsúpu. Næsta dag brakandi blíða,
Herðubreið eins og Ungfrú Ísland og við renndum
á Austfirði. Þar hélst blíðan að
mestu. Það er engu logið að Seyðisfjörður
er töff pleis enda slatti af velmeinandi lista/hux liði þar.
Smá Woodstock/Hótel Búðir/Skólavörðustígur
fílingur í gangi. Hitti m.a.s. Helga úr Singapore
Sling sem var að opna bókabúð. Hann á þessa
gullvægu setningu, sem meikaði þó nokkurn sens þarna:
REYKJAVÍK ER DRAUGABÆR. Búðin EJ Waage sló
þó öllu út með ævagamlan lager. Því
miður ekkert flott á mig en skyrta á Dagbjart sem lítur
úr eins og eitthvað úr seventís útgáfunni
af Sopranos (sem er náttúrlega ekki til). Sáum Norrænu
sigla inn. Áttum dúndur nótt á glæsihótelinu
Öldunni. En því miður var rúmið svo hræðilegt
mín megin að ég stirðnaði allur upp og gat varla
gengið daginn eftir. Í morgunmatnum (á hinu glæsilega
hóteli) hittum við fornan Skota sem hafði komið með
ferjunni og var á róli. Seyðisfjörður fær
fullt hús!
---
Egilsstaður er allur að koma til, sömpluðum bæði
sundlaug og Café Nilsen. Vorum með hnútinn í maganum
að koma á Reyðarfjörð og ég sá fyrir
mér blóðugu fjallkonu við veginn, nauðgað
af honum illu Alkónum. Hélt að þetta álver
væri miklu stærra en það svo var - einhvers
staðar las ég að það væri 11x Álverið
í Straumsvík. Þegar ég keyrði framhjá
Reyðarfirði síðast tók ég varla eftir
því en nú er þetta vísir að bæ
og rúmlega það - alls staðar voru fúlskeggjaðir
Pólverjar (að mér skilst) í neongrænum vestum
að iðnaðarmannast eitthvað. Pleisið er eitt stórt
Iðnaðarpleis núna og bráðum verður það
eiturspúandi verksmiðjapleis - Detroit Austursins. Til hamingju
og húrra með uppganginn, framsóknarpussurnar ykkar! Eskifjörður
er mor læk it, gamla góða plássið utan í
fjalli í ræmu við sjó. Síldartankar, sjoppa
og doði. Neskaupsstaður er sami pakki. Bandið mætti og
spilaði
þar á Eistnafluginu sem var nokkuð gott bara, enda menn
og konur nokkuð hressar. Aðallega Dagbjartur þó sem
var fremstur og dansaði. Verð að viðurkenna að allt
tilfallandi rokk rauk úr mér þegar ég reyndi
að vera kúl og æpa Algjör þögn er best
og sonurinn 3ja ára smælandi fremst dansandi með mömmu
sinni. Vorum á Hótel Eddu á Neskaupsstað sem er
í raun ekki hótel heldur úldin heimavist og ekki fólki
bjóðandi að selja því 2 bedda í kompu
með klósetti með síleka, hurð sem nötrar
alla nóttina og ekki einu sinni léleg eftirprentun á
vegg heldur beinhvítt sementið bert. 11.300 kall nóttin,
vinur minn, á NESKAUPSSTAÐ! Þess má geta að
brúðkaupsnóttin á New York New York hótelinu
í Las Vegas (svíta, jacussi, etc) var eitthvað um 8000
kall. Ísland er geðveikt þegar kemur að okri á
öllum sköpuðum hlut, mat, bensíni og gistingu - einfaldlega
bilun. En þetta sló öll met og ég hef ákveðið
að Hótel Edda keðjan sé mesta rippoff landsins í
dag og ég mun frekar sofa í öllum fötunum í
blómabeðum á lóðum heldur en að gista
þar aftur. Púúú á þetta fokk!
---
Nú var farið að sjá fyrir endann á ferðinni,
sem er alltaf gott, enda best að komast heim frá misgóðum
rúmum og vöðvabólgu. Þó voru eftir
nokkur pláss sem ég minnist ekki að hafa séð
áður, eða vitað að væru til, t.d. Bakkafjörður.
Síðustu nóttina vorum við á Gerði í
Suðursveit og skoðuðum hið glæsilega Þorbergssetur.
Það er snilld og alveg þess virði að bruna þarna
austur bara til að sjá það. Vitandi að þessi
höfuðsnillingur er þaðan úr sveitinni fór
maður að sjá snillinga á hverju strái og ég
er ekki frá því að nokkrir sveitungar hafi minnt
nokkuð á karlinn í útliti.
---
Súrt var að hlusta á fréttir í ferðinni.
Fyrst endalaust eitthvað röfl í "sérfræðingi"
sem hafði komist að því að fólk væri
alltaf að rífast á ferðalögum og að sumarfrí
væru í raun helvíti. Okkur fannst skrýtið
að vera ekki að hnakkrífast allan tímann. Hvað
er að okkur? Ekki batnaði það þegar fréttir
af morðóðum Ísraelum og Hisbollum fóru að
heyrast. Beinlínis pirrandi í náttúruparadísunum
að hlusta á þennan sjúka söng. Dauðaþulan
syngur sinn söng í fréttum, Alls XXX fallnir, XX óbreyttir
og XX börn (Íslendingar óhultir og á leiðinni
heim) og Bandaríkin ein neita að mótmæla í
öryggisráðinu. Má á þessu skiljast
að líf "óbreyttra" sé ekki eins dýrmætt
og barna og að líbanönsk börn eru ekki alveg jafn
dýrmæt og Íslendingar? Og ef maður er ekki "óbreyttur"
er maður þá "breyttur"? Hvað á þessi
miðausturlandadrulla að leka lengi yfir okkur og er enginn endir
í augsýn? Eru þetta lið allt svona ógeðslega
vont og geðveikt að ekki verður hætt að slátra
fyrr en síðasti David slátrar síðasta Múhammed?
Nema það verði Múhammed sem tekst að stúta
David?
---
Nokkuð var etið
í þessari ferð, mikið farið í sund
og m.a.s. smakkaður nýr orkudrykkur.
Um það má lesa á viðeigandi stöðum. |