Vísindi og siðferði
Árið 1992 kom úr bók eftir Ólaf Halldórsson
sem heitir Uppruni og þróun mannsins. Þetta er
fróðleg bók og skemmtileg. Í henni segir frá
öpum og öðrum prímötum, fornum beinum úr
suðuröpum og reismönnum, kenningum um hvers vegna menn eru
hárlausir, hvers vegna bæði augun í þeim
vísa fram og hvernig hugur okkar og hönd mótaðist
í aldanna rás.
Á blaðsíðu 17 í
bókinni segir frá ýmsum hæpnum ályktunum
sem menn hafa dregið af þróunarkenningu Darwins (1809
- 1882). Ólafur nefnir að sumir hafi álitið hana
renna stoðum undir þjóðernishyggju, aðrir talið
hana sýna að mannlífið sé tilgangslaust og
enn aðrir litið á hana sem sönnun fyrir tilveru guðs.
Síðan segir hann:
Þau dæmi sem hér
hafa verið nefnd um "túlkanir" á þróunarkenningunni,
sem og árásir á þróunarkenninguna á
grundvelli þeirra, eru ekki annað en vangaveltur byggðar
á misskilningi. Þróunarkenning Darwins hefur í
raun ekkert til málanna að leggja varðandi til dæmis
siðferði eða trúarbögð fremur en aðrar
vísindakenningar.
Flestir geta tekið undir með Ólafi
að vangaveltur um að þróunarkenningin sanni að
guð sé til eða að lífið sé tilgangslaust
eru byggðar á misskilningi. En gengur hann ekki of langt þegar
hann segir að vísindakenningar hafi ekkert til málanna
að leggja varðandi siðferði eða trúarbrögð?
Kenningin, sem Ólafur tæpir á,
dregur mjög dám af heimspekikenningum sem nutu vinsælda
á fyrri hluta aldarinnar. Þetta er svo sem ekkert undarlegt
því oft er heimspeki gærdagsins "heilbrigð skynsemi"
dagsins í dag. Þetta á ekki síst við um
rökfræðilega raunhyggju (logical positivism), en samkvæmt
kenningum flestra heimspekinga af þeim skóla eru siðferðleg
viðhorf hvorki sönn né ósönn, engar staðreyndir
til um gott og illt eða rétt og rangt og ekkert röklegt
samband milli þekkingar og siðferðis. Þeir töldu
yfirleitt að gildismat manns og siðadómar lýsi eða
tjái ótta hans og vonir, langanir og þrár en
ekki vitneskju hans um staðreyndir. Vísindin kváðu
hins vegar snúast um staðreyndir, um það hvernig heimurinn
er í raun og veru.
Kenningar í þessum dúr
birtust í ýmsum myndum í ritum heimspekinga á
fyrri hluta þessarar aldar. Meðal raunhyggjumanna sem héldu
þeim fram, að minnsta kosti á tímabili, má
nefna Englendingana Bertrand Russell (1872-1970) og Alfred Ayer (1910-1989),
Austurríkismanninn Ludwig Wittgenstein (1889-1951) og Þjóðverjann
Rudolf Carnap (1891-1970). Svipaðra viðhorfa gætti meðal
franskra heimspekinga sem aðhylltust tilverustefnu (existentialisma)
eins og Jean-Paul Sartre (1905-1980) og Albert Camus (1913-1960). Þessar
kenningar eiga sér töluverða forsögu. Það
má lesa þær milli línanna í ritum nokkurra
heimspekinga á 18. öld eins og til dæmis Bretanna David
Hume (1711-1776) og Francis Hutcheson (1694-1746).
Þessar leifar af rökfræðilegri
raunhyggju eru ef til vill hluti af einhvers konar vopnahlésskilmálum
milli trúarbragða og siðfræði annars vegar og
vísinda hins vegar. Trúarleg og siðferðileg viðhorf
fá að vera í friði fyrir veruleikanum sem vísindin
rannsaka og vísindamenn sleppa við áhyggjur af að
kenningar þeirra hrófli við því gildismati
og þeirri hugmyndafræði sem heldur samfélaginu saman.
En hvaða sögulegar og félagsfræðilegar ástæður
sem kunna að vera fyrir vinsældum kenningarinnar um aðskilnað
vísinda og siðferðis hljótum við að spyrja
hvort þessi kenning sé sönn eða ósönn.
Greinarnar sem mynda þekkingu okkar,
skoðanir og viðhorf tengjast saman á ýmsa vegu. Eðlisfræðin
er til dæmis nátengd stærðfræði, stjörnufræði,
veðurfræði, efnafræði og mörgum öðrum
greinum. Efnafræðin tengist svo á ýmsan hátt
við jarðfræði, líffræði og fleiri greinar.
Líffræðin er nátengd læknisfræði,
sálfræði og mannfræði. Sálfræðin
og mannfræðin tengjast svo ótal öðrum greinum
mannvísinda, þar á meðal félagsfræði,
sagnfræði og bókmenntafræði. Þetta þýðir
að uppgötvun sem er gerð í einni vísindagrein
getur kallað á endurskoðun á kenningum og viðhorfum
í annarri grein. Sem dæmi um þetta má nefna að
uppgötvanir í stærðfræði og eðlisfræði
sem voru gerðar á fyrri hluta þessarar aldar leiddu til
þess að til varð ný fræðigrein, tölvufræðin.
Tölvufræði hefur síðan haft margháttuð
áhrif á sálfræði og málvísindi
og þaðan hafa áhrif hennar borist inn á vettvang
annarra mannvísinda. Nýjar uppgötvanir í stærðfræði
geta sem sagt kallað á endurskoðun á kenningum í
félagsvísindum og eins geta nýjungar í jafn
óskyldum greinum og sálfræði eða sögu
haft áhrif á rannsóknaraðferðir og kenningasmíð
í stærðfræði.
Flestir heimspekingar sem fjalla um þekkingarfræði
nú á dögum leggja áherslu á að þekking
manna, skoðanir og viðhorf hangi saman þannig að sé
kippt í einn spotta fari allt á hreyfingu. Í samræmi
við þetta telja margir þeirra að trúarleg og
siðferðileg viðhorf tengist vísindalegri þekkingu
á ótal vegu. Þetta virðist hreint ekki ósennilegt.
Sem dæmi má taka að líffræðileg rök
sýna að allt mannkynið myndar eina tegund og munur á
kynþáttum er lítill miðað við einstaklingsmun
innan hvers kynþáttar. Þessi líffræðilegu
rök kippa fótunum undan ýmsum gerðum kynþátta-
og þjóðernishyggju og hafa þannig siðferðilegar
afleiðingar. Þróunarkenningin kveður á um að
öll fremdardýr (prímatar), þar á meðal
menn og apar, eigi sér sameiginlegan forföður sem var uppi
fyrir milljónum ára. Þessi kenning stangast á
við bókstaflegan skilning á sköpunarsögum Gamla
testamentisins og hefur orðið til þess að flestir kristnir
söfnuðir hafa endurskoðað ýmis atriði í
túlkun sinni á Biblíunni.
Er þá ekkert sannleikskorn í
kenningunni um aðskilnað vísinda og siðferðis sem
Ólafur Halldórsson og margir aðrir raunvísindamenn
hafa þegið í arf frá heimspeki öndverðrar
20. aldar? Siðferði og siðareglur eru til þess að
menn geti lifað saman í friði og haft það gott.
Vísindi, eins og líffræði, læknisfræði,
hagfræði, sálfræði, félagsfræði
og lögfræði geta sagt okkur ýmislegt um hvernig helst
megi nálgast þessi markmið. Með þessu móti
geta vísindin haft áhrif á siðferði fólks
og hugmyndir um hvað sé til góðs og hvað sé
til ills, hvaða siðareglur borgi sig að halda í heiðri
og hverjum beri að hafna. En engin vísindi geta sýnt
fram á að það sé æskilegt að menn
lifi saman í friði og hafi það gott.
Til þess að vísindin geti
haft eitthvað að segja um siðferðisefni þurfa markmið
siðferðisins að vera fyrirframgefin. En engin vísindi
og engin rök geta sýnt að þessi markmið séu
skynsamleg eða réttmæt. Kenningin um aðskilnað
vísinda og siðferðis kann því að vera rétt
að því leyti að frumforsendur siðferðisins
verði hvorki studdar né hraktar með vísindalegum
rökum. En um leið og þessar frumforsendur eru gefnar tengjast
siðferði og vísindi saman á ótal vegu.
Ef einhver álítur að það
sé betra að mannkynið deyi út en að það
haldi áfram að vera til og vill þess vegna koma af stað
styrjöldum og hörmungum þá verður skoðun
hans ekki hrakin með því að benda á staðreyndir
eða þylja vísindaleg rök.
Sú skoðun að það
sé betra að mannkynið haldi áfram að vera til
verður heldur ekki studd neinum rökum. Hins vegar getur þróunarkenningin
ef til vill útskýrt hvers vegna menn telja lífið
dýrmætt því viðleitni til að verja sitt
eigið líf og skyldmenna sinna eykur líkurnar á
að eignast marga afkomendur. Tilfinningalíf manna og gildismat
hefur væntanlega mótast af náttúruvali rétt
eins og önnur einkenni lifandi vera. Vísindi af því
tagi sem fjallað er um í bókinni um uppruna og þróun
mannsins geta sem sagt bæði haft ýmisleg áhrif
á siðferði fólks og útskýrt að
nokkru leyti hvers vegna siðir okkar og lífshættir eru
svona en ekki einhvern veginn öðru vísi.